ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានា​ធិបតី​ត្រាំ​ទទួល​ស្គាល់​ថា ​សន្និសីទ​កំពូល​ជាមួយ​មេដឹកនាំ​កូរ៉េខាង​ជើង​ស្ថិត​ក្នុង​ការ​សង្ស័យ


លោក​ប្រធានាធិបតី ដូណាល់ ត្រាំ ថ្លែង​នៅ​ក្នុង​ក្រុង​កិច្ចប្រជុំ​មួយ​ជាមួយ​នឹង​លោក​ប្រធានាធិបតី​កូរ៉េ​ខាង​ត្បូង Moon Jae-In នៅ​ក្នុង​សេតវិមាន កាលពី​ថ្ងៃទី២២ ខែឧសភា ឆ្នាំ២០១៨។

ប្រធានា​ធិបតី​សហរដ្ឋ​អាមេរិក ​ដូណាល់ ​ត្រាំ​បាន​និយាយថា ​សន្និសីទ​កំពូលដែល​បាន​គ្រោង​ធ្វើ​ឡើង​របស់​លោក​ជាមួយ​មេដឹកនាំ​កូរ៉េខាង​ជើង គីម ​ជុង​អ៊ុន ​ប្រហែល​មិន​កើត​មាន​ឡើង​នៅ​ខែក្រោយ​ទេ។

ប្រធានា​ធិបតី​ត្រាំ​បាន​និយាយ​ថា «ប្រសិន​បើ សន្និសីទ​កំពូល​នោះ ​មិន​កើត​មាន​ឡើង​ទេ ​វាប្រហែល​នឹងកើត​មាន​ឡើង​នៅ​ក្រោយ​ទៀត។ សន្និសីទកំពូល​នោះ ​អាច​មិនកើត​មាន​ឡើង​នៅ​ថ្ងៃ​ទី១២ ​ខែ​មិថុនា​ទេ‍»។

ទោះ​យ៉ាង​ណាក៏ដោយ ​ប្រធានា​ធិបតី​ត្រាំ​និយាយ​ទៀត​ថា «មាន​ឱកាស​ល្អ​ដែល​យើង​នឹង​មាន​ជំនួប​នោះ‍»។ លោកត្រាំ​បាន​ហៅ​ការ​ពិភាក្សា​ពី​ដំបូង​រវាង​រដ្ឋបាល​របស់​លោក​និង​ពួក​មន្ត្រី​កូរ៉េខាង​ជើង ​រហូតមក​ទល់​ពេល​នេះ​ថា ជាបទ​ពិសោធន៍​ល្អមួយ‍។

លោក​ត្រាំ​ក៏​បាន​និយាយពី​គីម ​ជុងអ៊ុន​ដែរ​ថា «ខ្ញុំ​គិតថា ​គីម​ ​ជុង​អ៊ុន ​ប្រាកដ​ជា​គិត​គូ​យ៉ាង​ហ្មត់​ចត់​អំពី​ការ​ចរចា​ដែល​គ្រោង​ធ្វើ​ឡើង​នោះ‍»។

​លោក​ប្រធានា​ធិបតី​ត្រាំ​ដែល​និយាយ​នៅ​ក្នុង​ការិយាល័យ​រាង​ពង​ក្រពើ​នៅ​សេត វិមាន​ជាមួយ​ប្រធានា​ធិបតី​កូរ៉េខាង​ត្បូងលោក Moon Jae-in បាន​ពន្យល់​ថា «មាន​លក្ខខណ្ឌ​មួយ​ចំនួន​ដែល​យើង​ចង់​បាន។ ខ្ញុំ​គិតថា យើង​នឹង​ទទួល​បាន​លក្ខខណ្ឌ​ទាំង​អស់​នោះ‍»។

​នៅពេល​ដែល​គេសួរ​អំពី​លក្ខខណ្ឌទាំង​នោះ ​ប្រធានា​ធិបតី​ត្រាំ​បាន​ឆ្លើយ​ថា «ខ្ញុំ​មិន​គួរ​និយាយ​អំពី​បញ្ហា​នេះ​ទេ‍»។ ក៏ប៉ុន្តែ លោក​ប្រធានា​ធិបតី​និយាយ​ទៀត​ថា ​ការ​គ្មាន​អាវុធ​នុយក្លេអ៊ែរ​របស់​កូរ៉េខាងជើង​ត្រូវតែ​កើត​មាន​ឡើង។

កូរ៉េ​ខាង​ជើង​បាន​ប្រាប់​ឲ្យ​ដឹងថា ខ្លួន​ប្រហែល​លុបចោល​ជំនួប​នោះ​បណ្តាល​មក​ពី​ការ​ខ្វែង​គំនិត​លើលក្ខខណ្ឌ​របស់​សហរដ្ឋ​អាមេរិក​ចំពោះ​ការ​គ្មាន​អាវុធ​នុយក្លេអ៊ែរ​ជា​ឯកតោភាគី​នោះ៕

XS
SM
MD
LG