លោកប្រធានាធិបតីត្រាំបាននិយាយក្នុងអំឡុងនៃការថ្លែងសុន្ទរកថាកាលពីព្រឹកថ្ងៃពុធនៅខាងមុខក្រុមប្រឹក្សាសន្តិសុខរបស់អង្គការសហប្រជាជាតិថា «ជាការគួរឲ្យសោកស្តាយ យើងបានរកឃើញថា ចិនបានប៉ុនប៉ងជ្រៀតជ្រែកក្នុងការបោះឆ្នោតនៅខែវិច្ឆិកា ឆ្នាំ២០១៨ខាងមុខដើម្បីប្រឆាំងនឹងរដ្ឋបាលរបស់យើង»។
ប្រធានាធិបតីត្រាំបានថ្លែងទៀតថា «ពួកគេមិនចង់ឲ្យខ្ញុំឈ្នះឆ្នោតទេ ពីព្រោះខ្ញុំជាប្រធានាធិបតីលើកទីមួយដែលជំទាស់ប្រឆាំងចិនអំពីពាណិជ្ជកម្ម។ ហើយយើង នឹងឈ្នះសង្គ្រាមពាណិជ្ជកម្មនេះ។ យើងនឹងឈ្នះទាំងអស់»។
ភ្លាមៗបន្ទាប់ពីកំណត់សម្គាល់របស់ប្រធានាធិបតីត្រាំ រដ្ឋមន្រ្តីការបរទេសចិនបានច្រានចោលការចោទប្រកាន់របស់លោកត្រាំពីការជ្រៀតជ្រែកការបោះឆ្នោតនេះ។
លោករដ្ឋមន្រ្តីការបរទេសចិន វ៉ាង យី បានប្រាប់ពួកអ្នកយកព័ត៌មានថា រដ្ឋាភិបាលក្រុងប៉េកាំងធ្វើទៅតាមគោលការណ៍មិនជ្រៀតជ្រែកកិច្ចការផ្ទៃក្នុងប្រទេសដ៏ទៃហើយបដិសេធពុំសុខចិត្តទទួលយកការចោទប្រកាន់ដ៏អយុត្តិធម៌ប្រឆាំងនឹងចិននេះ។
ខណៈដែលតួនាទីរបស់រុស្ស៊ីក្នុងការជ្រៀតជ្រែកការបោះឆ្នោតឆ្នាំ២០១៦ដើម្បីគាំទ្រប្រធានាធិបតីត្រាំស្ថិតនៅក្នុងការស៊ើបអង្កេតរបស់ស្មាក្តីពិសេស មកទល់ពេលថ្មីៗនេះមិនមានការចោទប្រកាន់ពីការជ្រៀតជ្រែកខាងនយោបាយរបស់ចិនទេ។
រដ្ឋាភិបាលក្រុងប៉េកាំងបានទទួលរងការចោទប្រកាន់ពីការធ្វើសកម្មភាពចារកម្មលួច ចូលក្នុងប្រព័ន្ធកំព្យូទ័រក្រុមហ៊ុនអស់រយៈពេលជាច្រើនឆ្នាំមកហើយៗនៅឆ្នាំ២០១៥បានរងការចោទប្រកាន់ពីការលួចចូលក្នុងប្រព័ន្ធ Database ដែលមានព័ត៌មានបុគ្គលរហូតដល់៤លាននាក់ដែលបានដាក់ពាក្យសុំធ្វើការងារជាមួយរដ្ឋាភិបាលសហរដ្ឋអាមេរិក៕
