នៅពេលកិច្ចប្រជុំកំពូលអូតង់បានបញ្ចប់កាលពីថ្ងៃព្រហស្បតិ៍ លោក Donald Trump ប្រធានាធិបតីអាមេរិក បាននិយាយថា លោកទទួលបានការប្តេជ្ញាចិត្តពីសមាជិកដទៃទៀតរបស់អង្គការអូតង់ក្នុងការបង្កើនការចំណាយខាងការពាររបស់ពួកគេ បន្ទាប់ពីលោកបានតវ៉ាថា រដ្ឋាភិបាលក្រុងវ៉ាស៊ីនតោនបានទទួលបន្ទុកចំណាយយ៉ាងច្រើននិងយ៉ាងយូរ មកហើយក្នុងការផ្តល់ហិរញ្ញវត្ថុដល់សម្ព័ន្ធភាពយោធាលោកខាងលិចដ៏សំខាន់នេះ។
លោក Henry Ridgwell បានរាយការណ៍ពីកិច្ចប្រជុំកំពូលនេះថា ជម្លោះអំពីមូលនិធិនេះបន្តគំរាមកំហែងដល់បេសកកម្មដ៏សំខាន់របស់អង្គការអូតង់ រួមទាំងតួនាទីបន្តវត្តមាននៅក្នុងប្រទេសអាហ្វហ្គានីស្ថានផងដែរ។ កាលពីថ្ងៃព្រហស្បតិ៍សម័យប្រជុំដំបូងស្តីពីទំនាក់ទំនងរបស់អង្គការអូតង់ជាមួយប្រទេសហ្សកហ្ស៊ីនិងអ៊ុយក្រែន ត្រូវបានផ្អាកភ្លាមៗសម្រាប់កិច្ចប្រជុំក្រុមប្រឹក្សាគ្រាអាសន្នមួយ។
មិនយូរប៉ុន្មាន លោកប្រធានាធិបតីអាមេរិកបានប្រាប់ពួកអ្នកយកព័ត៌មានថា លោកបានជំរុញឱ្យមានកិច្ចព្រមព្រៀងក្នុងសម្ព័ន្ធភាពអូតង់ដើម្បីបង្កើនការចំណាយឱ្យបានលឿន។
លោកនិយាយថា មានការរីកចម្រើនគួរឱ្យកត់សម្គាល់ ហើយគ្រប់ៗគ្នាបានយល់ព្រមបង្កើនការប្តេជ្ញាចិត្តរបស់ពួកគេយ៉ាងខ្លាំង ហើយពួកគេនឹងបង្កើនការចំណាយឲ្យដល់កម្រិតដែលមិនមានពីមុនមក។ ប៉ុន្តែសម្ព័ន្ធមិត្តអឺរ៉ុបហាក់ដូចជាបដិសេធថាមិនមានការប្តេជ្ញាចិត្តច្បាស់លាស់ក្នុងការចំណាយនោះទេ។
លោកស្រី ANGELA MERKEL អធិការបតីអាល្លឺម៉ង់ និយាយថា សមាជិកអូតង់និយាយអំពីលទ្ធភាពនៃការចំណាយជាគ្រឿងបរិក្ខារបន្ថែមទៀត មិនមែនកងទ័ពទេ។ លោក Emmanuel Macron ប្រធានាធិបតីបារាំង បានផ្តល់ការគាំទ្រដល់សមភាគីអាមេរិករបស់លោក៕
