ក្រុមមេធាវីរបស់អតីតប្រធានាធិបតីសហរដ្ឋអាមេរិកលោក Donald Trump បានស្នើតុលាការកំពូលសហរដ្ឋអាមេរិកកាលពីថ្ងៃអង្គារឱ្យដោះស្រាយលើវិវាទផ្នែកផ្លូវច្បាប់ទាក់ទិននឹងបណ្ដុំឯកសារសម្ងាត់ដែលទីភ្នាក់ងារសហព័ន្ធស៊ើបអង្កេត (FBI) បានរឹបអូសនៅក្នុងការឆែកឆេរលើភូមិគ្រឹះរបស់លោក Trump នៅរដ្ឋ Florida កាលពីថ្ងៃទី ៨ ខែសីហាកន្លងទៅនេះ។
ក្រុមមេធាវីរបស់លោក Trump បានស្នើចៅក្រមតុលាការកំពូលឱ្យច្រានចោលសេចក្ដីសម្រេចរបស់តុលាការឧទ្ធរណ៍សហរដ្ឋអាមេរិកតំបន់ទី ១១ និងអនុញ្ញាតឱ្យមជ្ឈត្តករដែលគេហៅថាជាអ្នកជំនាញពិសេសឱ្យពិនិត្យលើឯកសារប្រមាណ ១០០ ដែលដាក់ស្លាកថាជាឯកសារសម្ងាត់ដែលរឹបអូសបានពីភូមិគ្រឹះរបស់លោក។
ក្រុមចៅក្រមដែលមានសមាជិក ៣ រូប នៃតុលាការឧទ្ធរណ៍សហរដ្ឋអាមេរិកតំបន់ទី ១១ កាលពីខែមុនបានដាក់កំហិតឱ្យអ្នកជំនាញពិសេសនោះអាចត្រួតពិនិត្យបានតែលើឯកសារដែលមិនសម្ងាត់តែប៉ុណ្ណោះ។ ក្រុមចៅក្រមនេះបានយល់ស្របតាមការអះអាងរបស់ក្រសួងយុត្តិធម៌ដែលថាមិនមានមូលដ្ឋានច្បាប់ណាមួយសម្រាប់ឱ្យអ្នកជំនាញពិសេសនោះអាចធ្វើការត្រួតពិនិត្យលើឯកសារសម្ងាត់ទាំងនោះបានដោយខ្លួនឯង។
ប៉ុន្តែ ក្រុមមេធាវីរបស់លោក Trump បានលើកឡើងនៅក្នុងឯកសារដែលដាក់ជូនតុលាការកំពូលថា វាគឺជារឿងចាំបាច់ដែលអ្នកជំនាញពិសេសនោះអាចមានលទ្ធភាពពិនិត្យមើលឯកសារសម្ងាត់ទាំងនោះបាន ដើម្បី «កំណត់ថាតើឯកសារដែលដាក់ស្លាកថាជាឯកសារសម្ងាត់នោះពិតជាឯកសារសម្ងាត់មែនឬក៏អត់ ហើយទាក់ទិននឹងរឿងឯកសារសម្ងាត់នេះ ថាតើឯកសារទាំងនោះគឺជាទិន្នន័យផ្ទាល់ខ្លួនឬក៏ជាទិន្នន័យរបស់ប្រធានាធិបតី»។
ក្រុមមេធាវីរបស់លោក Trump បានបញ្ជាក់នៅក្នុងឯកសារដាក់ជូនតុលាការនោះទៀតថា៖ «ដោយសារតែលោក Trump មានអំណាចទាំងស្រុងលើការសម្រេចរឿងឯកសារសម្ងាត់នៅក្នុងអំឡុងពេលលោកធ្វើជាប្រធានាធិបតី ស្ថានភាពបច្ចុប្បន្ននៃឯកសារណាមួយដែលមានវិវាទមិនអាចត្រូវបានកំណត់ដោយយោងទៅលើស្លាកនៅលើឯកសារនោះតែឯកឯងបានទេ»៕
