បេក្ខជនប្រធានាធិបតីខាងគណបក្សសាធារណរដ្ឋ លោក Donald Trump បានធ្វើការវាយប្រហារពាក្យសម្តីទៅលើលោកស្រី Hillary Clinton កាលពីថ្ងៃពុធ ដោយបានហៅគូប្រជែងខាងគណបក្សប្រជាធិបតេយ្យរូបនេះថា «ប្រហែលជាមនុស្សដែលពុករលួយជាងគេបំផុតដែលចង់ទទួលបានតំណែងជាប្រធានាធិបតីអាមេរិក»។
នៅក្នុងការរិះគន់ដោយពាក្យសម្តីធ្ងន់ធ្ងរបំផុតទៅលើលោកស្រី Clinton លោក Trump បានចោទប្រកាន់អតីតរដ្ឋមន្ត្រីក្រសួងការបរទេសអាមេរិករូបនេះថា គាំទ្រគោលនយោបាយការបរទេសអាមេរិកដែលនាំឲ្យមានការស្លាប់ជីវិតមនុស្ស ការបំផ្លិចបំផ្លាញ និងអំពើភេរវកម្ម ខណៈដែលលោកស្រីកំពុងតែបម្រើការជាមន្ត្រីការទូតកំពូលអាមេរិកពីឆ្នាំ២០០៩ដល់ឆ្នាំ២០១៣ ហើយបន្ទាប់មកលោកស្រីរកចំណូលបានរាប់លានដុល្លារតាមរយៈការឡើងថ្លែងសុន្ទរកថាក្រោយពីលោកស្រីត្រូវចប់អាណត្តិជារដ្ឋមន្ត្រីក្រសួងការបរទេស។
នៅក្នុងសុន្ទរកថាមួយមុនពេលស្រែកលើកទឹកចិត្តដល់ក្រុមអ្នកគាំទ្ររបស់លោកនៅ រដ្ឋញូវយ៉ក មហាសេដ្ឋីចលនទ្រព្យរូបនេះបាននិយាយថា លោកស្រី Clinton «មាននយោបាយរកចំណូលឲ្យខ្លួនឯងយ៉ាងល្អឥតខ្ចោះនិងជាចោរម្នាក់»។ ហើយលោកក៏បានហៅលោកស្រី Clinton ថាជា «មនុស្សកុហកលំដាប់ពិភពលោក»។
លោក Trump បាននិយាយថា លោកស្រី Clinton ដែលព្យាយាមដើម្បីទទួលបានតំណែងជាប្រធានាធិបតីស្រីទីមួយរបស់អាមេរិក បានចាត់ទុកក្រសួងការបរទេសដូចជារនាំងនៃការហូរចូលប្រាក់ផ្ទាល់ខ្លួន ដោយគាំទ្រដល់របបជិះជាន់និងរបបដទៃទៀត ដើម្បីជាថ្នូរនឹងប្រាក់។ លោកក៏បាននិយាយបន្តថា ម្ចាស់ជំនួយនានាបានផ្តល់ប្រាក់ឧបត្ថម្ភដល់មូលនិធិ Bill មូលនិធិ Hillary និង Chelsea Clinton ដោយផ្អែកលើការសម្រេចចិត្តរបស់លោកស្រីក្នុងនាមជារដ្ឋមន្ត្រីក្រសួងការបរទេស៕
