គំនរសំរាមបានទន្ទ្រានចិញ្ចើមផ្លូវនិងទ្រូងផ្លូវមួយចំនួននៅភ្នំពេញ បង្ខំឱ្យអាជ្ញាធររាជធានីបញ្ជូនកម្លាំងសន្ដិសុខរបស់ខ្លួនចេញទៅប្រមូល ខណៈកម្មករប្រមូលកាកសំណល់រាប់ពាន់នាក់នៃក្រុមហ៊ុនស៊ិនទ្រីបន្តធ្វើកូដកម្មអស់រយៈពេល ៤ ថ្ងៃជាប់គ្នា។
ការតវ៉ារបស់កម្មករប្រមូលសំរាមក្រុមហ៊ុនស៊ិនទ្រី ពាក់ព័ន្ធនឹងភាពមិនច្បាស់លាស់នៃការធ្វើអន្តរកាលដោះដូររចនាសម្ព័ន្ធក្រុមហ៊ុនប្រមូលសំរាមក្នុងរាជធានី។
លោក កៅ សុខវ៉ាត ប្រធានសហជីពកម្មករនិយោជិកវិស័យទេសចរណ៍នៃក្រុមហ៊ុនស៊ិនទ្រី បានប្រាប់ VOA នៅថ្ងៃអង្គារនេះថា កម្មករកម្មការិនីប្រមាណ ២.១០០ នាក់ នៃក្រុមហ៊ុនស៊ិនទ្រីបានធ្វើកូដកម្ម តាំងពីល្ងាចថ្ងៃសុក្រសប្តាហ៍មុន។
«ទាំងអស់តែម្ដងមួយក្រុមហ៊ុននេះ គឺអត់មាននរណាម្នាក់ធ្វើការទេ បង។ អត់ទាំងអស់ សូម្បីតែឡានក៏អត់មានចេញប្រមូលសំរាមមួយគ្រឿងដែរ បង អត់ទាំងអស់គ្នា»។
ក្រុមកម្មករដែលធ្វើកូដកម្មមានការបារម្ភថា ក្រោយការដេញថ្លៃរើសក្រុមហ៊ុនថ្មីមកប្រមូលសំរាមនៅថ្ងៃទី ១៦ ខែតុលាខាងមុខនេះ ពួកគេនឹងត្រូវរាប់បញ្ចូលជាបុគ្គលិកថ្មី និងមិនបានប្រាក់អត្ថប្រយោជន៍នានា ដូចយ៉ាងប្រាក់អតីតភាពការងារជាដើម ជាមួយក្រុមហ៊ុនស៊ិនទ្រី ដែលជាក្រុមហ៊ុនចាស់។
កាលពីខែតុលា ឆ្នាំ ២០១៩ លោកនាយករដ្ឋមន្ត្រី ហ៊ុន សែន បានបញ្ជាឱ្យយកក្រុមហ៊ុនស៊ិនទ្រីដែលផ្គត់ផ្គង់សេវាប្រមូលសំណល់រឹង ក្នុងរាជធានីភ្នំពេញ អស់ ២០ ឆ្នាំមកហើយនោះ មកនៅក្រោមការគ្រប់គ្រងបណ្ដោះអាសន្នរបស់រដ្ឋ ក្រោមហេតុផលថា ក្រុមហ៊ុននេះផ្ដល់សេវាប្រមូលសំរាមមិនបានល្អ។
លោក កៅ សុខវ៉ាត ឱ្យដឹងថា ក្នុងជំនួបជាមួយតំណាងកម្មករ កាលពីថ្ងៃច័ន្ទលោក សេង សាវី អគ្គនាយកក្រុមហ៊ុនស៊ិនទ្រី បានបញ្ជាក់ថា ពិតជាមានការដេញថ្លៃរើសក្រុមហ៊ុនថ្មីដែលនឹងធ្វើឡើងនៅថ្ងៃទី ១៦ ខែតុលាខាងមុខ។
«ខ្ញុំមើលទៅដូចជាអត់មានអ្វីខុសច្បាប់ទេ ព្រោះក្រុមហ៊ុនបានដេញថ្លៃមែន ហើយមិនបានឱ្យដឹងដំណឹង…បិទបាំងព័ត៌មានមិនឱ្យគាត់ដឹងរយៈពេលជាច្រើនខែមកហើយ»។
ការទាមទារ ៥ ចំណុចរបស់កម្មករកម្មការិនីក្រុមហ៊ុនស៊ិនទ្រីនោះ រួមមានប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់។
VOA មិនអាចសុំការអត្ថាធិប្បាយពីតំណាងក្រុមហ៊ុនស៊ិនទ្រីបាននៅឡើយទេ នៅថ្ងៃអង្គារនេះ។
សាលារាជធានីភ្នំពេញកាលពីថ្ងៃសៅរ៍ បានទទូចឱ្យកម្មករ «បញ្ឈប់ការធ្វើកូដកម្ម ដោយយកបញ្ហាសំរាមជាចំណាប់ខ្មាំង» និងបានព្រមានរើសកម្មករថ្មី ដោយមិនទទួលកម្មករកំពុងធ្វើកូដកម្មដែលមានស្រាប់របស់ក្រុមហ៊ុនស៊ិនទ្រីឡើយ ខណៈក្រុមហ៊ុននេះកំពុងធ្វើអន្តរកាលការងារប្រមូលសំរាម។
បន្ថែមពីការព្រមាន សាលារាជធានីភ្នំពេញកាលពីថ្ងៃច័ន្ទ ក៏បានប្រកាសរើសអ្នកប្រមូលសំរាមថ្មី «ជាច្រើននាក់» និងបានបញ្ជូនកម្លាំងសន្ដិសុខខណ្ឌ និងប្រជាការពារចេញទៅប្រមូលសំរាម ដែលពលរដ្ឋយកទៅទុកចោលតាមដងវិថីនានា ក្នុងរាជធានីភ្នំពេញ។
លោក កៅ សុខវ៉ា តមន្រ្តីសហជីពការពារឲ្យកម្មករបារម្ភថា ខ្លឹមសារនៃលិខិតទាំងពីររបស់សាលារាជធានីភ្នំពេញនេះ ហាក់មានន័យស្មើនឹងការបញ្ឈប់បុគ្គលិកនិយោជិត ដែលកំពុងធ្វើកូដកម្មទាំងអស់។
និយាយទៅ ពួកខ្ញុំធ្វើការនេះមានហានិភ័យច្រើនណាស់ បង ដូចប្ដូរជីវិតលើផ្លូវថ្នល់អ៊ីចឹង...កន្លែងណាខ្លះ ពួកខ្ញុំទៅធ្វើដង្កូវពេញៗដៃ។ ដង្កូវពេញៗដៃតែម្ដង។ បងតែពួកគាត់អត់មានគិតពីផលពិបាកពួកខ្ញុំផង! មើលអត់ឃើញ មិនមែនថាមិនគិតទេ។ គាត់មើលមិនឃើញ»
ពាក់ព័ន្ធនឹងការតវ៉ារបស់កម្មករប្រមូលសំរាមនេះ លោក កៅ សុខវ៉ាត ក៏ត្រូវបានក្រសួងការងារព្រមានក្នុងលិខិតមួយច្បាប់ ចុះថ្ងៃទី ៥ ខែតុលាដោយថា លោកធ្វើសកម្មភាពផ្ទុយពីលក្ខន្តិកៈរបស់សហជីព ដឹកនាំធ្វើបាតុកម្មមិនស្របតាមនីតិវិធី និងញុះញង់ឲ្យកម្មករប្រព្រឹត្តកំហុសធ្ងន់។ ប៉ុន្តែលោក កៅ សុខវ៉ាត បានបញ្ជាក់ថា អ្វីៗជាគំនិតផ្តួចផ្តួចរបស់កម្មករប្រមូលសំរាម។
ប៉ុន្តែអាជ្ញាធរបានសម្ដែងភាពទន់ភ្លន់នៅថ្ងៃអង្គារនេះ ខណៈខ្លួនរងសម្ពាធត្រូវចាត់បញ្ជូនកម្លាំងសន្ដិសុខក្រោម បង្គាប់ចេញទៅប្រមូលសំរាមដោយផ្ទាល់។
លោក ឃួង ស្រេង អភិបាលរាជធានីភ្នំពេញបានប្រាប់ក្រុមអ្នកសារព័ត៌មាន កាលពីព្រឹកថ្ងៃអង្គារនេះថា ក្រោយការដេញថ្លៃបែងចែកតំបន់ កម្មករក្រុមហ៊ុនស៊ិនទ្រី អាចបន្តការងារជាមួយក្រុមហ៊ុននេះ បើសិនជាក្រុមហ៊ុនស៊ិនទ្រីទទួលសិទ្ធិប្រមូលសំរាមនៅតំបន់ណាមួយហើយ បើរើសថ្មីក៏សាលារាជធានី ធានាឱ្យទទួលបានប្រាក់អត្ថប្រយោជន៍ដែរ។
«កិច្ចការងារដែលត្រូវយកនោះក្រុមហ៊ុនថ្មីមក ក៏ត្រូវការកម្មករ។ ហើយកម្មករទាំងនេះនឹងបន្ដអតីតភាពដោះស្រាយ។ ឧទាហរណ៍ថា បើក្រុមហ៊ុនស៊ិនទ្រីដេញបានតំបន់ណាមួយ នោះក្រុមហ៊ុនស៊ិនទ្រីប្រតិបត្តិនៅតំបន់នោះ។ បើចំនួនកម្មករនៅតំបន់នោះលើសកម្មករ ចំណែកលើសអាចដាក់ពាក្យទៅតំបន់ថ្មី ដោយមានការជួយជ្រោមជ្រែងពីរដ្ឋបាលរាជធានីភ្នំពេញ ហើយប្រាក់អតីតភាព គឺមិនឱ្យគាត់មានការបាត់បង់ទេ»។
បើតាមលោក ឃួង ស្រេង អំឡុងពេលកូដកម្មនេះសាលារាជធានីបានបញ្ចេញរថយន្តប្រមូលសំរាមរបស់ខ្លួន ចំនួនជាង ៧០ គ្រឿងដើរប្រមូលសំរាមតាមខណ្ឌនីមួយៗ។
រាជធានីភ្នំពេញបញ្ចេញសំណល់រឹងប្រមាណ ៣ ពាន់តោន ក្នុងមួយថ្ងៃ។ កម្មករក្រុមហ៊ុនស៊ិនទ្រីដែលកំពុងធ្វើកូដកម្ម បានលើកឡើងថា ការងារប្រមូលសំរាមមិនមែនជាភារកិច្ចងាយស្រួលឡើយ។
អ្នកស្រី អ៊ូ ស្រីពៅ អាយុ ៥២ ឆ្នាំ បានលើកឡើងថា ខ្លួនបានបម្រើការងារជាអ្នកបោសសម្អាតដងផ្លូវក្នុងខណ្ឌដូនពេញ និងប្រមូលសំរាមឱ្យក្រុមហ៊ុនស៊ិនទ្រី អស់រយៈពេល ៦ ឆ្នាំមកហើយ ដោយទទួលបានកម្រៃ ៦០ ម៉ឺនរៀលក្នុងមួយខែ។
«វាពិបាក! ក្ដៅ! ផ្លូវជួនកាលវាស្រួល តែពេលភ្លៀងមានភក់ប៉ប៉េចប៉ប៉ាច់ អាចម៍នោមវានៅហ្នឹង។ពិបាកណាស់! មិនស្រួលទេ! តាមផ្លូវនោះ ទម្រាំតែស្អាតបានម្ដុំៗ យើងបបោសបបៀរខ្ទាតប្រឡាក់ ។ប្រឡាក់អាវប្រឡាក់ខោប្រឡាក់អស់ហើយ។ អ៊ីចឹងបានថាឱ្យពួកបងៗ នៅថ្នាក់ខាងលើនោះជួយផង»។
អ្នកស្រី អ៊ុយ សុខា អ្នកបោសប្រមូលសំរាមមួយរូបទៀត មានវ័យ ៣៨ ឆ្នាំ បានយល់ឃើញថា ការងាររបស់អ្នកស្រីនិងសហការីហាក់ ត្រូវបានគេមើលរំលងពីតម្លៃជាក់ស្ដែង។
«និយាយទៅ ពួកខ្ញុំធ្វើការនេះមានហានិភ័យច្រើនណាស់ បង ដូចប្ដូរជីវិតលើផ្លូវថ្នល់អ៊ីចឹង...កន្លែងណាខ្លះ ពួកខ្ញុំទៅធ្វើដង្កូវពេញៗដៃ។ ដង្កូវពេញៗដៃតែម្ដង។ បងតែពួកគាត់អត់មានគិតពីផលពិបាកពួកខ្ញុំផង! មើលអត់ឃើញ មិនមែនថាមិនគិតទេ។ គាត់មើលមិនឃើញ»។
ទាំងអ្នកស្រី អ៊ូ ស្រីពៅ និងអ្នកស្រី អ៊ុយ សុខា កំពុងជួបជុំជាមួយកម្មករដទៃទៀត នៅចំណតរថយន្តដឹកសំរាមរាប់រយគ្រឿងរបស់ក្រុមហ៊ុនស៊ិនទ្រី ដែលចតចោលក្នុងភូមិម័រ សង្កាត់ដង្កោ រាជធានីភ្នំពេញ ខណៈកម្មករដទៃទៀតបានរៀបរោងបិទផ្លូវចេញចូលឡាន និងមានចាក់ភ្លេងរាំកម្សាន្តបន្តិចផង៕
