ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ត្រាំ បាន​ធ្វើ​ដំណើរ​ទៅ​កាន់​ឥណ្ឌា​ដើម្បី​ធ្វើ​ទស្សនកិច្ច​រយៈពេល​៣៦​ម៉ោង


លោក​ប្រធានាធិបតី ដូណាល់​ ត្រាំ ថ្លែង​ទៅ​កាន់​សារព័ត៌មាន នៅ​ពេល​លោក​ចាកចេញ​ពី​សេតវិមាន កាលពី​ថ្ងៃទី២៣​ ខែកុម្ភៈ ឆ្នាំ២០២០ ទៅ​កាន់​ប្រទេស​ឥណ្ឌា។

ប្រធានាធិបតី​សហរដ្ឋអាមេរិក លោក ដូណាល់ ត្រាំ បាន​ចេញ​ដំណើរ​ទៅ​កាន់​ប្រទេស​ឥណ្ឌា​កាល​ពី​ថ្ងៃ​អាទិត្យក្នុង​ដំណើរ​ទស្សនកិច្ច​រយៈពេល​៣៦​ម៉ោង ដោយ​លោក​បាន​ទទួល​ស្គាល់​ថា លោកមិន​រំពឹង​ថា នឹង​ត្រឡប់​មក​កាន់​សហរដ្ឋអាមេរិក​វិញ​ជាមួយ​នឹង​កិច្ចព្រមព្រៀង​ពាណិជ្ជកម្ម​ដ៏​ធំ​មួយនោះ​ទេ។

លោក ត្រាំ បាន​ថ្លែង​ប្រាប់​អ្នក​សារព័ត៌មាន​កាល​ពី​សប្ដាហ៍​មុន​ថា៖ «ខ្ញុំ​នឹង​ទុក​កិច្ចព្រមព្រៀង​ដ៏​ធំ​នេះ​សម្រាប់​លើក​ក្រោយ​ទៀត។ ខ្ញុំ​មិន​ដឹង​ទេ ថា​តើ​កិច្ចព្រមព្រៀង​នេះ​នឹង​សម្រេច​បាន​មុន​ពេល​បោះឆ្នោត​ជ្រើសរើស​ប្រធានាធិបតី​សហរដ្ឋអាមេរិក​នៅ​ខែ​វិច្ឆិកា​ឬ​អត់​ទេ ប៉ុន្តែ​យើង​ត្រូវ​តែ​សម្រេចឲ្យ​បាន​កិច្ចព្រមព្រៀង​ដ៏​ធំ​មួយ​ជាមួយ​នឹង​ឥណ្ឌា‍»។

​កិច្ចព្រមព្រៀង​ពាណិជ្ជកម្ម​នោះ​នឹង​តម្រូវ​ឲ្យ​សហរដ្ឋអាមេរិក​ និង​ឥណ្ឌា​ព្រមព្រៀង​គ្នា​លើ​កិច្ចការ​ជាច្រើន ប៉ុន្តែ​មាន​វិស័យ​មួយចំនួន​ដែលប្រទេស​ទាំង​ពីរ​មិន​ទាន់​ព្រមព្រៀង​គ្នានៅ​ឡើយ​ទេ ដោយ​រួម​មាន​ទាំងការ​ព្រមព្រៀង​គ្នា​លើ​ឧបករណ៍​វេជ្ជសាស្ត្រ​ផង​ដែរ។ នេះ​បើ​យោង​តាម​ប្រភព​ព័ត៌មាន​ដែល​តាម​ដាន​យ៉ាង​ជិតដិត​លើ​កិច្ចព្រមព្រៀង​នេះ។

ក្នុង​ដំណើរ​ទស្សនកិច្ច​ទៅ​កាន់​ប្រទេស​អាស៊ី​ខាងកើត​មួយ​នេះ លោក ត្រាំ ទំនង​ជា​នឹង​ប្រកាស​ពី​ជំនួញ​មួយ​ដែល​មាន​តម្លៃ​ជា​ទឹកប្រាក់​រាប់​ពាន់​លាន​ដុល្លារ​សម្រាប់​ឧទ្ធម្ភាគចក្រ​យោធា​ និង​អាច​រួម​មាន​ទាំង​ប្រព័ន្ធ​ការពារ​ពី​គ្រាប់​មីស៊ីល ក្នុង​អំឡុងពេល​ដែល​មាន​ការ​កើនឡើង​ការ​ព្រួយបារម្ភ​អំពី​ការ​ពង្រីក​ឥទ្ធិពល​របស់​យោធា​ចិន ដែល​បាន​ធ្វើ​ឲ្យ​មាន​ការ​សហប្រតិបត្តិការ​យ៉ាង​ជិតស្និទ្ធ​ជាង​មុន​រវាង​រដ្ឋាភិបាល​ក្រុង​វ៉ាស៊ីនតោន​ និង​រដ្ឋាភិបាល​ក្រុង​ញូវដេលី៕

XS
SM
MD
LG