ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក​ប្រធានាធិបតី​ត្រាំ​ត្រូវ​បាន​គេ​អម​ភ្លាមៗ​ចេញ​ពី​សន្និសីទ​កាសែត​នៅ​សេតវិមាន​បន្ទាប់ពី​ការ​បាញ់​កាំភ្លើង​នៅ​ក្បែរនោះ


លោក​ប្រធានាធិបតី ដូណាល់ ត្រាំ ត្រូវ​បាន​ស្នើសុំ​ឱ្យ​ចាកចេញ​ពី​បន្ទប់​សន្និសីទ​ព័ត៌មាន​ នៅ​សេតវិមាន កាលពី​ថ្ងៃទី១០ ខែសីហា​ ឆ្នាំ២០២០។

ប្រធានាធិបតី​សហរដ្ឋ​អាមេរិក​លោក​ដូណាល់ ត្រាំ ត្រូវ​បានអង្គរក្ស​ការពារ​ប្រធានាធិបតីសហរដ្ឋ​អាមេរិក​អមភ្លាមៗ​ចេញពី​សន្និសីទ​កាសែត​នៅ​សេតវិមាន​កាលពីរសៀល​ថ្ងៃ​ចន្ទ​ម្សិលមិញ​ពីព្រោះ​តែ​ការ​បាញ់​កាំភ្លើង​នៅ​ជិត​សេតវិមាន។

លោក​ប្រធានាធិបតី​ត្រាំ ដែល​បាន​វិល​ត្រឡប់​មក​កាន់​បន្ទប់​សន្និសីទ​កាសែត​វិញ​ប៉ុន្មាន​នាទី​ក្រោយ​មក​បាន​និយាយ​ថា «មាន​ការ​បាញ់កាំភ្លើង​ពិតប្រាកដ​ហើយ​មាន​មនុស្ស​ត្រូវ​បាន​គេ​ដឹក​ទៅ​កាន់​មន្ទីរពេទ្យ»។

លោក Tom Sullivan ប្រធាន​ផ្នែក​អង្គរក្សការពារ​ប្រធានាធិបតី​បាន​កំណត់​អត្តសញ្ញាណ​ជន​ដែល​ត្រូវ​របួស​ដោយ​គ្រាប់​កាំភ្លើង​នោះ​ថា​ជា​បុរស​មាន​អាយុ​៥១ឆ្នាំ​ដែល​បាន​ដើរ​មក​ជិត​មន្ត្រី​អង្គរក្សការពារ​ប្រធានាធិបតី​ហើយ​បាន​និយាយ​ថា ខ្លួន​មាន​អាវុធ។

លោក Sullivan បាន​និយាយ​ថា «បន្ទាប់​មក​ ជន​សង្ស័យ​រត់​សំដៅ​មក​កាន់​មន្ត្រី​អង្គរក្ស​ការពារ​ប្រធានាធិបតី​យ៉ាង​លឿន ហើយ​បាន​ដក​វត្ថុ​មួយ​ចេញពីខ្លួន។ ហើយ​បន្ទាប់​មក ជន​នោះ​បាន​ឈរ​ក្នុង​ជំហរ​ហាក់ដូចជា​ត្រៀម​បាញ់​កាំភ្លើង»។ មន្ត្រី​អង្គរក្ស​ការពារ​ប្រធានាធិបតី​រូប​នោះ​ក៏បាន​ទាញ​កាំភ្លើង​បាញ់​បុរស​នោះ​ត្រូវ​ដង​ខ្លួន។

ទាំង​មន្ត្រី​អង្គរក្ស​ការពារ​ប្រធានាធិបតី ​និង​បុរស​ដែល​មន្ត្រី​នោះ​បាន​បាញ់​ត្រូវ​បាន​ដឹក​ទៅ​កាន់​មន្ទីរពេទ្យ។ លោក Sullivan មិន​បាន​ឆ្លើយ​សំណួរ​ហើយ​សេចក្តីថ្លែងការណ៍​របស់​លោក​មិន​បាន​បញ្ជាក់​ថា​តើ​បុរស​នោះ​ប្រាកដ​មាន​អាវុធ បាន​បាញ់​ ឬ​ថា​តើ​មន្ត្រីអង្គរក្ស​ការពារ​ប្រធានាធិបតី​នោះ​មាន​របួស​ឬ​ទេ។

តាម​ការិយាល័យ​ពន្លត់​អគ្គិភ័យ​ និង​សង្គ្រោះ​បន្ទាន់​របស់​រដ្ឋធានី​វ៉ាស៊ីនតោន​បាន​ប្រាប់ឱ្យ​ដឹង​ថា ខ្លួន​បាន​ទៅ​ជួយ​មនុស្ស​ដែល​ត្រូវ​បាន​គេបាញ់​ត្រូវ​ដង​ខ្លួន។

ការ​បាញ់​ប្រហារ​នោះ​បាន​កើត​មាន​ឡើង​នៅ​ផ្លូវ១៧ ​និងវិថី​ Pennsylvania ដែល​ជា​ចំណុច​ឆ្លង​កាត់​រវាង​ផ្លូវ​សាធារណៈ​ជាមួយ​ចរាចរណ៍​រថយន្ត​ហើយ​ជា​តំបន់ដែល​មាន​ការ​យាមកាម​ដ៏តឹងរ៉ឹង​នៅ​ជុំវិញ​សេតវិមាន។

ស្នូរ​កាំភ្លើង​២​គ្រាប់​ បាន​ត្រូវ​អ្នក​យក​ព័ត៌មាន​យ៉ាងហោច​ណាស់​ក៏​ម្នាក់​ដែរ​ដែល​បាន​ស្ថិត​នៅ​ក្នុង​បន្ទប់​សន្និសីទ​កាសែតបាន​ឮ៕

XS
SM
MD
LG