ការិយាល័យស៊ើបអង្កេតសហព័ន្ធ ឬ FBI របស់អាមេរិកនិយាយថា អាជ្ញាធរជឿថា ជនសង្ស័យទាំងពីរនាក់ប្តីប្រពន្ធដែលបានបាញ់សម្លាប់រង្គាលនៅក្រុង San Bernardino រដ្ឋកាលីហ្វរញ៉ា កាលពីសប្តាហ៍មុននោះ បានទទួលឥទ្ធិពលមនោគមវិជ្ជាជ្រុលនិយម «មួយរយៈពេលមកហើយ»។ FBI និយាយថា មានភស្តុតាងបញ្ជាក់ថា ពួកគេទាំងពីរនាក់បានរៀបចំការវាយប្រហារដ៏ផ្តាច់ផ្តិលជីវិតនោះ ទុកជាមុនរួចស្រេចទៅហើយ។
លោក David Bowdich នាយករងទីភ្នាក់ងារ FBI ទទួលបន្ទុកបេសកម្មនៅក្រុងLos Angeles បានថ្លែងប្រាប់ក្រុមអ្នកយកព័ត៌មានកាលពីថ្ងៃចន្ទថា ជនសង្ស័យនៃការបាញ់ប្រហារនោះដែលប្តីឈ្មោះ Syed Rizwan Farook កើតនៅសហរដ្ឋអាមេរិក និងប្រពន្ធឈ្មោះ Tashfeen Malik ជនជាតិប៉ាគីស្ថាននោះ បានចូលរួមនៅក្នុងការសមតម្រង់គោលដៅតែប៉ុន្មានថ្ងៃប៉ុណ្ណោះមុនពេលបើកការវាយប្រហារនោះ។
លោក David Bowdich និយាយថា FBI នៅកំពុងស៊ើបអង្កេតថាតើប្តីប្រពន្ធមួយគូរនោះ បានរៀបចំផែនការវាយប្រហារនេះតាំងពីពេលណាមក។ ប៉ុន្តែលោកបន្ថែមថា រហូតមកដល់ពេលនេះ នៅមិនទាន់មានភស្តុតាងបញ្ជាក់ថា ប្តីប្រពន្ធនោះគឺជាផ្នែកមួយនៃផែនការវាយប្រហារពីបរទេសណាមួយនៅឡើយទេ។
លោក David Bowdich និយាយថា ក្រុមអ្នកស៊ើបអង្កេតកំពុងព្យាយាមកំណត់ ថាតើអ្នកបាញ់ប្រហារទាំងពីរនាក់ប្តីប្រពន្ធនោះ ទទួលមនោគមវិជ្ជាជ្រុលនិយមពីនរណាគេ នៅពេលណា ហើយដោយរបៀបណា៕
