កិច្ចពិភាក្សាបិទទ្វាររយៈពេល៦ម៉ោងនៅមូលដ្ឋានទ័ពអាកាសHickam ក្នុងកោះហាវ៉ៃនេះជាការជួបប្រជុំផ្ទាល់ដំបូងរវាងលោក Pompeo និងលោក Yang ចាប់តាំងពីខែសីហាឆ្នាំមុនម៉្លេះ។
ទោះបីភាគីទាំងសងខាងមិនបានទម្លាយឲ្យដឹងពីចំណុចដែលត្រូវពិភាក្សាក្តី ក៏ប្រព័ន្ធផ្សព្វផ្សាយរដ្ឋរបស់ចិនបានពិពណ៌នាកិច្ចពិភាក្សានេះថា«មានលក្ខណៈស្ថាបនា» ខណៈដែលលោកPompeo បានសង្កត់ធ្ងន់ទៅលោក Yang អំពីសារៈសំខាន់នៃការធ្វើសកម្មភាពដែលមានប្រយោជន៍ទៅវិញទៅមករវាងរដ្ឋាភិបាលទីក្រុងវ៉ាស៊ីនតោននិងក្រុងប៉េកាំង។
ទំនាក់ទំនងរវាងប្រទេសដែលមានសេដ្ឋកិច្ចធំជាងគេទាំងពីររបស់ពិភពលោកទាំងពីរនេះ បានធ្លាក់ចុះដល់កម្រិតទាបបំផុតដោយមានការខ្វែងគំនិតគ្នាចំពោះបញ្ហាមួយចំនួន ដូចជាពាណិជ្ជកម្ម ការពង្រឹងអំណាចរបស់រដ្ឋាភិបាលចិនចំពោះដែនដីពាក់កណ្តាលស្វ័យតហុងកុង វត្តមានយោធាចិនកាន់តែខា្លំងនៅក្នុងដែនសមុទ្រចិនខាងត្បូង និងជម្លោះទាក់ទងនឹងប្រភពនៃការផ្ទុះរាតត្បាតជាសាកលនៃជំងឺកូវីដ១៩ ដែលត្រូវគេប្រទះឃើញដំបូងនៅក្នុងប្រទេសចិនកាលពីខែធ្នូឆ្នាំមុន។
កិច្ចប្រជុំនេះក៏ត្រូវគ្របដណ្តប់ដោយបរិបទព័ត៌មាននៃខ្លឹមសារសម្ងាត់និងចម្រូងចម្រាស់ដែលនឹងត្រូវទម្លាយនៅក្នុងសៀវភៅថ្មីមួយរបស់លោកJohn Bolton អតីតទីប្រឹក្សាសន្តិសុខជាតិរបស់លោកប្រធានាធិបតីដូណាល់ ត្រាំ។ លោក Bolton បានអះអាងថា លោក ត្រាំ បានស្នើឲ្យប្រធានាធិបតីចិនជួយ ទិញផលិតផលកសិកម្មអាមេរិកដើម្បីជួយធានាឲ្យលោកត្រាំអាចជាប់ឆ្នោតមួយអាណត្តិទៀតក្នុងការបោះឆ្នោតជ្រើសរើសប្រធានាធិបតីនៅក្នុងខែវិច្ឆិកាខាងមុខ៕
