មន្ត្រីក្នុងរដ្ឋPennsylvania អាចប្រកាសលទ្ធផលផ្លូវការនៃការបោះឆ្នោតនៅក្នុងរដ្ឋនេះបាន ដែលនៅពេលបច្ចុប្បន្ននេះបង្ហាញថា លោក Joe Biden ខាងគណបក្សប្រជាធិបតេយ្យ ជាអ្នកឈ្នះលោកប្រធានាធិបតី Donald Trump នៅក្នុងរដ្ឋនេះ ជាង ៨ ម៉ឺនសំឡេង។ នេះបើយោងតាមសាលក្រមរបស់តុលាការសហព័ន្ធមួយកាលពីថ្ងៃសៅរ៍។ ការសម្រេចនេះបានបង្អាក់មួយទៀតដល់កិច្ចប្រឹងប្រែងរបស់យុទ្ធនាការរបស់លោក Trump ដែលចង់ធ្វើឲ្យការបោះឆ្នោតនេះគ្មានសុពលភាព។
លោក Matthew Brann ចៅក្រមតុលាការសហព័ន្ធប្រចាំក្រុង Williamsport រដ្ឋ Pennsylvania បានច្រានចោលពាក្យបណ្ដឹងរបស់យុទ្ធនាការលោក Trump។ នៅក្នុងសាលក្រមនោះ លោក Brann បាននិយាយថា យុទ្ធនាការរបស់លោក Trump បានបង្ហាញ «អំណះអំណាងផ្លូវច្បាប់ដែលមិនត្រឹមត្រូវ និងការចោទប្រកាន់បែបប៉ាន់ស្មាន... ដោយគ្មានភស្តុតាង»។
សាលក្រមរបស់តុលាការបានបញ្ជាក់ថា៖ «នៅក្នុងសហរដ្ឋអាមេរិក អំណះអំណាងនេះមិនមែនជាហេតុផលគ្រប់គ្រាន់នៅក្នុងការដកសិទ្ធិបោះឆ្នោតរបស់ពលរដ្ឋណាម្នាក់បានទេ នេះមិនចាំបាច់និយាយដល់ពលរដ្ឋទាំងអស់នៅក្នុងរដ្ឋ Pennsylvania ដែលជារដ្ឋមានប្រជាពលរដ្ឋច្រើនបំផុតទី ៦ នៅក្នុងសហរដ្ឋអាមេរិកផង។ ពលរដ្ឋ ច្បាប់ និងស្ថាប័នរបស់យើងទាមទារឲ្យមាន [ភស្តុតាង] ច្រើនជាងនេះ»។
លោក Rudy Giuliani ដែលជាមេធាវីផ្ទាល់ខ្លួនរបស់លោក Trump និងអ្នកស្រី Jenna Ellis ដែលជាទីប្រឹក្សាជាន់ខ្ពស់ផ្នែកច្បាប់របស់យុទ្ធនាការបោះឆ្នោតរបស់លោក Trump បានចាត់ទុកសេចក្ដីសម្រេចនេះថាជាដំណើរវិវត្តន៍វិជ្ជមានមួយនៅក្នុងកិច្ចខិតខំប្រឹងប្រែងរបស់ពួកគេនៅក្នុងការជំរុញឲ្យមានការបញ្ជូនពាក្យបណ្ដឹងនេះកាន់តែលឿនទៅកាន់តុលាការកំពូល។
នៅក្នុងសេចក្ដីថ្លែងការណ៍រួមគ្នាមួយ ពួកគេបាននិយាយថា ពួកគេនឹងព្យាយាមស្វែងរកវិធីពន្លឿនពាក្យបណ្ដឹងនេះទៅកាន់តុលាការឧទ្ធរណ៍សហព័ន្ធមណ្ឌលទី ៣ របស់សហរដ្ឋអាមេរិក។
លោក Trump បានអះអាងថា ការការពារដោយស្មើគ្នានៅក្រោមច្បាប់ដែលធានាដោយរដ្ឋធម្មនុញ្ញសហរដ្ឋអាមេរិក ត្រូវបានបំពាននៅពេលដែលស្រុកនានានៅក្នុងរដ្ឋ Pennsylvania ប្រើវិធីសាស្ត្រផ្សេងគ្នានៅក្នុងការជូនដំណឹងដល់អ្នកបោះឆ្នោតនៅមុនការបោះឆ្នោត អំពីបញ្ហាបច្ចេកទេសទាក់ទិននឹងសន្លឹកឆ្នោតរបស់ពួកគេដែលផ្ញើតាមប្រៃសណីយ៍។
អ្នកស្រី Kathy Boockvar លេខាធិការរដ្ឋ Pennsylvania និងស្រុកចំនួន ៧ ដែលលោក Biden នាំមុខនៅក្នុងរដ្ឋ Pennsylvania ដែលយុទ្ធនាការរបស់លោក Trump បានប្ដឹង បានអះអាងថា លោក Trump ធ្លាប់បានអះអាងស្រដៀងគ្នានេះដែរកាលពីលើកមុន និងបានចាញ់រួចមកហើយ៕
