លោក Jeff Sessions ដែលជាបេក្ខជននៃតំណែងរដ្ឋមន្ត្រីក្រសួងយុត្តិធម៌ បាននិយាយថា៖ «អស់លោក លោកស្រីស្គាល់ខ្ញុំស្រាប់ហើយ ហើយអស់លោក លោកស្រីដឹងពីអ្វីដែលខ្ញុំមានជំនឿលើ»។
សមាជិកព្រឹទ្ធសភាកំពុងពិចារណាលើបេក្ខភាពនៃសមាជិកព្រឹទ្ធសភាម្នាក់សម្រាប់តំណែងជាមន្ត្រីអនុវត្តច្បាប់កំពូលនៅសហរដ្ឋអាមេរិក។ លោក Jeff Sessions អ្នកដែលបានធ្វើយុទ្ធនាការយ៉ាងខ្លាំងក្លាឲ្យលោក Donald Trump នឹងមានកាតព្វកិច្ចផ្ដល់ការវិភាគឯករាជ្យផ្នែកច្បាប់ដល់លោក Trump។
លោក Chuck Grassley សមាជិកព្រឹទ្ធសភាគណបក្សសាធារណរដ្ឋបានចោទសួរថា៖ «តើលោកនឹងក្រោកឈរ ហើយនិយាយថា «ទេ» ទៅកាន់ប្រធានាធិបតីសហរដ្ឋអាមេរិកដែរឬទេ ប្រសិនបើវាស្ថិតក្រោមការវិនិច្ឆ័យរបស់លោក ស្ថិតនៅក្រោមច្បាប់ និងជាកាតព្វកិច្ចដែលតម្រូវឲ្យលោកធ្វើដូច្នេះ?»
លោក Jeff Sessions ឆ្លើយថា៖ «ជាធម្មតា អ្នកត្រូវជួយប្រធានាធិបតីធ្វើកិច្ចការទាំងឡាយណា ដែលប្រធានាធិបតីប្រហែលជាចង់ធ្វើដោយស្របច្បាប់ ហើយអ្នកត្រូវតែអាចនិយាយថា «ទេ» ដើម្បីប្រទេសជាតិ ដើម្បីប្រព័ន្ធច្បាប់ និងដើម្បីប្រធានាធិបតី»។
លោក Sessions បញ្ជាក់ជាថ្មី ពីការប្រឆាំងរបស់លោកចំពោះច្បាប់រំលូតកូន ប៉ុន្តែលោកទទួលស្គាល់ និងគោរពតាមច្បាប់របស់សហរដ្ឋអាមេរិកដែលបានអនុញ្ញាតឲ្យមានការរំលូតកូន។ លោកបានផ្ដល់ចម្លើយស្រដៀងគ្នាចំពោះការរៀបអាពាហ៍ពិពាហ៍របស់អ្នកស្រឡាញ់ភេទដូចគ្នា។
លោកស្រី DIANNE FEINSTEIN សមាជិកព្រឹទ្ធសភាគណបក្សប្រជាធិបតេយ្យចោទសួរថា៖ «តើលោកយល់ស្របថា បញ្ហានៃការរៀបអាពាហ៍ពិពាហ៍របស់អ្នកស្រឡាញ់ភេទដូចគ្នា ជាច្បាប់ដែលបានបកស្រាយចប់សព្វគ្រប់ទេ?»
លោក Jeff Sessions ឆ្លើយថា៖ «តុលាការកំពូលបានសម្រេចលើរឿងនេះ។ ខ្ញុំនឹងស្របតាមការសម្រេចនេះ»។
រំខានដោយអ្នកតវ៉ាជារឿយៗ លោក Sessions ត្រូវបានគេសួរពីការសន្យាផ្សេងៗក្នុងពេលធ្វើយុទ្ធនាការរបស់លោក Trump។
សមាជិកព្រឹទ្ធសភាគណបក្សប្រជាធិបតេយ្យ លោក Partrick Leahy លើកឡើងថា៖
«ប្រធានាធិបតីជាប់ឆ្នោតបានអះអាងម្តងហើយម្តងទៀតពីគោលបំណងរបស់លោកក្នុងការហាមប្រាមជនអន្តោប្រវេសន៍ឥស្លាមមិនឲ្យ ចូលមកក្នុងទឹកដីសហរដ្ឋអាមេរិក»។
លោក Jeff Sessions ឆ្លើយតបថា៖ «ខ្ញុំមិនជឿរឿងនេះទេ ហើយក៏មិនគាំទ្រគំនិតដែលថា ក្រុមប្រជាជនដែលកាន់សាសនាឥស្លាម គួរតែត្រូវបានបដិសេធមិនឲ្យចូលទឹកដីអាមេរិកដែរ»។
លោក Trump បានសន្យាបញ្ចប់ការធ្វើអន្តោប្រវេសន៍ខុសច្បាប់មកកាន់សហរដ្ឋអាមេរិក និងកែប្រែបទបញ្ជាប្រតិបត្តិរបស់លោកប្រធានាធិបតីអូបាម៉ា ដែលការពារជនអន្តោប្រវេសន៍ខុសច្បាប់រាប់លាននាក់ពីការនិរទេសខ្លួន។ លោក Sessions យល់ថា គ្មានអ្វីខុសទេចំពោះការសន្យាទាំងពីរនេះ។
លោក Sessions ថ្លែងថា៖ «ខ្ញុំជឿជាក់យ៉ាងមុតមាំថា ប្រសិនបើអ្នកបន្តជាមួយវដ្ដនៃការលើកលែងទោស នោះអ្នកមើលស្រាលការគោរពច្បាប់ ព្រមទាំងលើកទឹកចិត្តឲ្យមានការធ្វើអន្តោប្រវេសន៍ខុសច្បាប់នៅអាមេរិក។ ខ្ញុំជឿថាពលរដ្ឋអាមេរិកបាននិយាយយ៉ាងច្បាស់តាមរយៈការបោះឆ្នោតជ្រើសរើសប្រធានាធិបតីកន្លងទៅនេះ»។
ក្រុមអ្នកការពារសិទ្ធិមនុស្សតវ៉ាប្រឆាំងនឹងលោក Sessions និងបាននិយាយថាលោកមិនសមធ្វើជារដ្ឋមន្ត្រីក្រសួងយុត្តិធម៌ទេ។
សកម្មជនសិទ្ធិមនុស្ស លោក William Barber និយាយថា៖ «គោលនយោបាយ និងតួនាទីរបស់លោក គឺជាគូបដិបក្ខ និងជាការប្រមាថមើលងាយយ៉ាងខ្លាំងដល់តម្លៃរដ្ឋធម្មនុញ្ញរបស់យើង»។
ប៉ុន្តែអ្នកផ្សេងទៀតការពារលោក។ មេដឹកនាំព្រះវិហារគ្រិស្តសាសនាមួយនៅរដ្ឋធានីវ៉ាស៊ីនតោន លោក Harry Jackson បាននិយាយថា៖ «លោកសមាជិកព្រឹទ្ធសភា Sessions មិនរើសអើងជាតិសាសន៍ទេ។ លោកបានបញ្ចប់ការបែកចែកពណ៌សម្បុរក្នុងសាលារៀន នៅរដ្ឋ Alabama ដែលជាបញ្ហាដ៏ធំមួយ។ លើសពីនេះលោកក៏បាន ជ្រោមជ្រែងឲ្យមានការកាត់ទោសប្រហារជីវិតឃាតកដែលជាសមាជិករបស់ក្រុម KKK ផងដែរ»។
លោកសមាជិកព្រឹទ្ធសភា LINDSEY GRAHAM មកពីគណបក្សសាធារណរដ្ឋ ចោទសួរថា៖ «មនុស្សមួយចំនួនព្យាយាមលាបពណ៌លោកថា លោកជាអ្នករើសអើងជាតិសាសន៍ ជាអ្នកដែលគិតថាខ្លួនឯងត្រូវរហូត ឬជាអ្វីផ្សេងៗទៀតតាមតែគេថា។ តើលោកមានអារម្មណ៍យ៉ាងណាដែរ?
ចម្លើយរបស់លោក Sessions គឺ៖ «ខ្ញុំប្ដេជ្ញាយ៉ាងមុតមាំក្នុងការរក្សានូវសេរីភាព និងសមភាព ដែលប្រទេសនេះផ្ដល់ឲ្យប្រជាពលរដ្ឋគ្រប់រូប»។
សមាជិកសភាអាមេរិកស្បែកខ្មៅជាច្រើនរូប រំពឹងថា នឹងផ្ដល់សក្ខីកម្មប្រឆាំងលោក Sessions នៅចុងសប្ដាហ៍នេះ ខណៈពេលដែលសវនាការកំពុងបន្ត៕
ប្រែសម្រួលដោយ សឿន វឌ្ឍនា
