ទីភ្នាក់ងារព័ត៌មាន AP បានរាយការណ៍នៅថ្ងៃសុក្រថា ប្រធានាធិបតីអាមេរិកលោក Donald Trump និងសម្ព័ន្ធមិត្តរបស់លោកកំពុងចាត់វិធានការដ៏ក្រហល់ក្រហាយឡើង ដើម្បីកែប្រែលទ្ធផលនៃការបោះឆ្នោតឆ្នាំ២០២០ ដោយរួមមានការកោះហៅអ្នកតាក់តែងច្បាប់ថ្នាក់រដ្ឋទៅសេតវិមាន ដែលជាផ្នែកមួយនៃការប្រឹងប្រែងដ៏លំបាកដើម្បីកែប្រែជ័យជម្នះរបស់គូប្រជែងលោក Joe Biden។
ក្នុងចំណោមយុទ្ធសាស្ត្រចុងក្រោយ គឺការកោះហៅមន្ត្រីរៀបចំការបោះឆ្នោតក្នុងតំបន់ដោយផ្ទាល់ដើម្បីព្យាយាមលុបចោលការបញ្ជាក់របស់គេអំពីសន្លឹកឆ្នោតនៅរដ្ឋ Michigan ការលើកឡើងនៅក្នុងការប្រឈមផ្នែកច្បាប់ដែលថា រដ្ឋ Pennsylvania គួរទុកសន្លឹកឆ្នោតសរុបឲ្យនៅដោយឡែក និងដាក់សម្ពាធឲ្យមន្រ្តីសង្កាត់បោះឆ្នោតនៅរដ្ឋ Arizona ពន្យារពេលការបញ្ជាក់ចំនួនសន្លឹកឆ្នោតសរុប។
មេធាវីផ្ទាល់ខ្លួនរបស់លោក Trump គឺលោក Rudy Giuliani និងអ្នកផ្សេងទៀតបានធ្វើសន្និសីទកាសែតមួយកាលពីថ្ងៃព្រហស្បតិ៍ ដើម្បីចោទប្រកាន់ថាមានការឃុបឃិតជាច្រើនរបស់គណបក្សប្រជាធិបតេយ្យក្នុងការបោះឆ្នោតដែលពាក់ព័ន្ធនឹងរដ្ឋជាច្រើននិងការសង្ស័យលើម៉ាស៊ីនបោះឆ្នោត។
ប៉ុន្តែមន្ត្រីបោះឆ្នោតនៅទូទាំងប្រទេសបាននិយាយម្តងហើយម្តងទៀតថា មិនមានការបន្លំទ្រង់ទ្រាយធំទេ។
អ្នកជំនាញច្បាប់បោះឆ្នោតយល់ឃើញថា នេះជាការព្យាយាមនៅដង្ហើមចុងក្រោយនៃយុទ្ធនាការរបស់លោក Trump ហើយនិយាយថា លោក Biden ប្រាកដជាដើរចូលទៅក្នុងការិយាល័យប្រធានាធិបតីនៅសេតវិមាន នៅខែមករា។
ប៉ុន្តែមានការព្រួយបារម្ភយ៉ាងខ្លាំងថា ការខិតខំប្រឹងប្រែងរបស់លោក Trump កំពុងធ្វើឱ្យខូចខាតយ៉ាងពិតប្រាកដដល់ជំនឿសាធារណៈលើភាពសុចរិតនៃប្រព័ន្ធបោះឆ្នោតរបស់សហរដ្ឋអាមេរិក។
លោក Mitt Romney សមាជិកព្រឹទ្ធសភាគណបក្សសាធារណរដ្ឋពីរដ្ឋ Utah ដែលជាអ្នកសាធារណរដ្ឋម្នាក់ដែលរិះគន់លោក Trump ខ្លាំងបំផុតបានចោទថា លោក Trump ព្យាយាមដាក់សម្ពាធលើមន្រ្តី ថ្នាក់រដ្ឋនិងថ្នាក់ក្រោមដើម្បី «បង្វែរឆន្ទៈរបស់ប្រជាជននិងប្រែក្រឡះការបោះឆ្នោត»។
លោក Romney បានបន្ថែមថា៖ «គេពិបាកស្រមៃឃើញថាអាចមានសកម្មភាពអាក្រក់និងមិនប្រជាធិបតេយ្យជាងនេះ ដែលធ្វើឡើងដោយប្រធានាធិបតីអាមេរិកដែលកំពុងកាន់តំណែងនោះ»។
ទីភ្នាក់ងារសន្តិសុខការបោះឆ្នោតផ្ទាល់របស់លោក Trump បានប្រកាសថា ការបោះឆ្នោតប្រធានាធិបតីឆ្នាំ ២០២០ នេះមានសុវត្ថិភាពបំផុតក្នុងប្រវត្តិសាស្ត្រ។ ប៉ុន្មានថ្ងៃបន្ទាប់ពីចេញសេចក្តីថ្លែងការណ៍នោះ លោក Trump បានបណ្តេញប្រធានទីភ្នាក់ងារនេះពីតំណែង៕