ប្រធានាធិបតីសហរដ្ឋអាមេរិកលោកDonald Trumpបានអំពាវនាវទៅពួកមេដឹកនាំពិភពលោកទាំងអស់ដែលបានមកចូលរួមនៅក្នុងមហាសន្និបាតអង្គការសហប្រជាជាតិឲ្យដាក់របបដឹកនាំអ៊ីរ៉ង់នៅឯកោដោយលោកបានចោទប្រកាន់ពួកមេដឹកនាំអ៊ីរ៉ង់ថាបានបង្កភាពវឹកវរ សម្លាប់មនុស្ស និងធ្វើការបំផ្លិចបំផ្លាញនានា។
តាមរយៈសុន្ទរកថានៅឯមហាសន្និបាតអង្គការសហប្រជាជាតិកាលពីថ្ងៃអង្គារ លោក Trump បានថ្លែងថា«ពួកគេមិនគោរពប្រទេសជិតខាង ឬព្រំដែនរបស់ពួកគេឬសិទ្ធិដែនអធិបតេយ្យភាពរបស់ប្រទេសនានាឡើយ។ ជំនួសមកវិញពួកមេដឹកនាំអ៊ីរ៉ង់បានប្លន់ធនធានរដ្ឋដើម្បីបម្រើប្រយោជន៍ផ្ទាល់ខ្លួនរបស់ពួកគេ និងបង្កភាពវឹកវរនៅទូទាំងតំបន់មជ្ឈិមបូព៌ា និងទៅកន្លែងផ្សេងទៀត»។
លោក Trump នៅតែយល់ថាកិច្ចព្រមព្រៀងនុយក្លេអ៊ែរអ៊ីរ៉ង់ដែលបានធ្វើឡើងកាលពីឆ្នាំ២០១៥ ជំនាន់លោក Obama ដើម្បីបញ្ចប់កម្មវិធីនុយក្លេអ៊ែរអ៊ីរ៉ង់ដែលលោកបានដកសហរដ្ឋអាមេរិកចេញនោះ បានផ្តល់ផលប្រយោជន៍យ៉ាងច្រើនដល់ពួកមេដឹកនាំអ៊ីរ៉ង់ និងបានជួយបង្កើនថវិកាយោធារបស់ពួកគេជិតដល់៤០ភាគរយដើម្បីផ្តល់ការគាំទ្រផ្នែកហរិញ្ញវត្ថុដល់ពួកភេរវកម្មនិងផ្តល់ជាមូលនិធិដែលបង្កឲ្យមានការកាប់សម្លាប់ក្នុងប្រទេសស៊ីរីនិងយេម៉ែន។
លោកប្រធានាធិបតីបានថ្លែងថារដ្ឋបាលលោកបានចាប់ផ្តើមដាក់ទណ្ឌកម្មសារឡើងវិញលើប្រទេសអ៊ីរ៉ង់ដែលធ្លាប់ត្រូវបានលើកលែងនៅក្រោមកិច្ចព្រមព្រៀងនុយក្លេអ៊ែរអ៊ីរ៉ង់ ហើយទណ្ឌកម្មផ្សេងៗទៀតនឹងត្រូវដាក់ចាប់ពីថ្ងៃទី៥ខែវិច្ឆិកានេះតទៅ។
លោក Trump បានថ្លែងបន្តថា«យើងមិនអាចអនុញ្ញាតឲ្យប្រទេសដែលឧបត្ថម្ភអំពើភេរវកម្មធំជាងគេក្នុងពិភពលោកមួយនេះមានអាវុធគ្រោះថ្នាក់បំផុតដល់ភពផែនដីនេះទេ។ យើងមិនអាចអនុញ្ញាតឲ្យរបបដឹកនាំមួយនេះនៅបន្តស្រែកតវ៉ាឲ្យសម្លាប់ជនជាតិអាមេរិកាំង និងគំរាមកំហែងបំផ្លាញអ៊ីស្រាអែលតទៅទៀតទេ»។
កាលពីដើមឆ្នាំនេះលោក Trump បានប្រកាសដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរ។ ហើយនៅខែវិច្ឆិកាខាងមុខនេះ រាល់ក្រុមហ៊ុនដែលធ្វើជំនួញជាមួយប្រទេសអ៊ីរ៉ង់នឹងត្រូវបញ្ឈប់ ឬត្រូវប្រឈមនឹងហានិភ័យដកចេញពីប្រព័ន្ធគ្រប់គ្រងហរិញ្ញវត្ថុសហរដ្ឋអាមេរិក។ រដ្ឋាភិបាលក្រុងវ៉ាស៊ីនតោនចង់ដាក់សម្ពាធរដ្ឋាភិបាលក្រុងតេហេរ៉ង់ឲ្យត្រឡប់ចូលតុចរចាលើកិច្ចព្រមព្រៀងថ្មីមួយដែលជាកិច្ចព្រមព្រៀងមានលក្ខណៈទូលំទូលាយជាងមុន៕
