លោកប្រធានាធិបតីសហរដ្ឋអាមេរិក ដូណាល់ ត្រាំ កាលពីថ្ងៃសុក្របានប្រកាសថា ទំនាក់ទំនងរវាងសហរដ្ឋអាមេរិកនិងចក្រភពអង់គ្លេសជាទំនាក់ទំនងពិសេសនិងមានកម្រិតខ្ពស់បំផុត។ លោកប្រធានាធិបតីត្រាំបានច្រានចោលសេចក្តីរាយការណ៍ពីចំណងទាក់ទងមានបញ្ហាដោយសាការល្អក់កករអំពីអត្ថាធិប្បាយរបស់លោកដែលបានចេញផ្សាយនៅក្នុងការសែតដ៏ល្បីមួយនៅក្នុងប្រទេសនេះ។
ឈរនៅជិតលោកស្រីនាយករដ្ឋមន្រ្តីចក្រភពអង់គ្លេសនៅខាងក្រៅគេហដ្ឋានដ៏ស្តុកស្តមរបស់នាយករដ្ឋមន្រ្តីនាពេលបច្ចុប្បន្នដែលបានកសាងនៅសតវត្សរ៍ទី១៦ ប្រធានាធិបតីអាមេរិក ដូណាល់ ត្រាំ បានការពារកំណត់សម្គាល់របស់លោកនៅក្នុងកិច្ចសម្ភាសន៍ជាមួយកាសែត ដែលបទសម្ភាសន៍នោះលោក ត្រាំ បង្ហាញភាពកំសោយកាន់តែខ្លាំងទៀតនៃការកាន់អំណាចរបស់លោកស្រីនាយករដ្ឋមន្រ្តី Theresa May។
ប្រធានាធិបតីត្រាំបានឆ្លើយទៅនឹងសំណួរអំពីកំណត់សម្គាល់ខ្លាំងៗដែលលោកត្រាំបានផ្តល់បទសម្ភាសន៍ជាមួយកាសែត The Sun ថា «កាសែតនោះមិនបានរាយការណ៍ពីអ្វីដែលខ្ញុំបាននិយាយអំពីលោកស្រីនាយករដ្ឋមន្រ្តីចក្រភពអង់គ្លេសទេ។ខ្ញុំបាននិយាយអំពីរឿងល្អៗជាច្រើន»។
កាសែតអភិរក្សនិយមរបស់ចក្រភពអង់គ្លេសនោះបានចាត់ទុកកំណត់សម្គាល់របស់លោក ត្រាំ ថាជាការចាក់សារធាតុនីត្រូគ្លីសារីនលើការបះបោរដ៏ខ្លាំងប្រឆាំងនឹងលោក ស្រីនាយករដ្ឋមន្រ្តីរួចទៅហើយដោយពួកប្រកាន់គោលនយោបាយការចាកចេញរបស់អង់គ្លេសពីសហភាពអឺរ៉ុប នៅក្នុងគណបក្សផ្ទាល់របស់លោកស្រី។
ក៏ប៉ុន្តែ ប្រធានាធិបតីត្រាំកាលពីរសៀលថ្ងៃសុក្របាននិយាយថា បន្ទាប់ពីការពិភាក្សារបស់លោកជាមួយលោកស្រីនាយករដ្ឋមន្រ្តី May និងអ្នកជំនួយការរបស់លោកស្រី លោកប្រធានាធិបតី ត្រាំ ឥឡូវនេះជឿថា កិច្ចព្រមព្រៀងពាណិជ្ជកម្មសេរីក្រោយពីចាកចេញរបស់អង់គ្លេសពីសហភាពអឺរ៉ុបរវាងសហរដ្ឋអាមេរិកនិងអង់គ្លេសប្រាកដជាអាចទៅរួច៕
