នៅក្នុងដំណើរដ៏គួរឲ្យភ្ញាក់ផ្អើលមួយ តំណាងរាស្ត្រអាមេរិកាំងដើមកំណើតអាហ្វ្រិកខាងគណបក្សប្រជាធិបតេយ្យដ៏សំខាន់ម្នាក់ បានផ្តល់សក្ខីកម្មកាលពីថ្ងៃពុធប្រឆាំងនឹងការតែងតាំងអ្នករួមការងាររបស់ខ្លួន គឺលោក Jeff Sessions សមាជិកព្រឹទ្ធសភាខាងគណបក្សសាធារណរដ្ឋ។ លោក Jeff Sessions ត្រូវបានលោកប្រធានាធិបតីជាប់ឆ្នោត Donald Trump តែងតាំងឲ្យធ្វើជារដ្ឋមន្ត្រីក្រសួងយុត្តិធម៌។
សមាជិកព្រឹទ្ធសភារដ្ឋ New Jersey ខាងគណបក្សប្រជាធិបតេយ្យ លោក Cory Booker បានមានប្រសាសន៍ថា «ប្រសិនបើត្រូវតែងតាំងជាផ្លូវការ លោកសមាជិកព្រឹទ្ធសភា Sessions នឹងត្រូវតម្រូវឲ្យស្វែងរកយុត្តិធម៌ឲ្យស្ត្រី ប៉ុន្តែកំណត់ត្រាអំពីប្រវត្តិរបស់លោកបង្ហាញថា លោកនឹងមិនធ្វើដូច្នោះទេ»។ លោក Booker បានថ្លែងយ៉ាងដូច្នេះនៅចំពោះមុខគណៈកម្មាធិការអង្គចៅក្រមព្រឹទ្ធសភា ដែលពិចារណាទៅលើការតែងតាំងលោក Sessions។
លោក Booker បានថ្លែងបន្តទៀតថា «លោក [Sessions] នឹងត្រូវគេរំពឹងថានឹងការពារសិទ្ធិស្មើគ្នារបស់ប្រជាពលរដ្ឋអាមេរិកាំងដែលស្រឡាញ់ភេទដូចគ្នា និងអ្នកប្ដូរភេទ ប៉ុន្តែប្រវត្តិរបស់លោកបង្ហាញថា លោកនឹងមិនធ្វើដូច្នេះនោះទេ។ លោកនឹងត្រូវតម្រូវឲ្យការពារសិទ្ធិបោះឆ្នោត ប៉ុន្តែប្រវត្តិរបស់លោកបង្ហាញថា លោកនឹងមិនធ្វើដូច្នេះទេ»។
ក្រោយមក សមាជិកសភាខាងគណបក្សប្រជាធិបតេយ្យ លោក John Lewis ដែលជានិមិត្តរូបនៃចលនាសិទ្ធិស៊ីវិល បានមានប្រសាសន៍ថា សហរដ្ឋអាមេរិកបានបោះជំហានទៅមុខយ៉ាងខ្លាំងឆ្ពោះទៅរកសមភាពនិងយុត្តិធម៌ «ប៉ុន្តែយើងមិនទាន់សម្រេចបានគោលដៅរបស់យើងនៅឡើយទេ។ យើងចង់បោះជំហានទៅមុខទៀត»៕
