ប្រធានាធិបតីអាមេរិកលោក Donald Trump បាននិយាយថា គ្មានមូលដ្ឋានណាមួយសម្រាប់គណៈកម្មាធិការផ្លូវច្បាប់ដ៏មានអំណាចណាមួយដើម្បីស៊ើបអង្កេតលើហិរញ្ញវត្ថុផ្ទាល់ខ្លួនរបស់លោកនោះទេ។
លោក Trump បានឆ្លើយតបកាលពីថ្ងៃពុធម្សិលមិញ នៅពេលដែលអ្នកយកព័ត៌មានម្នាក់សួរលោកអំពីការសម្រេចរបស់គណៈកម្មាធិការស៊ើបការណ៍សម្ងាត់របស់រដ្ឋសភាដើម្បីស៊ើបអង្កេតលើហិរញ្ញវត្ថុរបស់លោក យ៉ាងដូច្នេះថា៖ «គ្មានអ្នកនយោបាយណាម្នាក់ត្រូវឆ្លងកាត់ដូចនេះទេ។ ករណីនេះគឺហៅថា ការបំពានលើប្រធានាធិបតី។ វាជារឿងអកុសល ហើយវាពិតជាប៉ះពាល់ដល់ប្រទេសរបស់យើង»។
លោក Trump មានបំណងសំដៅលើលោក Adam Schiff ដែលជាប្រធានគណៈកម្មាធិការនេះ។ លោក Adam Schiff ជាសមាជិកខាងគណបក្សប្រជាធិបតេយ្យ និងជាអ្នករិះគន់ដ៏ចម្បងលើលោក Trump។
កាលពីពេលថ្មីៗនេះ លោក Adam Schiff បានប្រកាសថា បន្ទាប់ពីមានការបោះឆ្នោតពាក់កណ្ដាលអាណត្តិប្រធានាធិបតីអាមេរិកកាលពីខែវិច្ឆិកាឆ្នាំមុនមក គណៈកម្មាធិការស៊ើបការណ៍សម្ងាត់របស់រដ្ឋសភា ដែលកំពុងស្ថិតនៅក្នុងដៃរបស់គណបក្សប្រជាធិបតេយ្យ នឹងពង្រីកការស៊ើបអង្កេតរបស់ខ្លួនផុតពីការជ្រៀតជ្រែករបស់រុស្ស៊ីទៅទៀត ហើយនឹងពិនិត្យលើថាតើក្ដីបារម្ភរបស់លោក Trump លើផលប្រយោជន៍ហិរញ្ញវត្ថុរបស់លោកកំពុងដឹកមុខការសម្រេចចិត្តផ្នែកគោលនយោបាយរបស់លោក និងសកម្មភាពផ្សេងៗទៀតរបស់លោកក្នុងនាមជាប្រធានាធិបតី ឬក៏យ៉ាងណានោះ។
កាលពីព្រឹកថ្ងៃពុធម្សិលមិញ គណៈកម្មាធិការនេះបានបោះឆ្នោតបញ្ជូនអត្ថបទកិច្ចសម្ភាសន៍ចំនួនជាង ៥០ អំពីការស៊ើបអង្កេតករណីជ្រៀតជ្រែករបស់រុស្ស៊ីក្នុងការបោះឆ្នោតអាមេរិកទៅឲ្យលោករដ្ឋអាជ្ញាពិសេស Robert Mueller៕
