រដ្ឋមន្រ្តីការបរទេសសហរដ្ឋអាមេរិកលោក Rex Tillerson បានអះអាងជាថ្មីម្តងទៀតអំពីការប្តេជ្ញារបស់សហរដ្ឋអាមេរិកចំពោះទ្វីបអាហ្វិ្រក នៅក្នុងកិច្ចខំប្រឹងប្រែងដើម្បីបញ្ចប់ភាពចម្រូងចម្រាសដែលបង្កឡើងដោយការប្រមាថរបស់លោកប្រធានាធិបតិ Donald Trump ដែលត្រូវបានគេរាយការណ៍ទៅលើទ្វីបមួយនេះ។
នៅក្នុងជំនួបរវាងអ្នកការទូតជាន់ខ្ពស់សហរដ្ឋអាមេរិកជាមួយនឹងប្រធានគណកម្មការសហភាពអាហ្វ្រិកលោក Moussa Fakiកាលពីថ្ងៃព្រហស្បតិ៍ធ្វើឡើងបន្ទាប់ពីលោក Trump ត្រូវបានគេរាយការណ៍ថាបានប្រើពាក្យប្រមាថលើប្រទេសហៃទីនិងប្រទេសមួយចំនួនផ្សេងទៀតនៅក្នុងទ្វីបអាហ្វ្រិកកាលពីពីរខែកន្លងទៅ។ ទាំងសហភាពអាហ្វ្រិក និងរដ្ឋាភិបាលអាហ្វ្រិកនិយាយថាពួកគេមានការខឹងសម្បាយ៉ាងខ្លាំងពាក់ព័ន្ធនឹងការប្រមាថនេះ។
នៅក្នុងសន្និសីទរួមគ្នាជាមួយលោក Faki នៅឯទីស្នាក់ការកណ្តាលសហភាពអាហ្រ្វិកនៅក្នុងទីក្រុង Addis Ababa ប្រទេសអេត្យូពី លោក Tillerson បានថ្លែងថា«ខ្ញុំគិតថាការប្តេជ្ញារបស់សហរដ្ឋអាមេរិកចំពោះអាហ្វ្រិកគឺបានបង្ហាញយ៉ាងច្បាស់អំពីសារៈសំខាន់នៃទំនាក់ទំនងរបស់ប្រទេសយើងទាំងពីរ។ លោកប្រធានាធិបតីបានសរសេរលិខិតផ្ទាល់ខ្លួនមួយទៅកាន់សហភាពអាហ្វ្រិក»។
លោក Faki បាននិយាយថា លោកបានទទួលលិខិតដែលមានកាលបរិច្ឆេទតាំងពីថ្ងៃទី២៥ ខែមករា ហើយបានចាត់ទុកឧបទ្ទេវហេតុនោះថាជារឿងអតីតកាល។
លោក Faki បានបន្ថែមថាទស្សនៈកិច្ចរបស់អ្នកការទូតជាន់ខ្ពស់សហរដ្ឋអាមេរិកគឺជាភស្ភុតាងបង្ហាញថាទំនាក់ទំនងរវាងអាហ្វ្រិក និងសហរដ្ឋអាមេរិកផ្អែកលើភាពជាក់ស្តែង»។ លោក Tillersonថ្លែងថាការលើកកម្ពស់សន្តិភាពនិងសន្តិសុខ ការអភិវឌ្ឍន៍ និងពាណិជ្ជកម្ម គឺជាគោលដៅទាំងបីនៃយុទ្ធសាស្រ្តរបស់រដ្ឋាភិបាលក្រុងវ៉ាស៊ីនតោនចំពោះទ្វីបអាហ្វិ្រក៕
