ភ្ជាប់​ទៅ​គេហទំព័រ​ទាក់ទង

រថយន្ត​ដឹក​ទំនិញ​ធុន​ធ្ងន់​បើក​ចូល​ទៅ​ក្នុង​ហ្វូង​មនុស្ស​ក្នុង​ទិវា Bastille Day និង​បាន​សម្លាប់​មនុស្ស​អស់​ចំនួន​៨៤​នាក់


បុរស​ម្នាក់​ដើរ​កាត់​បំណែក​នានា​នៅ​តាម​ផ្លូវ​មួយ​ថ្ងៃ​បន្ទាប់​ពី​ឡាន​ធុន​ធ្ងន់​បាន​បុក​ហ្វូង​មនុស្ស​ក្នុង​ល្បឿន​ដ៏​លឿន​ដោយ​បាន​សម្លាប់​មនុស្ស​ជាច្រើន​នាក់ នៅ​ថ្ងៃ​បុណ្យ​ឯករាជ្យ​បារាំង ក្នុង​ក្រុង​នីស កាលពី​ថ្ងៃទី១៥ ខែកក្កដា ឆ្នាំ២០១៦។

អ្នក​បើកបរ​រថយន្ត​ដឹក​ទំនិញ​ធុន​ធ្ងន់​មួយ​គ្រឿង​បាន​សម្លាប់​មនុស្ស​អស់​ចំនួន​៨៤​នាក់ និង​ធ្វើ​ឲ្យ​របួស​ជាង​១០០​នាក់​ផ្សេងទៀត នៅ​ពេល​អ្នកបើកបរ​រថយន្ត​រូប​នោះ​បាន​កាច់​ចង្កូត​រថយន្ត​ជាមួយ​នឹង​ល្បឿន​លឿន​ទៅ​ក្នុង​ហ្វូង​មនុស្ស​នៅ​ក្នុង​ទីក្រុង នីស កាល​ពី​យប់​ថ្ងៃ​ព្រហស្បតិ៍​ម៉ោង​ក្នុង​ប្រទេស​បារាំង ដើម្បី​ប្រារព្ធ​ពិធី​បុណ្យ Bastille ដែល​ជា​ទិវា​ឯករាជ្យ​របស់​បារាំង។ ​

អ្នក​វាយ​ប្រហារ​នោះ​គឺ​បាន​បើក​រថយន្ត​បាន​ចម្ងាយ​២​គីឡូម៉ែត្រ​ទៅ​ក្នុង​ហ្វូង​មនុស្ស​ដែល​កំពុង​ដើរ ហើយ​បាន​ឈប់​ក្រោយ​ពេល​ដែល​ត្រូវ​បាន​ប៉ូលិស​បាញ់​សម្លាប់​អ្នក​បើកបរ​រូប​នោះ។

ក្រសួង​ការបរទេស​អាមេរិក​បាន​បញ្ជាក់​ថា ជនជាតិ​អាមេរិកាំង​២​នាក់​ត្រូវ​បាន​សម្លាប់​នៅ​ក្នុង​ហេតុការណ៍​វាយប្រហារ​នោះ។

ក្រុម​មន្ត្រី​រដ្ឋាភិបាល​នៅ​ក្នុង​ទីក្រុង នីស បាន​និយាយ​ថា មាន​ប៉ូលិស​ជាច្រើន​នាក់​ដែល​បាន​ស្លាប់​ក្នុង​ចំណោម​ជនរងគ្រោះ​ទាំង​នោះ។ ជន​រងគ្រោះ​យ៉ាង​ហោច​ណាស់​១៨​នាក់​ដែល​នៅ​រស់រាន​មាន​ជីវិត កំពុង​ស្ថិត​ក្នុង​ស្ថានភាព​គ្រោះថ្នាក់​ដល់​ជីវិត។

គេ​ជឿ​ថា កុមារ​១០​នាក់​គឺ​ជា​ជនរងគ្រោះ​ដែល​បាន​ស្លាប់​បាត់បង់​ជីវិត ហើយ​មនុស្ស​៥០​នាក់​ទៀត​ត្រូវ​បាន​បញ្ជូន​ទៅ​កាន់​មន្ទីរពេទ្យ បន្ទាប់​ពី​ការ​វាយប្រហារ​នៅ​តាម​បណ្តោយ​ទន្លេ French Riviera នោះ។

អ្នក​វាយប្រហារ​ដែល​បាន​ស្លាប់​បាត់បង់​ជីវិត​នោះ ត្រូវ​បាន​ប៉ូលិស​កំណត់​អត្តសញ្ញាណ​ថា ជា​ជនជាតិ​បារាំង​ដើម​កំណើត​ទុយ​នី​ស៊ី ដែល​បាន​រស់​នៅ​ក្នុង​ទីក្រុង នីស។ ជន​ដៃ​ដល់​នេះ​ក៏​ត្រូវ​បាន​ប៉ូលិស​ក្នុង​តំបន់​ស្គាល់​ថា ត្រូវ​បាន​ចោទ​ប្រកាន់​ពី​បទ​ប្រព្រឹត្ត​អំពី​ហិង្សា​លើ​អនីតិជន​ផង​ដែរ ប៉ុន្តែ​មិន​ត្រូវ​បាន​ទីភ្នាក់ងារ​សន្តិសុខ​ជាតិ​សង្ស័យ​ថា​មាន​ពាក់ព័ន្ធ​ជាមួយ​នឹង​ក្រុម​ជ្រុល​និយម​ឬ​ក្រុម​ភេរវកម្ម​ណា​មួយ​នោះ​ទេ។ ​

លោក​ប្រធានាធិបតី​បារាំង Francois Hollande និយាយ​ថា ការ​វាយប្រហារ​នោះ​មាន​ធាតុ​ទាំងអស់​នៃ​ការ​វាយប្រហារ​ភេរវកម្ម។

មេដឹកនាំ​បារាំង​បាន​ជួប​ប្រជុំ​ជាមួយ​នឹង​មន្ត្រី​សន្តិសុខ​នៅ​វិមាន អេលីហ្សេ ដើម្បី​ពិចារណា​ថា​អ្វី​នឹង​ត្រូវ​ធ្វើ​បន្ទាប់​ទៀត។ លោក Hollande បាន​និយាយ​ថា ប្រទេស​បារាំង​ដែល​បានដាក់​ប្រទេស​ស្ថិត​ក្នុង​ស្ថានភាព​អាសន្ន ដែល​គ្រោង​នឹង​បញ្ចប់​នៅ​ចុង​ខែ​នេះ នឹង​ត្រូវ​អូសបន្លាយ​៣​ខែ​បន្ថែម​ទៀត៕​

XS
SM
MD
LG