កាលពីថ្ងៃចន្ទ លោកប្រធានាធិបតីស.រ.អា. Donald Trump បានសរសើរដល់ «ទំនាក់ទំនងល្អណាស់» របស់ស.រ.អា.ជាមួយប្រទេសចិន និងមិត្តភាព «ដ៏ល្អ» របស់លោកជាមួយលោកប្រធានាធិបតីចិន Xi Jinping ក៏ប៉ុន្តែលោកបានចោទប្រកាន់ប្រទេសចិនថាបានទាញយកអត្ថប្រយោជន៍ពីស.រ.អា.យូរយាមកហើយ។
ដោយមានពួករដ្ឋមន្ត្រីនៃគណៈរដ្ឋមន្ត្រីនៅជិតលោកនៅមុនការប្រជុំមួយនៅសេតវិមានកាលពីថ្ងៃចន្ទ លោក Trump បាននិយាយថា កិច្ចព្រមព្រៀងពាណិជ្ជកម្មរវាងស.រ.អា. និងប្រទេសចិនមានរួមបញ្ចូល «បទបញ្ញត្តិពាណិជ្ជកម្មលម្អៀងទៅតែម្ខាងយ៉ាងខ្លាំងបំផុតដែលគេមិនដែលឃើញ»។
ក៏ប៉ុន្តែទោះជាយ៉ាងណាក៏ដោយ ដោយមិនបានបន្ទោសរដ្ឋាភិបាលក្រុងប៉េកាំងទេ លោក Trump បែរជារិះគន់អតីតប្រធានាធិបតីអាមេរិកាំង ពួកអ្នកតំណាងពាណិជ្ជកម្មកាលពីពេលមុនៗ និងពួកអ្នកធ្វើការចរចាថាបានធ្វើឱ្យមានស្ថានភាពពាណិជ្ជកម្មបច្ចុប្បន្ននេះ។
លោក Trump បានគំរាមកំហែងថានឹងដាក់កំហិតពន្ធគយបន្ថែមចំនួន១០០ពាន់លានដុល្លារលើទំនិញចិនកាលពីសប្តាហ៍មុន នៅក្រោយរដ្ឋាភិបាលក្រុងប៉េកាំងបានគំរាមកំហែងថានឹងបន្ថែមពន្ធលើទំនិញស.រ.អា.មានទឹកប្រាក់៥០ពាន់លានដុល្លារដោយមានរួមបញ្ចូលសណ្តែកសៀង និងយន្តហោះតូចៗផងដែរ។ ពួកអ្នកជំនាញបានព្រមានថាប្រសិនបើពន្ធគយទាំងនេះចូលជាធរមាន ក្រុមកសិករស.រ.អា.ដែលពឹងពាក់ខ្លាំងលើការដឹកជញ្ជូនផលិតផលកសិកម្មរបស់ពួកគេទៅលក់ក្នុងប្រទេសចិន នឹងក្លាយជាពួកជនរងគ្រោះមុនគេ៕
