ប្រធានគោលនយោបាយការបរទេសសហភាពអឺរ៉ុបលោក Josep Borrell នឹងធ្វើទស្សនកិច្ចទៅកាន់ទីក្រុងមូស្គូ ប្រទេសរុស្ស៊ី នៅដើមខែក្រោយ ដើម្បីដាក់សម្ពាធលើរដ្ឋាភិបាលរុស្ស៊ី ទាក់ទិននឹងការចាប់ខ្លួនមេដឹកនាំបក្សប្រឆាំងរុស្ស៊ីលោក Alexei Navalny ស្របពេលដែលសហភាពអឺរ៉ុបពិចារណាដាក់ទណ្ឌកម្មថ្មីលើរុស្ស៊ី។ នេះបើតាមការលើកឡើងរបស់ក្រុមមន្ត្រីការទូត កាលពីថ្ងៃច័ន្ទ។
មន្ត្រីការទូតជាន់ខ្ពស់ម្នាក់បានថ្លែងប្រាប់ទីភ្នាក់ងារព័ត៌មាន AFP ថា៖ «លោក Borrell នឹងធ្វើទស្សនកិច្ចទៅកាន់ទីក្រុងមូស្គូ នៅដើមខែកុម្ភៈខាងមុខនេះ ដើម្បីបញ្ជូនសារយ៉ាងច្បាស់មួយពីសហភាពអឺរ៉ុប [ទៅកាន់រុស្ស៊ី]»។ ក៏ប៉ុន្តែកាលពីមុននេះ មានការអំពាវនាវពីប្រទេសជាសមាជិកមួយចំនួនរបស់សហភាពអឺរ៉ុបឲ្យលុបចោលទស្សនកិច្ចនេះ។
ដំណើរទស្សនកិច្ចនេះត្រូវបានបញ្ជាក់ថាពិតជាដូច្នេះមែន នៅក្នុងអំឡុងពេលនៃកិច្ចប្រជុំមួយនៅក្នុងទីក្រុងប៊្រុចសែល ប្រទេសប៊ែលហ្សិក។ នៅក្នុងកិច្ចប្រជុំនោះ រដ្ឋមន្ត្រីការបរទេសមកពីប្រទេសជាសមាជិកសហភាពអឺរុបទាំង ២៧ បានជជែកដេញដោលគ្នាអំពីវិធានការរបស់ពួកគេចំពោះការចាប់ខ្លួនលោក Navalny ដែលជាអ្នករិះគន់រដ្ឋាភិបាលរុស្ស៊ី និងចំពោះការបង្ក្រាបរបស់រដ្ឋាភិបាលរុស្ស៊ីលើក្រុមបាតុករ។
មន្ត្រីការទូតម្នាក់បាននិយាយថា ក្រុមមន្ត្រីការទូតទាំងនោះបានពិភាក្សាគ្នាអំពីការដាក់ទណ្ឌកម្មលើរដ្ឋាភិបាលរុស្ស៊ី បន្ទាប់ពីមានសម្ពាធពីប្រទេសជាសមាជិកសហភាពអឺរ៉ុបមួយចំនួនឲ្យដាក់ទណ្ឌកម្មធ្ងន់ធ្ងរ ប៉ុន្តែក្រោយមកបានសម្រេចថា វា «លឿនពេក» ក្នុងការដាក់ទណ្ឌកម្មបែបនេះ។
មន្ត្រីការទូតអឺរ៉ុបបាននិយាយកាលពីមុនថា សហភាពអឺរ៉ុបត្រូវគេរំពឹងថានឹងមិនទាន់ដាក់ទណ្ឌកម្មលើប្រទេសរុស្ស៊ីទេ រហូតទាល់តែដល់ពេលដែលលោក Navalny ត្រូវបញ្ជូនទៅតុលាការនៅថ្ងៃទី ២ ខែកុម្ភៈខាងមុខនេះ ដើម្បីរង់ចាំមើលថា តើរដ្ឋាភិបាលរុស្ស៊ីនឹងកាត់ទោសលោកដាក់ពន្ធនាគារយូរប៉ុណ្ណា។
លោក Navalny ប្រឈមនឹងការជាប់ពន្ធនាគារ ៣ ឆ្នាំកន្លះ ចំពោះការបំពាននឹងលក្ខខណ្ឌព្យួរទោសក្នុងអំឡុងពេលដែលលោកទទួលការព្យាបាលនៅប្រទេសអាល្លឺម៉ង់ ទាក់ទិននឹងរឿងបំពុលរូបលោក។
ការចាប់ខ្លួនលោកពេលលោកត្រឡប់ទៅប្រទេសរុស្ស៊ីវិញនោះ បានបង្កឲ្យមានការធ្វើបាតុកម្មកាលពីថ្ងៃសៅរ៍ ដោយប៉ូលិសបានចាប់ឃុំខ្លួនបាតុករជាង ៣.៥០០ នាក់។
សហភាពអឺរ៉ុបបានអំពាវនាវឲ្យមានការដោះលែងលោក Navalny និងក្រុមបាតុករដែលត្រូវបានចាប់ខ្លួនទាំងអស់នោះជាបន្ទាន់៕
