ក្រសួងយុត្តិធម៌សហរដ្ឋអាមេរិក កាលពីថ្ងៃព្រហស្បតិ៍ បានស្នើសុំចៅក្រមសហព័ន្ធឱ្យផ្អាកផ្នែកខ្លះនៃបទបញ្ជាថ្មីៗ ដែលអនុញ្ញាតឱ្យតែងតាំងអ្នកគ្រប់គ្រងពិសេសសម្រាប់ឯកសារដែលយកពីលំនៅដ្ឋានរបស់អតីតប្រធានាធិបតីអាមេរិកលោក Donald Trump ក្នុងរដ្ឋ Florida និងហាមរដ្ឋអាជ្ញាមិនឱ្យមើលឯកសារសម្ងាត់ ខណៈកំពុងមានការត្រួតពិនិត្យដោយឯករាជ្យនោះ។
ដោយនិយាយថា ការស៊ើបអង្កេតរបស់ការិយាល័យសហព័ន្ធស៊ើបអង្កេត (FBI)អំពីការចាត់ចែងរបស់លោក Trump លើឯកសារសម្ងាត់កំពុងត្រូវបានរារាំងដោយសេចក្តីសម្រេចនោះ មេធាវីរបស់ក្រសួងយុត្តិធម៌បានជូនដំណឹងទៅចៅក្រមសាលាដំបូងសហព័ន្ធ លោកស្រី Aileen Cannon ថា ពួកគេមានគម្រោងប្តឹងឧទ្ធរណ៍លើសេចក្តីសម្រេចរបស់លោកស្រី ប្រសិនបើលោកស្រីមិនផ្តល់ការអនុញ្ញាតឱ្យពួកគេបន្តការងាររបស់គេត្រឹមថ្ងៃព្រហស្បតិ៍សប្តាហ៍ក្រោយទេនោះ។ ពួកគេបានសរសេរថា «បើគ្មានការត្រួតពិនិត្យទេនោះ រដ្ឋាភិបាល និងសាធារណជននឹងរងគ្រោះថ្នាក់ដែលមិនអាចជួសជុលបាន»។
មន្ត្រីក្រសួងយុត្តិធម៌បានសរសេរថា ជាមួយនឹងការត្រួតពិនិត្យមើល អ្នកគ្រប់គ្រងពិសេស ឬភាគីខាងក្រៅនោះនឹងអាចមើលកំណត់ត្រាមិនសម្ងាត់ដែលត្រូវបានរឹបអូសដោយ FBI រួមទាំងរបស់របរផ្ទាល់ខ្លួន និងព័ត៌មានរបស់លោក Trump ដែលការពារដោយសិទ្ធិមេធាវីការពារកូនក្តី។ ឯកសារនេះចុះហត្ថលេខាដោយលោក Juan Antonio Gonzalez មេធាវីសហរដ្ឋអាមេរិក លោក Jay Bratt រដ្ឋអាជ្ញាសហព័ន្ធ ដែលជាមន្ត្រីយុត្តិធម៌កំពូលប្រឆាំងការស៊ើបការណ៍ និងលោក Matthew Olsen ប្រធានផ្នែកសន្តិសុខជាតិនៃក្រសួងយុត្តិធម៌។
ក្នុងអំឡុងពេលនៃឆែកឆេរកាលពីថ្ងៃទី៨ ខែសីហា នៅតំបន់រមនីយដ្ឋាន Mar-a-Lago របស់លោក Trump ក្នុងរដ្ឋ Floridaនោះ ភ្នាក់ងារ FBI បានដកយកឯកសារ និងរបស់របរជិត ១ម៉ឺន៣ពាន់។ ក្នុងចំណោមឯកសារទាំងនោះ មានឯកសារជាង១០០ ជាឯកសារសម្ងាត់ដោយខ្លះមានស្លាកថា ជា«ឯកសារសម្ងាត់បំផុត»។ ក្រសួងយុត្តិធម៌នឹងផ្តល់ឱ្យក្រុមរបស់លោក Trump នូវច្បាប់ចម្លងនៃឯកសារមិនសម្ងាត់ទាំងអស់ដែលដកហូតក្នុងអំឡុងពេលនៃការឆែកឆេរ ហើយប្រគល់ឱ្យលោក Trump វិញនូវរបស់របរដែល«មិនទាក់ទងឯកសារសម្ងាត់»។
មន្ត្រីយុត្តិធម៌បានសរសេរនៅក្នុងឯកសាររបស់ពួកគេថា ការរារាំងមិនឱ្យរដ្ឋអាជ្ញាទទួលបានកំណត់ត្រាសម្ងាត់ជាង១០០ក៏ជាការរារាំងការពិនិត្យមើលចំណាត់ថ្នាក់ឯកសារ និងការរារាំងការវាយតម្លៃអំពីសន្តិសុខជាតិនៃឯកសារនោះផងដែរ។
ក្រៅពីមានតួនាទីជាទីភ្នាក់ងារពង្រឹងច្បាប់ FBI គឺជាផ្នែកមួយនៃផ្នែកស៊ើបការណ៍សម្ងាត់របស់សហរដ្ឋអាមេរិកផងដែរ។ FBI កំពុងស៊ើបអង្កេតការរំលោភជាច្រើនដែលអាចកើតមានផ្នែកព្រហ្មទណ្ឌ ទាក់ទងនឹងការរក្សាទុកឯកសារដោយលោក Trump ជាងមួយឆ្នាំ បន្ទាប់ពីលោកបានចប់តំណែងជាប្រធានាធិបតីនៅសេតវិមាន៕
