ភ្ជាប់​ទៅ​គេហទំព័រ​ទាក់ទង

ប្រទេស​ជប៉ុន​ធ្វើ​ការ​បោះ​ឆ្នោត​សភា​ក្រុង​តូក្យូ​នៅ​ថ្ងៃ​អាទិត្យ​នេះ


រដ្ឋាភិបាល​តូក្យូ Tokyo អ្នកស្រី Yuriko Koike ថ្លែង​ក្នុង​សន្និសីទកាសែត​មួយ​នៅ​ការិយាល័យ​រដ្ឋាភិបាល​តូក្យូ​កាល​ពី​ថ្ងៃទី​២៥ មករា ២០១៧។

ប្រជាពលរដ្ឋ​ជប៉ុន​នៅ​ក្នុង​ទីក្រុង​តូក្យូ បាន​ចេញ​ទៅ​បោះ​ឆ្នោត​នៅ​ថ្ងៃ​អាទិត្យ​នេះ ដើម្បី​ជ្រើសរើស​សមាជិក​សភា​ក្រុង​តូក្យូ​ចំនួន ១២៧ រូប។

ការ​បោះ​ឆ្នោត​នេះ​អាច​ធ្វើ​ឲ្យ​ប្រែប្រួល​ដល់​នយោបាយ​ថ្នាក់​ជាតិ​របស់​ជប៉ុន ដោយសារតែ​លោកស្រី Yuriko Koike ដែល​ជា​អភិបាល​ក្រុង​តូក្យូ​ដ៏​មាន​ប្រជាប្រិយភាព​មួយ​រូប មាន​គោល​បំណង​ពង្រឹង​មូលដ្ឋាន​គាំទ្រ​របស់​លោកស្រី និង​ប្រជែង​ជាមួយ​នឹង​គណបក្ស​កាន់​អំណាច​របស់​លោក​នាយករដ្ឋមន្ត្រី Shinzo Abe ដែល​ពោរពេញ​ដោយ​រឿង​អាស្រូវ។

លោក Shinzo Abe កំពុង​ប្រឈម​នឹង​ការ​ចោទ​ប្រកាន់​ដែល​ថា លោក​បាន​បង្ហាញ​ការ​អនុគ្រោះ​យោគយល់​ដល់​មិត្តភ័ក្ដិ​របស់​លោក​មួយ​រូប នៅ​ក្នុង​កិច្ច​ព្រមព្រៀង​ពាណិជ្ជកម្ម​មួយ។

កន្លង​មក លទ្ធផល​នៃ​ការ​បោះ​ឆ្នោត​ប្រចាំ​ក្រុង​តូក្យូ​កាល​ពី​លើក​មុនៗ អាច​ផ្ដល់​ជា​សញ្ញា​ទស្សន៍ទាយ​ឲ្យ​ដឹង​អំពី​ការ​បោះ​ឆ្នោត​ថ្នាក់​ជាតិ​បាន។ មាន​ពាក្យ​លេច​ឭ​ថា លោកស្រី Koike មាន​គោល​បំណង​ចង់​ឈរ​ឈ្មោះ​ជា​នាយករដ្ឋមន្ត្រី។

លោកស្រី Koike វ័យ ៦៤ ឆ្នាំ រូប​នេះ ធ្លាប់​ធ្វើ​ជា​សមាជិក​មួយ​រូប​នៃ​គណបក្ស​ប្រជាធិបតេយ្យ​សេរី (Liberal Democratic Party) របស់​លោក​នាយករដ្ឋមន្ត្រី Shinzo Abe មុន​ពេល​លោកស្រី​ងាក​មក​បង្កើត​គណបក្ស​របស់​លោកស្រី​ផ្ទាល់ ដែល​មាន​ឈ្មោះ​ថា ‍«គិត​ពី​ប្រជាពលរដ្ឋ​ក្រុង​តូក្យូ​មុន​គេ​បង្អស់»។

លោកស្រី Koike ដែល​ជា​អតីត​អ្នក​និយាយ​ព័ត៌មាន​តាម​ទូរទស្សន៍ បាន​ក្លាយជា​អភិបាល​ក្រុង​តូក្យូ​ជា​ស្ត្រី​ដំបូង​គេ​បង្អស់​កាល​ពី​ឆ្នាំ​មុន ហើយ​កន្លង​មក​លោកស្រី​ទទួល​បាន​ការ​គាំទ្រ​ចំនួន​ប្រហែល ៦០ ភាគរយ៕

XS
SM
MD
LG