លោកប្រធានាធិបតីសហរដ្ឋអាមេរិក Donald Trump កំពុងរិះគន់លើការស៊ើបអង្កេតដើម្បីចោទប្រកាន់ទម្លាក់លោកពីតំណែងថាជា «រដ្ឋប្រហារ» មួយ ស្របពេលដែលថ្នាក់ដឹកនាំនៃគណៈកម្មាធិការមួយចំនួនរបស់រដ្ឋសភា ចោទលោករដ្ឋមន្ត្រីការបរទេសសហរដ្ឋអាមេរិក Mike Pompeo ថាបានរារាំងកិច្ចប្រឹងប្រែងរបស់ពួកគេនៅក្នុងការប្រមូលព័ត៌មាន និងសម្ភាសន៍សាក្សី។
លោក Trump បានសរសេរនៅលើបណ្តាញទាក់ទងសង្គម Twitter ថា៖ «ក្រោយពីបានទទួលព័ត៌មានជាបន្តបន្ទាប់រៀងរាល់ថ្ងៃមក ខ្ញុំអាចសន្និដ្ឋានបានថា អ្វីដែលកំពុងតែកើតឡើងគឺមិនមែនរឿងចោទប្រកាន់ទម្លាក់ខ្ញុំពីតំណែងទេ។ វាជាការធ្វើរដ្ឋប្រហារមួយ ដែលមានបំណងដកអំណាចរបស់ប្រជាពលរដ្ឋ ដកសំឡេងឆ្នោតរបស់ពួកគេ ដកសេរីភាពរបស់ពួកគេ ដកសិទ្ធិកាន់កាំភ្លើងរបស់ពួកគេ ដែលមានចែងក្នុងវិសោធនកម្មរដ្ឋធម្មនុញ្ទីពីរ ដកយកសាសនា យោធា ជញ្ជាំងព្រំដែន និងសិទ្ធិដែលព្រះប្រទានឲ្យរបស់ប្រជាពលរដ្ឋក្នុងនាមជាពលរដ្ឋរបស់សហរដ្ឋអាមេរិក!»។
សមាជិកគណបក្សប្រជាធិបតេយ្យដែលមានសំឡេងភាគច្រើននៃរដ្ឋសភាសរអាកំពុងបន្តការស៊ើបអង្កេតដើម្បីរកមើលថាតើពួកគេមានមូលហេតុចោទប្រកាន់ទម្លាក់លោក Trump ពីតំណែងតាមផ្លូវការ ក្រោមអំណាចរបស់ពួកគេដែលបានចែងក្នុងធម្មនុញ្ញបានដែរឬក៏យ៉ាងណានោះ។ រដ្ឋធម្មនុញ្ញសរអាចែងថាសភាអាចដកមន្ត្រីណាដែលពាក់ព័ន្ធក្នុង «ទោសក្បត់ជាតិ ទទួលសំណូក ឬ ឧក្រិដ្ឋកម្មនិងបទល្មើសធ្ងន់ធ្ងរផ្សេងៗទៀត។
នៅថ្ងៃពុធនេះ អគ្គអធិការកិច្ចនៃក្រសួងការបរទេសសរអា គ្រោងនឹងជួបជាមួយបុគ្គលិកមកពីគណៈកម្មាធិការត្រួតពិនិត្យការចាយវាយរបស់រដ្ឋាភិបាល គណៈកម្មាធិការត្រួតពិនិត្យកិច្ចការទូទៅរបស់រដ្ឋាភិបាល គណៈកម្មាធិការកិច្ចការបរទេស និងគណៈកម្មាធិការស៊ើបការណ៍សម្ងាត់របស់រដ្ឋសភា និងព្រឹទ្ធសភា ដើម្បីពិភាក្សាអំពីឯកសារដែលសមាជិកសភាស្នើសុំសម្រាប់ការស៊ើបអង្កេតលើការសន្ទនាកាលពីខែកក្កដាកន្លងទៅនេះរវាងលោក Trump និងប្រធានាធិបតីអ៊ុយក្រែនលោក Volodymyr Zelensky។
គណៈកម្មាធិការត្រួតពិនិត្យកិច្ចការសម្ងាត់ គណកម្មាធិការត្រួតពិនិត្យការចាយវាយរបស់រដ្ឋាភិបាល គណកម្មាធិការទទួលបន្ទុកកិច្ចការបរទេស បានស្នើឲ្យអតីតឯកអគ្គរដ្ឋទូតសរអា ប្រចាំប្រទេសអ៊ុយក្រែន លោកស្រី Marie Yonanovitch ផ្តល់សក្ខីកម្ម នៅថ្ងៃពុធនេះ ប៉ុន្តែជំនួបនេះ ត្រូវបានពន្យាពេលរហូតដល់សប្តាហ៍ក្រោយវិញ។ អតីតប្រេសិតពិសេសរបស់សរអា ទៅកាន់ប្រទេសអ៊ុយក្រែន លោក Kurt Volker ត្រូវគេរំពឹងថានឹងថ្លែងទៅកាន់គណកម្មការធិការសភាទាំងឡាយ នៅថ្ងៃព្រហស្សតិ៍ស្អែកនេះ។
លោក Trump បាននិយាយថា លោកមិនបានធ្វើអ្វីខុសនោះទេនៅក្នុងការពិភាក្សាតាមទូរស័ព្ទជាមួយនឹងលោក Zelensky។ អ្នកលួចបញ្ចេញព័ត៌មានសម្ងាត់បានដាក់ពាក្យបណ្តឹងបង្ហាញការព្រួយបារម្ភថា លោក Trump មានបំណងស្វែងរកការជ្រៀតជ្រែករបស់បរទេសនៅក្នុងការបោះឆ្នោតប្រធានាធិបតីសហរដ្ឋអាមេរិកឆ្នាំ ២០២០ ខាងមុខនេះ ដោយបានស្នើឲ្យប្រទេសអ៊ុយក្រែនស៊ើបអង្កេតលើលោក Joe Biden ដែលជាបេក្ខជនប្រធានាធិបតីសហរដ្ឋអាមេរិកខាងគណបក្សប្រជាធិបតេយ្យ។
កាលពីថ្ងៃអង្គារ លោករដ្ឋមន្ត្រីការបរទេសសរអា Mike Pompeo បានផ្ញើរលិខិតមួយច្បាប់ ទៅកាន់ប្រធានគណកម្មាធិការរដ្ឋសភា ទទួលបន្ទុកកិច្ចការការបរទេស គឺលោក Eliot Engel ដោយនិយាយថា សំណើរសុំឯកសារ របស់ក្រសួងការបរទេស និង ការកោះហៅឲ្យមន្ត្រីក្រសួងការបរទេស ដែលកំពុងកាន់តំណែង និងដែលបានចេញពីក្រសួងហើយ ធ្វើការផ្តល់សក្ខីកម្មនោះ «អាចចាត់ទុកថាគ្មានអ្វីក្រៅពីការប្រឹងប្រែងមួយដើម្បីបំភិតបំភ័យ រករឿង និង ប្រព្រឹត្តអំពើមិនសមរម្យលើបុគ្គលិកក្រសួងតែប៉ុណ្ណោះ។
លោក Pompeo បានថ្លែងថាសំណើរទាំងនោះបង្កឲ្យមាន «ការព្រួយបារម្ភផ្នែកផ្លូវច្បាប់និងនិតិវិធីយ៉ាងធ្ងន់ធ្ងរ» ហើយបានច្រានចោលការព្រមានដែលថា ការមិនសហការ នឹងត្រូវចាត់ទុកថាជាការរារាំងនោះ។
លោក Engel និងប្រធានគណកម្មាធិការត្រួតពិនិត្យការចាយវាយរបស់រដ្ឋាភិបាល លោក Elijah Cummings និងប្រធានគណកម្មាធិការទទួលបន្ទុកកិច្ចការសម្ងាត់ លោក Adam Schiff បានឆ្លើយតប ដោយចង្អុលរបាយការណ៍ទាំងឡាយ ដែលថាលោករដ្ឋមន្ត្រីការបរទេស Pompeo បានស្តាប់ការសន្ទនាតាមទូរស័ព្ទរវាងលោក Trump និង លោក Zelenskiy ដូច្នេះគឺមានន័យថា លោកមានទំនាស់ផលប្រយោជន៍មួយ យ៉ាងជាក់ស្តែង ហើយលោក «មិនគួរធ្វើសេចក្តីសម្រេចណាមួយពាក់ព័ន្ធនឹងការផ្តល់សក្ខីកម្ម ឬ ការផ្តល់ឯកសារ ដើម្បីការពារខ្លួនលោក ឬ ការពារលោកប្រធានាធិបតីទេ»។
នៅព្រឹកថ្ងៃពុធនេះ លោក Pompeo បានទទួលស្តាល់ថា លោកពិតជាបានចូលរួមក្នុងការសន្ទនាតាមទូរស័ព្ទរវាងលោកត្រាំនិងប្រធានាធិបតីអ៊ុយក្រែន ដែលនាំឲ្យមានការចាប់ផ្តើមការស៊ើបអង្កេតលោកប្រធានាធិបតីត្រាំនោះ។
លោកបានបញ្ជាក់យ៉ាងដូច្នេះ នៅក្នុងសន្និសិទសារព័ត៌មានមួយ នៅក្នុងទីក្រុង Rome ប្រទេសអ៊ីតាលី ដោយមិនផ្តល់សេចក្តីពិស្តារអំពីពាក្យសម្តី នៅក្នុងការសន្ទនាតាមទូរស័ព្ទ រវាងលោកប្រធានាធិបតី Trump និង លោកប្រធានាធិបតី Volodymir Zelenskiy នៃប្រទេសអ៊ុយក្រែនទេ៕
ប្រែសម្រួលដោយលោក ប៉ូច រាសី
