ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សំរាម​គរ​ស្ទើរ​គ្រប់​ទី​កន្លែង​នៅ​ភ្នំពេញ​ ខណៈ​បុគ្គលិក​ក្រុមហ៊ុន​ស៊ីនទ្រី​ជាង​១ពាន់​នាក់​ធ្វើ​កូដកម្ម


ស្រ្តី​ម្នាក់​និង​ព្រះសង្ឃ​មួយ​អង្គ​ដើរកាត់​គំនរ​សំរាម​នៅ​ក្នុង​រាជធានី​ភ្នំពេញ​មួយ​ថ្ងៃ ​បន្ទាប់​ពី​បុគ្គលិក​​ក្រុម​ហ៊ុន​ស៊ីនទ្រី​មិន​មក​ប្រមូល​​ដើម្បីធ្វើ​បាតុកម្ម​ទាមទារ​ដំឡើង​ប្រាក់​ខែ រាជធានីភ្នំពេញ ថ្ងៃទី​២៦ ខែធ្នូ ឆ្នាំ២០១៨​។ (ទុំ ម្លិះ/VOA)

នៅ​ថ្ងៃ​ព្រហស្បតិ៍​នេះ​ ​គេ​ឃើញ​គំនរ​សំរាម​ជា​ច្រើន​​កំពុង​គរ​រាយប៉ាយ​នៅ​តាម​ផ្លូវ​ ​ជា​ពិសេស​តំបន់​ផ្សារ​ ​ដោយ​សារ​​​បុគ្គលិក​ក្រុមហ៊ុន​ស៊ីនទ្រី​ធ្វើ​កូដកម្ម​មិន​ប្រមូល​សំរាម​ ​ដើម្បី​ទាមទារ​ប្រាក់​អត្ថប្រយោជន៍​ផ្សេងៗ។

គំនរ​សំរាម​ជា​ច្រើន​នៅ​តាម​តំបន់​សំខាន់ៗ​ក្នុង​រាជធានី​ភ្នំពេញ​ត្រូវ​បាន​គរ​ទុក​ចោល​ស្ទើរ​ពេញ​មួយ​ថ្ងៃ​នៅ​ថ្ងៃ​ព្រហស្បតិ៍​នេះ​ ​ខណៈ​បុគ្គលិក​ក្រុម​ហ៊ុន​ស៊ីនទ្រី​ ​ធ្វើ​កូដកម្មមិន​ប្រមូល​សំរាម​ដើម្បី​ទាមទារ​ដំឡើង​ប្រាក់​ខែ​និង​ប្រាក់​អត្ថ​ប្រយោជន៍​ផ្សេងៗ។

លោក​ ​កៅ សុខវ៉ាត​ ​ប្រធាន​សហជីព​កម្មករ​និយោជិត​វិស័យ​ទេសចរណ៍​នៃ​ក្រុមហ៊ុន​ស៊ីនទ្រី​ ​ខេម​បូឌា​ ​ប្រាប់​ ​VOA​ ​នា​រសៀល​ថ្ងៃ​ព្រហស្បតិ៍​នេះ​ថា​ ​បុគ្គលិក​ក្រុមហ៊ុន​ស៊ិនទ្រី​ដែល​មាន​ទាំង​អ្នក​បើកបរ​និង​ប្រមូល​សំរាម​ប្រមាណ​ជាង​១ពាន់​នាក់​ បាន​ធ្វើ​កូដកម្មនៅ​ម្តុំ​កន្លែង​ចាក់​សំរាម​ខណ្ឌ​ដង្កោ​ និង​នៅ​តាម​ផ្ទះ​រៀងៗ​ខ្លួន តាម​រយៈ​ការ​មិន​ធ្វើ​ការ។​ លោក​បន្ថែម​ថា​ ​កូដកម្ម​នោះ​ធ្វើ​ឡើង​តាំង​ពី​ល្ងាច​ថ្ងៃពុធ​ ​រហូត​ដល់​ថ្ងៃ​ព្រហស្បតិ៍​នេះ​ ​ដើម្បី​ទាមទារ​អត្ថប្រយោជន៍​បី​ចំណុច។

លោក​បញ្ជាក់​ថា៖​

«ពួក​គាត់​មិនពេញ​ចិត្ត​នូវ​ការ​ដំឡើង​ប្រាក់ខែ​ដែល​ក្រុម​ហ៊ុន​ឲ្យ​៦​ដុល្លារ ពួកគាត់​ទាមទារ​១៥​ដុល្លារ។ តាម​ពិត ​ពួកខ្ញុំ​ដាក់​ស្នើ​ទៅ​ក្រុមហ៊ុន​ចំនួន​បី​ចំណុច​ ​ទី១​លុយ​ឡើង​ប្រចាំ​ឆ្នាំ ​ទី២​ ​ការ​ឈប់​សម្រាក​ប្រចាំ​ឆ្នាំ​ហ្នឹង​ ​ថ្ងៃ​ឈប់​សម្រាក​ដែល​នៅ​សល់​ហ្នឹង​ ​បើ​យើង​ឈប់​អត់​អស់​ឲ្យ​ក្រុមហ៊ុន​គិត​ជា​លុយ​ឲ្យ​វិញ​ ​ទី៣​គឺ​អតីតភាព​ការងារ»។

VOA ​មិនអាច​ទាក់ទង​សុំ​ការ​អត្ថាធិប្បាយ​ពី​លោក​ ​ទួន ស៊ីផេង​ ​ប្រធាន​ក្រុមហ៊ុនស៊ីនទ្រី​ ​និង​លោក អ៊ិត ចាន់ដា ប្រធាន​ការិយាល័យ​អតិថិជន​និង​សម្អាត​ក្រុង​នៃ​ក្រុមហ៊ុន​ស៊ីនទ្រី​បានទេ​ ​រហូត​ដល់​ល្ងាច​ថ្ងៃ​ព្រហស្បតិ៍​នេះ​ ​ដោយ​ទូរសព្ទ​ចូល តែ​ពុំ​មាន​អ្នក​ទទួល។

​ខណៈ​កូដកម្ម​របស់​បុគ្គលិក​ក្រុមហ៊ុន​ស៊ិនទ្រី​បាន​និង​កំពុង​បន្ត​ ​គេ​ឃើញ​មាន​គំនរ​សំរាម​ជា​ច្រើន គរ​រាយប៉ាយ​នៅ​តាម​ផ្លូវ​ ជាពិសេស​តំបន់​ផ្សារ។

VOA​ ​មិនអាច​ទាក់ទង​សុំ​ការ​អត្ថាធិប្បាយ​ពី​លោក​ ​ម៉េត មាសភក្តី​ ​អ្នកនាំពាក្យ​សាលា​រាជធានី​ភ្នំពេញ ពាក់ព័ន្ធ​នឹង​វិធានការ​លើ​ករណីសំរាម​នេះ​បាន​ទេ។​

យ៉ាងណាក្តី នៅ​ថ្ងៃព្រហស្បតិ៍​នេះ គេ​ឃើញ​នៅ​តាម​ទំព័រ​ហ្វេសប៊ុក​របស់​ខណ្ឌ​មួយ​ ​ចំនួន​ក្នុង​រាជធានី​ភ្នំពេញ ដូចជា​ខណ្ឌ​ដូនពេញ​ ​ខណ្ឌ​ទួលគោក​ ​និង​ខណ្ឌ​សែនសុខ​ជាដើម​ ​បាន​បង្ហោះសារ​ជាមួយ​នឹង​រូបភាព​អំពី​ការ​ប្រមូល​សំរាម​តាម​តំបន់​រៀងៗខ្លួន។

បើ​តាម​ទំព័រ​ហ្វេសប៊ុក​របស់​ខណ្ឌ​ដូនពេញ​បង្ហោះ​នៅ​ថ្ងៃ​ព្រហស្បតិ៍​នេះ​តាម​ន័យ​ដើម​ថា៖ «នៅ​ក្នុង​មូលដ្ឋាន​មាន​ការ​កក​ស្ទះ​សំរាម​ដោយ​បុគ្គលិក​ស៊ីនទ្រី​ធ្វើ​កូដកម្ម​ដំឡើង​ប្រាក់ខែ​ ​ហើយ​គ្មាន​កម្លាំង​សម្អាត​ ​និង​យោង​តាម​បញ្ជា​ផ្ទាល់​ពី​ឯកឧត្តម​ ​ឃួង ស្រេង​ ​អភិបាល​នៃ​គណៈ​អភិបាល​រាជធានី​ភ្នំពេញ​ ​បាន​បញ្ជា​ឲ្យ​បណ្តា​ខណ្ឌ​ទាំង​១២​ ​ត្រូវ​ជួយ​គ្នា​ទទួល​ខុសត្រូវ​ក្នុង​ការ​ប្រមូល​សំរាម​នៅ​ក្នុង​មូលដ្ឋាន​រៀងៗ​ខ្លួន​ជា​បណ្តោះ​អាសន្ន»។

​ការ​តវ៉ា​របស់​បុគ្គលិក​ក្រុមហ៊ុន​ស៊ីនទ្រី​ត្រូវ​បាន​បញ្ចប់​នៅ​ល្ងាច​ថ្ងៃ​ព្រហស្បតិ៍​នេះ​ ​ក្រោយ​មាន​ការ​សម្រប​សម្រួល​និង​ទទួល​យក​សំណើ​របស់​បុគ្គលិក។

​លោក​ ​កៅ សុខវ៉ាត​ ​ប្រាប់​ ​VOA​ ​នា​ល្ងាច​ម៉ោង​៦​ ថ្ងៃ​ព្រហស្បតិ៍​នេះ​ថា ​ក្រុមហ៊ុន​បាន​យល់ព្រម​ទទួល​យក​ការ​ទាមទារ​ទាំង​៣​ចំណុច​ ​ដោយ​ចំណុច​ទី១​បាន​សម្រេច​ដំឡើង​ប្រាក់​ខែ​ឲ្យ​បុគ្គលិក​ចំនួន​៩​ដុល្លារ។​ ​លោក​បន្ថែមថា​ ​ក្រោយ​ការ​សម្រេច​ ​ភ្លាមៗ​ក្រុម​បុគ្គលិក​ចាប់​ផ្តើម​ធ្វើការ​ប្រមូល​សំរាម​វិញ​នា​ល្ងាច​ថ្ងៃ​ដដែល។

របាយការណ៍​របស់​អាជ្ញាធរ​រាជធានី​ភ្នំពេញ​នាពេល​កន្លង​មក​ ​បាន​ប៉ាន់​ប្រមាណ​ថា​ ​សំរាម​ដែល​ប្រជាពល​រដ្ឋ​ក្នុង​រាជធានី​ភ្នំពេញ​ផលិត​ក្នុង​មួយថ្ងៃ​ ​កើនឡើង​ដល់​២៧០០​តោន​ ​ដែល​ត្រូវ​បាន​ដឹក​ជញ្ជូន​យក​ទៅ​ចាក់​ចោល​នៅ​ទីលាន​ចាក់​សំរាម៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG