ប្រជាពលរដ្ឋរងគ្រោះដោយសារទឹកជំនន់បានកើនដល់៧៩៩៩គ្រួសារហើយ បើទោះបីជាជំនន់ទឹកភ្លៀងចាប់ផ្តើមស្រកចុះវិញក៏ដោយ។ ដោយឡែកស្រែចម្ការរបស់ប្រជាពលរដ្ឋដែលត្រូវជន់លិចបានកើនដល់ជាង៥២០០ហិកតា។ នេះបើយោងតាមការបញ្ជាក់ពីមន្ត្រីទទួលបន្ទុកគ្រប់គ្រងគ្រោះមហន្តរាយនៅថ្ងៃព្រហស្បតិ៍នេះ។
ក្នុងសន្និសីទព័ត៌មានស្តីពីបច្ចុប្បន្នភាពគ្រោះទឹកជំនន់ រៀបចំឡើងដោយអង្គភាពអ្នកនាំពាក្យរាជរដ្ឋាភិបាលនោះ លោកកែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា ការធ្លាក់ភ្លៀងខ្លាំងបានបង្កការរំខានដល់ការរស់នៅរបស់ប្រជាពលរដ្ឋ ហើយសាលារៀន និងវត្តអារាមបានជន់លិច ខណៈពលរដ្ឋជិត១០០០គ្រួសារត្រូវបានជម្លៀសទៅកាន់ទីទួលសុវត្ថិភាព។ ដំណាំស្រូវប្រមាណ៣០០ហិកតាក៏រងការខូចខាត។
«យើងមានការលិចសាលារៀនចំនួន២២ លិចវត្តអារាមចំនួន៩ ហើយមានការជម្លៀសគោ ក្របីមកទីទួលសុវត្ថិភាពចំនួន៥៤៤៧ក្បាល មានលិចដំណាំស្រូវចំនួន៥២០៨ហិកតា ភាគច្រើនគឺនៅក្នុងខេត្តរតនគិរី និងនៅក្នុងខេត្តកំពត ហើយក្នុងហ្នឹងមានការខូចខាត៣០០ហិកតានៅក្នុងខេត្តរតនគិរី»។
ទិន្នន័យប៉ះពាល់ និងខូចខាតដោយជំនន់ទឹកភ្លៀងឆ្នាំ២០១៩របស់គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ឲ្យដឹងបន្ថែមថា ជំនន់ទឹកភ្លៀងបានវាយប្រហារខេត្តចំនួនប្រាំបីនៅក្នុងប្រទេស រួមមានខេត្តព្រះសីហនុ កំពត កោះកុង កែប រតនគិរី មណ្ឌលគិរី បាត់ដំបង និងខេត្តកំពង់ធំ។
ទិន្នន័យដដែលបញ្ជាក់ថា មានផ្ទះចំនួន៦៨៩៨ខ្នងបានរងផលប៉ះពាល់ ប៉ុន្តែមានតែផ្ទះចំនួន២ខ្នងប៉ុណ្ណោះដែលរងការខូចខាត។
ក្រៅពីដំណាំស្រូវ ដំណាំរួមផ្សំផ្សេងទៀតបានខូចខាតមានចំនួន៩៤០ហិកតា។ ហេដ្ឋារចនាសម្ព័ន្តផ្លូវថ្នល់មួយចំនួនបានរងផលប៉ះពាល់តែមិនខូចខាត ក្នុងនោះមានផ្លូវកៅស៊ូ និងផ្លូវបេតុងប្រាំមួយខ្សែ ផ្លូវលំ៦៩ខ្សែ និងស្ពាន២៣កន្លែងក៏រងផលប៉ះពាល់។ មានការបាក់ច្រាំងទន្លេប្រវែង៧៥០ម៉ែត្រក្នុងខេត្តមណ្ឌលគិរី និងទំនប់មួយបានខូចខាតក្នុងខេត្តកំពត។
ទោះជាយ៉ាងណា រហូតមកដល់ពេលនេះ ស្ថានភាពជំនន់ទឹកភ្លៀងបានធូរស្រាលមកវិញ តែរដ្ឋាភិបាលនៅបន្តការប្រុងប្រយ័ត្នដើម្បីឆ្លើយតបនឹងការប្រែប្រួលណាមួយ ខណៈពេលទឹកភ្លៀងអាចនៅបន្តធ្លាក់ចុះ។ នេះបើតាមការអះអាងរបស់ក្រុមមន្ត្រីក្នុងសន្និសីទកាសែតនៅថ្ងៃនេះ។
លោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម បានអះអាងនៅចំពោះអ្នកកាសែតថា ជំនន់ទឹកភ្លៀងនៅកម្ពុជាគឺមិនអាក្រក់ខ្លាំងដូចនៅប្រទេសក្បែរខាងកម្ពុជានោះឡើយ។
«យើងមើលបណ្តាប្រទេសជិតខាងយើង ជំនន់ខ្លាំងដូចគ្នាហើយមានស្លាប់ច្រើនណាស់ យើងនៅចំនួនតិចតួចទេ។ សុំទោសខ្ញុំលើកនេះមិនមែនប្រមាថទៅដល់អាយុជីវិតបងប្អូនប្រជាពលរដ្ឋយើងដែលលោកបានបាត់បង់ជីវិតដោយគ្រោះមហន្តរាយនេះទេ។ តែយើងក៏ត្រូវពិចារណាមើលប្រទេសជិតខាងរបស់យើង»។
ជំនន់ទឹកភ្លៀងនៅប្រទេសកម្ពុជាឆ្នាំ២០១៩នេះ បានឆក់យកអាយុជីវិតមនុស្សចំនួនបួននាក់។ ក្នុងនោះបីនាក់ជាកម្មករ និងមេការសំណង់ក្នុងក្រុងព្រះសីហនុនិងម្នាក់ទៀតជាកុមារីអាយុ១៥ឆ្នាំក្នុងខេត្តរតនគិរី៕
