ជាធម្មតាមន្រ្តីទទួលបន្ទុកពាក្យសុំសិទ្ធិជ្រកកោនត្រូវរង់ចំណាយរយៈពេលប្រហែល៤៨ម៉ោង ដើម្បីធ្វើការសម្ភាសន៍ និងរង់ចាំស្តាប់លទ្ធផលករណីសុំសិទ្ធិជ្រកកោនរបស់ជនអន្តោប្រវេសន៍ដែលត្រូវបានជាប់ឃុំបន្ទាប់ពីឆ្លងចូលមកទឹកដីសហរដ្ឋអាមេរិក។
ទោះជាយ៉ាងណាក៏ដោយ នាយកស្តីទីទីភ្នាក់ងារសេវាកម្មចូលសញ្ជាតិ និងអន្តោប្រវេសន៍សហរដ្ឋអាមេរិកហៅកាត់ថា USCIS លោក Ken Cuccinelli បានបញ្ជាឲ្យក្រុមមន្រ្តីធ្វើការសម្ភាសន៍ជនអន្តោប្រវេសន៍ដែលជាប់ឃុំក្នុងរយៈពេល២៤ម៉ោង។ គេហទំព័រព័ត៌មាន Buzzfeedបានរាយការណ៍ថា ខ្លួនបានទទួលបទបញ្ជាថតចម្លងមួយច្បាប់ដែលត្រូវបានចេញទៅឲ្យបុគ្គលិករបស់ទីភ្នាក់ងារUSCIS ដែលដំបូងបានរាយការណ៍អំពីការផ្លាស់ប្តូរនៅក្នុងគោលនយោបាយកាលពីថ្ងៃចន្ទ។
VOA បានបញ្ជាក់អះអាងអំពីសេចក្តីរាយការណ៍នោះកាលពីយប់ថ្ងៃចន្ទ។
អ្នកស្រី Jessica Collinsអ្នកនាំពាក្យទីភ្នាក់ងារUSCISបានប្រាប់ VOAថា«នេះគឺជាផ្នែកមួយនៃកិច្ចខំប្រឹងប្រែងរបស់ទីភ្នាក់ងារ ដើម្បីពន្លឿនដំណើរការដាក់ពាក្យសុំសិទ្ធិជ្រកកោនឲ្យកាន់តែឆាប់រហ័សនិងមានប្រសិទ្ធិភាព។ ហេតុដូច្នេះហើយបានជាទីភ្នាក់ងារ USCIS នឹងពន្លឿនដំណើរការត្រួតពិនិត្យពាក្យស្នើសុំនេះឲ្យស្របតាមប្រតិបត្តិការជាក់ស្តែងនាពេលបច្ចុប្បន្ន។
ទោះបីជាអ្នកស្រី Collins មិនបាននិយាយអំពីពេលណាដែលបទបញ្ជាថ្មីនេះនឹងត្រូវចាប់ផ្តើមដំណើរការនោះ អ្នកស្រីបាននិយាយថា«បទបញ្ជាថ្មីនេះនឹងជួយពន្លឿនដល់ដំណើរការដាក់ពាក្យ ក៏ដូចជាជួយទប់ស្កាត់ការរាំងស្ទះនៅក្នុងប្រព័ន្ធនៃការត្រួតពិនិត្យផងដែរ»។
គេហទំព័រ Buzzfeed បានរាយការណ៍ថា ក្រុមអ្នកតស៊ូមតិជឿថា វិធានការណ៍ថ្មីនេះត្រូវបានរំពឹងថានឹងជួយកាត់បន្ថយពេលវេលាសម្រាប់ជនអន្តោប្រវេសន៍ក្នុងការរៀបចំការសម្ភាសន៍របស់ពួកគេ ឬអាចជួយកាត់បន្ថយពេលវេលាធ្វើដំណើរដ៏គ្រោះថ្នាក់។
ការសម្ភាសន៍នេះគឺជាការត្រួតពិនិត្យដំបូងដែលជនអន្តោប្រវេសន៍ត្រូវតែបង្ហាញថា ពួកគេទទួលរងការធ្វើទុក្ខបុកម្នេញ ឬត្រូវបង្ហាញពីភាពភ័យខ្លាចរបស់ពួកគេចំពោះការធ្វើទុក្ខបុកម្នេញនៅក្នុងប្រទេសកំណើតរបស់ពួកគេ។
លោក Aaron Reichlin-Melnick អ្នកវិភាគគោលនយោបាយនៅឯក្រុមប្រឹក្សាអន្តោប្រវេសន៍អាមេរិកបានបង្ហោះសារនៅលើ Twitter ថា«តាមច្បាប់ពួកអ្នកសុំសិទ្ធិជ្រកកោនមានសិទ្ធិពិគ្រោះយោបល់ជាមួយនឹងអ្នកណាម្នាក់ ក្រុមការងារដែលពួកគេជ្រើសរើសមុននឹងសម្ភាសន៍ដើម្បីបង្ហាញពីការភ័យខ្លាចរបស់ពួកគេ ក្នុងរយៈពេល២៤ម៉ោង»។
ស្របពេលជាមួយគ្នានេះទីភ្នាក់ងារ USCIS បានកែប្រែព័ត៌មាននៅក្នុងគេហទំព័ររបស់ខ្លួនដើម្បីបង្ហាញពីការផ្លាស់ប្តូរនេះ។
គេហទំព័របានសរសេថា«ទីភ្នាក់ងារ USCIS តម្រូវឲ្យរង់ចាំយ៉ាងហោចណាស់មួយថ្ងៃពេញ បន្ទាប់ពីបេក្ខជនមកដល់ជំរំឃុំខ្លួន មុននឹងរៀបចំសម្ភាសន៍ ដើម្បីផ្តល់ពេលវេលាឲ្យបេក្ខជនទាក់ទងទៅអ្នកប្រឹក្សារបស់ពួកគេ»។ គេហទំព័រUSCIS បានប្តូរឃា្លដែលពីមុនសរសេរថា«ទីភ្នាក់ងារ USCIS តម្រូវឲ្យរង់ចំាយ៉ាងហោចណាស់៤៨ម៉ោង ដើម្បីទុកពេលឲ្យបេក្ខជនបានសម្រាកពីការធ្វើដំណើរ»៕
ប្រែសម្រួលដោយ ស៊ូ ពេជ្រចិន្តា
