ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេបក្ស​ប្រឆាំង​រុស្ស៊ី អំពាវនាវ​ឱ្យ​មាន​ការតវ៉ា​ប្រឆាំង​នៅ​តាម​ផ្លូវ បន្ទាប់ពី​លោក​ត្រូវ​ជាប់​ពន្ធនាគារ


ក្នុង​រូប​ដែល​ថត​ចេញ​ពី​វីដេអូ​ដែល​បាន​បង្ហោះ​តាម​បណ្តាញ​សង្គម​នេះ បង្ហាញ​លោក Alexei Navalny មេដឹកនាំ​បក្ស​ប្រឆាំង​រុស្ស៊ី និយាយ​នៅ​ពេល​ដែល​លោក​ស្ថិត​ក្នុង​ស្ថានីយ​ប៉ូលិស​ក្នុង​ទីក្រុង Khimki នៃ​ប្រទេស​រុស្ស៊ី កាលពី​ថ្ងៃចន្ទ ទី១៨ ខែមករា ឆ្នាំ២០២១។
ក្នុង​រូប​ដែល​ថត​ចេញ​ពី​វីដេអូ​ដែល​បាន​បង្ហោះ​តាម​បណ្តាញ​សង្គម​នេះ បង្ហាញ​លោក Alexei Navalny មេដឹកនាំ​បក្ស​ប្រឆាំង​រុស្ស៊ី និយាយ​នៅ​ពេល​ដែល​លោក​ស្ថិត​ក្នុង​ស្ថានីយ​ប៉ូលិស​ក្នុង​ទីក្រុង Khimki នៃ​ប្រទេស​រុស្ស៊ី កាលពី​ថ្ងៃចន្ទ ទី១៨ ខែមករា ឆ្នាំ២០២១។

លោក Alexei Navalny អ្នក​រិះគន់​រដ្ឋាភិបាលវិមាន​ក្រឹមឡាំង​របស់​រុស្ស៊ី​កាលពី​ថ្ងៃ​ចន្ទ​ម្សិលមិញ បាន​ជំរុញ​ពលរដ្ឋ​រុស្ស៊ី​ឱ្យ​ចេញ​មក​តាម​ផ្លូវ​នានា​ដើម្បី​តវ៉ាប្រឆាំង ​បន្ទាប់​ពី​ចៅក្រម​ម្នាក់​បាន​បញ្ជូន​លោក​ទៅ​កាន់​ពន្ធនាគារ​ឱ្យ​ជាប់ពន្ធនាគារ​រយៈ​ពេល៣០​ថ្ងៃ​ មុន​ការ​កាត់ទោស​ ថ្វី​បើ​មាន​ការ​អំពាវនាវ​មក​ពី​បណ្តា​ប្រទេស​លោក​ខាង​លិច​ឱ្យ​ដោះលែង​អ្នក​នយោបាយ​គណបក្ស​ប្រឆាំង​នេះ​ក៏ដោយ។ នេះ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។

ការ​សម្រេច​ដើម្បី​បញ្ជូន​លោក​ទៅ​កាន់​មន្ទីរ​ឃុំឃាំង​ចំពោះ​ការ​រំលោភ​លក្ខខណ្ឌ​នៃ​ការ​កាត់ទោស​ដែល​ត្រូវ​បាន​ព្យួរ​ទោស​នោះ កើត​មាន​ឡើង​មួយ​ថ្ងៃ​បន្ទាប់​ពី​លោក​បាន​វិលត្រឡប់​មក​កាន់​ប្រទេស​រុស្ស៊ី​វិញ​ជា​លើក​ទី១ ចាប់​តាំង​ពី​លោក​បាន​ត្រូវ​គេ​បំពុល​ដោយ​ឧស្ម័ន​ធ្វើ​ឱ្យ​ខូច​សរសៃប្រសាទ​កាល​ពីពាក់​កណ្តាលឆ្នាំមុន និង​អាច​ធ្វើ​ឱ្យ​លោក​ជាប់​ពន្ធនាគារ​ច្រើន​ឆ្នាំ។​

នៅ​ពេល​ដែល​លោក Navalny បាន​ត្រូវ​គេ​នាំ​ចេញ​ពី​ស្ថានីយ​ប៉ូលិស​មក លោក​បាន​ប្រាប់​ក្រុម​អ្នក​គាំទ្រ​លោក​ថា អ្វី​ដែល​ពួកគេ​ត្រូវ​ខ្លាច​នោះ គឺ​សេចក្តី​ភ័យខ្លាច​របស់​ខ្លួន​ផ្ទាល់តែ​ប៉ុណ្ណោះ។

លោក Navalny បាន​បញ្ចាក់​នៅ​ក្នុង​វីដេអូ​ដែល​បាន​ចុះផ្សាយ​ក្នុង Twitter ថា៖ «សូម​កុំខ្លាច ចូរ​ចេញមក​តាម​ផ្លូវ​នានា។ ចូរ​កុំ​ចេញ​មក​ក្រៅ​ដើម្បី​ខ្ញុំ ចេញ​មក​ក្រៅ​ដើម្បី​ខ្លួន​អ្នក​ និង​អនាគត​របស់​អ្នក»។

ក្រុម​អ្នក​គាំទ្រ មាន​គម្រោង​ធ្វើ​បាតុកម្ម​នៅ​ទូទាំង​ប្រទេស​នៅ​ថ្ងៃ​សៅរ៍​នេះ ហើយ​ពាក្យសុំ​ធ្វើបាតុកម្ម​ដែល​មាន​មនុស្ស​ចូលរួម​១០.០០០​នាក់​នៅ​ចុង​ខែ​នេះ ត្រូវ​បាន​ដាក់​ជាមួយ​អាជ្ញាធរ​ក្រុង​ម៉ូស្គូ​រួច​ហើយ៕

XS
SM
MD
LG