លោក Donald Trump អ្នកនាំមុខបេក្ខជនប្រធានាធិបតីខាងគណបក្សសាធារណរដ្ឋ កំពុងបានទទួលការស្តីបន្ទោសទូទាំងពិភពលោក ចំពោះការសើ្នហាមឃាត់ទាំងស្រុងមិនឲ្យអ្នកកាន់សាសនាឥស្លាមចូលក្នុងសហរដ្ឋអាមេរិក រហូតទាល់តែមេដឹកនាំអាមេរិកអាចរកឃើញពីអ្វីដែលកំពុងកើតមានឡើងពីការវាយប្រហារភេរវកម្មនៅពេលថ្មីៗនេះ។
នាយករដ្ឋមន្រ្តី David Cameronនៃប្រទេសអង់គ្លេស បានហៅផែនការរបស់លោក Trump ថា ជាការបំបែកបំបាក់ មិនបានជួយអ្វីហើយខុសទាំងស្រុង។
ស្រ្តីអ្នកនាំពាក្យរបស់ទីភ្នាក់ងារទទួលបន្ទុកជនភៀសខ្លួនរបស់អង្គការសហប្រជាជាតិដែលតាំងទីលំនៅថ្មីក្នុងសហរដ្ឋអាមេរិក រួមមានអ្នកកាន់សាសនាជាតិស៊ីរីផង បាននិយាយកាលពីថ្ងៃអង្គារនៅក្នុងទីក្រុងហ្សឺណែវថា ការណ៍នេះ ជាការព្រួយកង្វល់ដែលវោហាសាស្រ្តនេះ ត្រូវបានប្រើប្រាស់នៅក្នុងយុទ្ធនាការឃោសនាបោះឆ្នោតដែលកំពុងដាក់កម្មវិធីតាំងទៅលំនៅថ្មីឲ្យស្ថិតក្នុងភាពគ្រោះថ្នាក់នោះ។
លោក Keysar Trad ប្រធានសមាគមមិត្តភាពឥស្លាមដែលមានទីតាំងក្នុងទីក្រុងស៊ីដនីនៃប្រទេសអូស្រ្តាលី បានហៅការអត្ថាធិប្បាយរបស់លោកTrumpថា «ជាសេចក្តីថ្លែងការណ៍ប្រកបដោយការអស់សង្ឃឹមរបស់មនុស្សអស់សង្ឃឹម ដែលដឹងថាលោក កំពុងអស់ផ្លូវដើរហើយនឹងគ្មានឱកាសនឹងបានទទួលជ័យជម្នះនៅក្នុងការបោះឆ្នោត។ដូច្នេះ លោក Trumpកំពុងព្យាយាមឲ្យបានទទួលការគាំទ្រពីអ្នកខ្លាចឥស្លាម»។
គូប្រកួតប្រជែងខាងនយោបាយរបស់លោក Trump នៅក្នុងសហរដ្ឋអាមេរិក បានថ្កោលទោសយ៉ាងខ្លាំងដល់សំណើររបស់លោកហើយអ្នកជំនាញច្បាប់ បានប្រាប់បណ្តាញព័ត៌មានថា ការហាមឃាត់អ្នកកាន់សាសនាអ៊ីស្លាមមិនឲ្យចូលក្នុងសហរដ្ឋអាមេរិក គឺខុសនឹងរដ្ឋធម្មនុញ្ញ៕
