ដោយអំពាវនាវឲ្យមានកិច្ចសហប្រតិបត្តិការកាន់តែខ្លាំងឡើងជាមួយប្រទេសឥណ្ឌា រដ្ឋមន្រ្តីការបរទេសសហរដ្ឋអាមេរិកលោក Mike Pompeo បានសម្តែងនូវសុទិដ្ឋិនិយមថា ប្រទេសទាំង២ នឹងដោះស្រាយការខ្វែងគំនិតរបស់ប្រទេសទាំង២ ស្តីពីបញ្ហាពាណិជ្ជកម្មនិងបញ្ហាផ្សេងៗទៀត «ក្នុងស្មារតីមិត្តភាព»។
អ្នកការទូតកំពូលអាមេរិកបានធ្វើការចរចាជាមួយលោក S. Jaishankar រដ្ឋមន្រ្តីការបរទេសឥណ្ឌា ហើយបានជួបជាមួយនាយករដ្ឋមន្រ្តីឥណ្ឌាលោក ណារិនដ្រា ម៉ូឌី កាលពីថ្ងៃពុធក្នុងអំឡុងនៃដំណើរបំពេញទស្សនកិច្ចទៅកាន់រដ្ឋធានីញូដេលីនៃប្រទេសឥណ្ឌា។
ការទាក់ទងកម្រិតខ្ពស់លើកដំបូងរវាងប្រទេសទាំង២ចាប់តាំងពីលោកម៉ូឌីបានជាប់ឆ្នោតម្តងទៀត កើតមានឡើងនៅពេលដែលប្រទេសទាំង២ ពិនិត្យមើលទំនាក់ទំនងដែលចំណងទាក់ទងយុទ្ធសាស្រ្តបានត្រូវបង្កើន ក៏ប៉ុន្តែមានការតានតឹងអំពីពន្ធគយហើយនឹងផែនការរបស់ឥណ្ឌាដើម្បីទិញប្រព័ន្ធអាវុធរបស់ប្រទេសរុស្ស៊ីដែលបាននាំឲ្យមានការរង្កៀសចិត្តគ្នានេះ។
ភាគីទាំង២ បានសម្រួលការខ្វែងគំនិតគ្នានេះ។ ដោយហៅប្រទេសទាំង២ថា ជាមិត្តដែលអាចជួយគ្នាទៅវិញទៅមកនៅជុំវិញពិភពលោក លោករដ្ឋមន្រ្តីការបរទេសសហរដ្ឋអាមេរិក Pompeo បានប្រាប់ក្រុមអ្នកយកព័ត៌មានថា មិត្តភក្តិដ៏អស្ចារ្សត្រូវតែមានការខ្វែងគំនិតគ្នា។ លោកស្រីរដ្ឋមន្រ្តីការបរទេសឥណ្ឌាបានថ្លែងថា «ប្រសិនបើអស់លោក អ្នករកស៊ីជាមួយនរណាម្នាក់ លោកអ្នកមិនត្រូវមានបញ្ហាពាណិជ្ជកម្មនោះទេ»។
នៅពេលជាមួយគ្នានោះដែរ រដ្ឋមន្រ្តីការបរទេសសហរដ្ឋអាមេរិកលោក Pompeo បានបញ្ជាក់ពីតម្រូវការដើម្បីដោះស្រាយជម្លោះកើនឡើងស្តីពីបញ្ហាសេដ្ឋកិច្ច។ លោកបានប្រសាសន៍ថា «សហរដ្ឋអាមេរិក បានបញ្ជាក់យ៉ាងច្បាស់ថា យើងស្វះស្វែងរកទីផ្សារកាន់ច្រើនឡើងហើយនឹងដកចេញឧបសគ្គនានា»៕
