ការប្រឈមមុខដាក់គ្នាដ៏ប្រល័យបំផុតរវាងប្រទេសឥណ្ឌានិងចិន ក្នុងរយៈពេលជិត ៥ទសវត្សរ៍ ដែលបានសម្លាប់ទាហានឥណ្ឌា ២០នាក់ ជាស្ថានការណ៍ប្រកបដោយគ្រោះថ្នាក់បំផុតនៃជម្លោះព្រំដែនដ៏វែង ហើយផ្លូវទៅកាន់ដំណោះស្រាយ នឹងមិនងាយស្រួលសម្រាប់ប្រទេសទាំង២ ដែលដឹកនាំដោយមេដឹកនាំជាតិនិយម។ នេះបើតាមអ្នកវិភាគ។
នាយករដ្ឋមន្រ្តីឥណ្ឌាលោក Narendra Modi បាននិយាយក្នុងសុន្ទរកថាផ្សាយតាមទូរទស្សន៍ក្នុងរដ្ឋធានីញូវដែលី កាលពីថ្ងៃពុធថា៖ «ខ្ញុំចង់បញ្ជាក់ប្រាប់ប្រទេសជាតិថា ការលះបង់របស់កងទ័ពរបស់យើងនឹងមិនឥតប្រយោជន៍នោះទេ។ ចំពោះយើង សាមគ្គីភាពនិងអធិបតេយ្យភាពរបស់ប្រទេសមានសារៈសំខាន់បំផុត។ ឥណ្ឌាចង់បានសន្តិភាព ក៏ប៉ុន្តែនៅពេលដែលមានការបង្កហេតុ តម្រូវឲ្យមានការឆ្លើយតបចំពោះស្ថានការណ៍នោះ»។
ភាគីទាំង២ បានស្តីបន្ទោសគ្នាទៅវិញទៅមកចំពោះការបង្ករឲ្យមានការប្រឈមមុខហិង្សានៅទីវាលរហោស្ថានទឹកកក គ្មានជីវជាតិនៃជ្រលង Galwan ក្នុងតំបន់ Easter Ladakh។ សេចក្តីលម្អិតនៅតែមានភាពមិនច្បាស់លាស់ ក៏ប៉ុន្តែកងទ័ពបានត្រូវគេរាយការណ៍ថា បានប្រយុទ្ធគ្នាដោយប្រើកាំភ្លើងដៃនិងដុំថ្មក្នុងអំឡុងនៃជម្លោះដែលមានការវាយប្រតប់គ្នា។ តាមសេចក្តីរាយការណ៍របស់បណ្តាញព័ត៌មានឥណ្ឌា បានប្រាប់ឲ្យដឹងថា ទាហានខ្លះបានធ្លាក់ ឬត្រូវបានគេច្រានចូលក្នុងទន្លេ។
នៅក្នុងទីក្រុងប៉េកាំង លោក Zhao Lijian អ្នកនាំពាក្យក្រសួងការបរទេសចិន បាននិយាយថា ចិនមិនចង់ឃើញការប៉ះទង្គិចគ្នាទៀតទេនៅតាមព្រំដែនជាមួយឥណ្ឌា ហើយភាគីទាំង២ បានទាក់ទងយ៉ាងជិតដិត ដើម្បីដោះស្រាយស្ថានការណ៍នេះតាមរយៈបណ្តាញការទូតនិងយោធា។
គូប្រជែងអាស៊ីទាំង២នេះ បានដាក់ពង្រាយកងទ័ពបន្ថែមរាប់ពាន់នាក់និងកាំភ្លើងធំក្នុងប៉ុន្មានសប្តាហ៍ថ្មីៗនេះ នៅពេលដែលភាពតានតឹងផ្ទុះឡើងបន្ទាប់ពីឥណ្ឌា ចោទប្រកាន់ទាហានចិនថា បានចូលក្នុងអ្វីដែលគេស្គាល់ថាជាខ្សែត្រួតត្រា៕
