ឧត្តមសេនីយ៍កំពូលរបស់អាមេរិកនិយាយថា សហរដ្ឋអាមេរិកនិងកូរ៉េខាងត្បូងនឹងបន្តដំណើរការសមយុទ្ធយោធារួមគ្នានៅសប្តាហ៍ក្រោយនេះ ដែលប្រឆាំងនឹងសំពាធពីចិននិងកូរ៉េខាងជើងដែលឲ្យបញ្ឈប់សមយុទ្ធយោធាប្រចាំឆ្នាំនេះ។
លោក Joseph Dunford ប្រធាននាយសេនាធិការចម្រុះអាមេរិកបានមានប្រសាសន៍កាលពីថ្ងៃព្រហស្បតិ៍ក្នុងទីក្រុងប៉េកាំងថា សហរដ្ឋអាមេរិកមិនមានផែនការនឹងផ្អាកសមយុទ្ធយោធាជាមួយនឹងកូរ៉េខាងត្បូងនោះទេ ដែលសមយុទ្ធយោធានេះបានបណ្តាលឲ្យរដ្ឋាភិបាលក្រុងប៉េកាំងនិងរដ្ឋាភិបាលក្រុងព្យុងយ៉ាង មានការខឹងសម្បារ។
សមយុទ្ធយោធាប្រចាំឆ្នាំរវាងសហរដ្ឋអាមេរិកនិងកូរ៉េខាងត្បូង ដែលហៅថា Ulchi-Freedom Guardian បានចាប់ផ្តើមជាមួយនឹងអ្វីដែលក្រុមមន្ត្រីយោធាហៅថា ជាការចាប់ផ្តើមដ៏ទន់ភ្លន់មួយកាលពីថ្ងៃពុធ ដែលដំណើរការសមយុទ្ធយោធាធំនឹងចាប់ផ្តើមនៅថ្ងៃចន្ទសប្តាហ៍ក្រោយ។
លោក Dunford ទទួលស្គាល់ថា ដំណោះស្រាយយោធាមួយទៅលើការគំរាមកំហែងនុយក្លេអ៊ែររបស់កូរ៉េខាងជើងនឹងទៅជាគួរឲ្យភ័យខ្លាច ប៉ុន្តែលោកបានថ្លែងថា ការអនុញ្ញាតឲ្យមេដឹកនាំកូរ៉េខាងជើង លោក គីម ជុងអ៊ុន ផលិតកាំជ្រួចមីស៊ីលបាញ់ឆ្លងទ្វីបដែលបំពាក់ក្បាលនុយក្លេអ៊ែរដែលអាចគំរាមកំហែងដល់សហរដ្ឋអាមេរិក គឺមិនគួរឲ្យជឿនោះទេ។
ឧត្តមសេនីយ៍កំពូលអាមេរិកបានមានប្រសាសន៍ថា លោកប្រធានាធិបតី ដូណាល់ ត្រាំ បានស្នើដល់មេដឹកនាំយោធាឲ្យបង្កើតជម្រើសយោធាដែលអាចទទួលយកបាននានា។ លោកបាននិយាយថា «នេះគឺជាអ្វីដែលយើងកំពុងធ្វើ»៕
