មន្ត្រីសុខាភិបាលជាន់ខ្ពស់សហរដ្ឋអាមេរិកបានព្រមានកាលពីថ្ងៃអាទិត្យម្សិលមិញថា នៅសប្ដាហ៍ខាងមុខនេះ សហរដ្ឋអាមេរិកប្រឈមនឹងបញ្ហាធ្ងន់ធ្ងរដោយសារជំងឺ COVID-19 ដោយសារតែប្រទេសជាតិត្រូវដោះស្រាយជាមួយនឹងករណីឆ្លង និងស្លាប់ជាច្រើនដោយសារជំងឺនេះ។
ប្រធានផ្នែកសុខាភិបាលសហរដ្ឋអាមេរិកលោក Jerome Adams បានបញ្ជាក់ក្នុងកម្មវិធី «Fox News Sunday» ថា៖ «សប្ដាហ៍នេះនឹងក្លាយជាសប្ដាហ៍ដ៏លំបាក និងសោកសៅបំផុតសម្រាប់ជីវិតរបស់ពលរដ្ឋអាមេរិកាំងភាគច្រើន។ ស្ថានការណ៍នេះនឹងក្លាយដូចជាព្រឹត្តិការណ៍ Pearl Harbor កាលពីសម័យសង្គ្រាមលោកលើកទី ២ ឬក៏ព្រឹត្តិការណ៍ថ្ងៃ ១១ កញ្ញា ឆ្នាំ ២០០១ នៅទីក្រុង New York គ្រាន់តែស្ថានការណ៍លើកនេះនឹងកើតឡើងនៅទូទាំងប្រទេស»។
ប្រធានាធិបតីសហរដ្ឋអាមេរិកលោក Donald Trump បានប្រាប់អ្នកកាសែត ដោយបង្ហាញសុទិដ្ឋិនិយមមួយចំនួនថា នឹងមាន «ពន្លឺនៅខាងចុងនៃរូងផ្លូវ» ជាមិនខាន ស្របពេលដែលលោកកត់សម្គាល់អំពីស្ថានការណ៍លំបាកដែលនឹងចូលមកដល់។
លោក Trump និយាយដូច្នេះថា៖ «នៅមួយសប្ដាហ៍កន្លះ ឬក៏ពីរសប្ដាហ៍ខាងមុខ ខ្ញុំគិតថាស្ថានការណ៍នឹងយ៉ាប់យ៉ឺនខ្លាំងបំផុត។ ...សង្ឃឹមថា ពួកយើងនឹងអាចឆ្លងផុតស្ថានការណ៍នេះ»។
លោកវេជ្ជបណ្ឌិត Anthony Fauci ប្រធានវិទ្យាស្ថានជាតិផ្នែកអាឡែកហ្ស៊ី និងជំងឺឆ្លងរបស់សហរដ្ឋអាមេរិក បានបញ្ជាក់ថា បទបញ្ជាឲ្យពលរដ្ឋស្នាក់នៅក្នុងផ្ទះ និងរក្សាគម្លាតពីគ្នាត្រូវការពេលវេលាដើម្បីឃើញលទ្ធផល។
កន្លងមក សហរដ្ឋអាមេរិកគឺជាប្រទេសនាំមុខគេលើពិភពលោក ដោយមានករណីឆ្លងជំងឺ COVID-19 ចំនួនជាង ៣ សែន ៣ ម៉ឺន ៧ ពាន់នាក់ និងអ្នកស្លាប់ជាង ៩ ពាន់ ៦ រយនាក់។ នេះបើយោងតាមទិន្នន័យរបស់សាកលវិទ្យាល័យ Johns Hopkins នៅថ្ងៃចន្ទនេះ៕
