កាលពីថ្ងៃសៅរ៍ម្សិលមិញ ប្រធានាធិបតីអាមេរិកលោក Donald Trump បានបន្តសង្កត់ធ្ងន់អំពីភាពចាំបាច់នៃសំណើសាងសង់ជញ្ជាំងព្រំដែនរបស់លោក ស្របពេលដែលការបិទរដ្ឋាភិបាលមួយផ្នែកបានឈានចូលដល់ថ្ងៃទី ៨ ហើយ។
នៅក្នុងសារតាម Twitter កាលពីថ្ងៃសៅរ៍ម្សិលមិញ លោក Trump បាននិយាយថា គណបក្សប្រជាធិបតេយ្យគួរតែមានវិធានការធ្វើឲ្យរដ្ឋាភិបាលដំណើរការឡើងវិញ។ លោក Trump បាននិយាយដូច្នេះថា៖ «ខ្ញុំនៅសេតវិមានរង់ចាំគណបក្សប្រជាធិបតេយ្យមកចរចារកដំណោះស្រាយ» អំពីបញ្ហាសន្តិសុខព្រំដែន។
ភាពជាប់គាំងនៅតែបន្តរវាងលោក Trump ដែលចង់បានថវិកាចំនួន ៥ ពាន់លានដុល្លារ សម្រាប់ដំណាក់កាលដំបូងនៃការសាងសង់ជញ្ជាំងព្រំដែន និងសមាជិកសភាខាងគណបក្សប្រជាធិបតេយ្យ ដែលគាំទ្រការបង្កើនថវិកាសម្រាប់រក្សាសន្តិសុខព្រំដែនជាទូទៅ ប៉ុន្តែបានបដិសេធយ៉ាងដាច់អហង្ការចំពោះការសាងសង់ជញ្ជាំងព្រំដែន។
នៅក្នុងសារតាម Twitter កាលពីថ្ងៃសុក្រ ជាថ្មីម្ដងទៀត លោក Trump បានគំរាមបិទព្រំដែនទាំងមូលរវាងសហរដ្ឋអាមេរិក និងប្រទេសម៉ិកស៊ិក និងគំរាមកាត់ផ្ដាច់ជំនួយទៅឲ្យប្រទេស Hunduras ប្រទេស Guatemala និង El Salvador ប្រសិនបើសភាមិនព្រមផ្ដល់ថវិកាសាងសង់ជញ្ជាំងព្រំដែនដល់លោកនោះទេ។
លោក Trump ក៏បានស្នើឲ្យមានការផ្លាស់ប្ដូរនូវអ្វីដែលលោកហៅថា «ច្បាប់អន្តោប្រវេសន៍គួរឲ្យអស់សំណើច» របស់សហរដ្ឋអាមេរិក។
ប្រសិនបើព្រំដែនរវាងសហរដ្ឋអាមេរិក និងម៉ិកស៊ិកត្រូវបានបិទទាំងស្រុង នោះវាងនឹងប៉ះពាល់ដល់ទំនាក់ទំនងពាណិជ្ជកម្មក្នុងទឹកប្រាក់ ១ ពាន់ ៦៨០ លានដុល្លារក្នុងមួយថ្ងៃ រវាងប្រទេសទាំងពីរ៕
