បេក្ខជនប្រធានាធិបតីសហរដ្ឋអាមេរិកមកពីគណបក្សសាធារណរដ្ឋលោក Donald Trump បាននិយាយកាលពីថ្ងៃអាទិត្យម្សិលមិញថា ទីក្រុង Aleppo ស្ថិតនៅភាគខាងជើងប្រទេសស៊ីរី «ជាទូទៅបានដួលរលំ»។ លោកបាននិយាយយ៉ាងដូច្នេះ ពេលដែលលោក និងលោកស្រី Hillary Clinton បេក្ខជនប្រធានាធិបតីសហរដ្ឋអាមេរិកមកពីគណបក្សប្រជាធិបតេយ្យ បាននិយាយគាំទ្រឲ្យមានការបង្កើតតំបន់សុវត្ថិភាព ដើម្បីជួយការពារជនស៊ីវិល។
បេក្ខជនទាំងពីរលើកឡើងដូច្នេះ ពេលដែលពួកគេកំពុងធ្វើការពិភាក្សាតស៊ូមតិគ្នាជុំទីពីរ ក្នុងចំណោមការពិភាក្សាតស៊ូមតិទាំងបីលើក នៅមុនការបោះឆ្នោតថ្ងៃទី ៨ ខែវិច្ឆិកាខាងមុខនេះ។
លោក Trump បានអំពាវនាវឲ្យរដ្ឋាភិបាលផ្សេងៗ ដូចជាបណ្ដាប្រទេសនៅតំបន់ឈូងសមុទ្រ ឲ្យទទួលខុសត្រូវចំពោះតំបន់សុវត្ថិភាពនានា និងបានចោទប្រកាន់ជាថ្មីម្ដងទៀតដល់តួនាទីរបស់លោកស្រី Clinton នៅក្នុងវិស័យការបរទេសសហរដ្ឋអាមេរិក ពេលដែលលោកស្រីធ្វើជារដ្ឋមន្ត្រីការបរទេសនៅក្នុងអាណត្តិទីមួយរបស់លោក Barack Obama ជាប្រធានាធិបតី ថាបានជួយដឹកនាំឲ្យមានការកើតឡើងនូវពួកជ្រុលនិយមក្រុមរដ្ឋឥស្លាម។
លោកស្រី Clinton ក៏បានបញ្ជាក់ផងដែរថា លោកស្រីនឹងបង្កើតតំបន់ដែលគ្មានការហោះហើរនៅក្នុងប្រទេសស៊ីរី។ លោកស្រីបានបន្ថែមថា មនុស្សជាច្រើនបានរងគ្រោះដោយសារតែ «ភាពគឃ្លើនរបស់ប្រទេសរុស្ស៊ី»។
លោកស្រីមានប្រសាសន៍យ៉ាងដូច្នេះថា៖ «កងកម្លាំងអាកាសរុស្ស៊ីបានប្ដេជ្ញាចិត្តប្រឹងប្រែងដើម្បីបំផ្លាញទីក្រុង Aleppo ក្នុងគោលបំណងដើម្បីកម្ចាត់ក្រុមឧទ្ទាមស៊ីរីចុងក្រោយ ដែលកំពុងប្រឆាំងនឹងរបបដឹកនាំរបស់លោក Assad»។
បេក្ខជនទាំងពីរនឹងធ្វើការដេញដោលតទល់គ្នាលើកចុងក្រោយនៅថ្ងៃទី ១៩ ខែតុលា ខាងមុខនេះ៕
