មុននឹងចេញដំណើរទៅធ្វើទស្សនកិច្ចជាផ្លូវការទៅតំបន់អាហ្វ្រិក លោក Rex Tillerson រដ្ឋមន្ត្រីការបរទេសសហរដ្ឋអាមេរិកបានថ្លែងកាលពីថ្ងៃអង្គារថា សហរដ្ឋអាមេរិកប្តេជ្ញាថានឹងកសាង «ទំនាក់ទំនងរឹងមាំជាមួយនឹងអាហ្វ្រិក» និងបានរិះគន់ប្រទេសចិនពីការ «លើកទឹកចិត្តឲ្យមានការពឹងផ្អែកគេ» នៅក្នុងរបៀបដោះស្រាយរបស់ខ្លួននៅក្នុងតំបន់អាហ្វ្រិក។
នៅក្នុងសុន្ទរកថាជាលើកទី១របស់លោក ដែលបានរៀបរាប់អំពីគោលនយោបាយរបស់រដ្ឋាភិបាលអាហ្វ្រិក លោក Tillerson បាននិយាយថាសហរដ្ឋអាមេរិកចង់កាត់បន្ថយរបាំងក្នុងការធ្វើពាណិជ្ជកម្ម និងការវិនិយោគនៅក្នុងតំបន់អាហ្វ្រិក ដែលចិនគឺជាដៃគូពាណិជ្ជកម្មធំជាងគេតាំងពីដើមរៀងមកនៅក្នុងតំបន់នេះ។ លោកបានបន្ថែមទៀតថាវិធីសាស្ត្ររបស់សហរដ្ឋអាមេរិកគឺលើកទឹកចិត្តឲ្យមានអភិបាលកិច្ចល្អ» ដែលផ្ទុយទាំងស្រុងពីវិធីសាស្ត្ររបស់ចិនដែល «លើកទឹកចិត្តឲ្យមានការពឹងផ្អែកគេ តាមរយៈការប្រើប្រាស់កិច្ចសន្យាដែលស្រពេចស្រពិល ការផ្តល់កម្ចីដែលមានការកេងប្រវ័ញ្ជ និងកិច្ចព្រមព្រៀងពុករលួយ ដែលធ្វើឲ្យប្រទេសធ្លាក់ចូលក្នុងបំណុល និងបាត់បង់ដែនអធិបតេយ្យភាពរបស់ខ្លួន។
ដំណើរទស្សនកិច្ចរបស់លោក Tillerson ដែលមានរយៈពេល១សប្តាហ៍ទៅកាន់ប្រទេសចំនួន៥ នឹងផ្តោតសំខាន់ទៅលើការប្រឆាំងអំពើភេរវកម្ម លើកកម្ពស់សន្តិភាព អភិបាលកិច្ចល្អ ពាណិជ្ជកម្ម និងការធ្វើវិនិយោគទុន។ ថ្លែងទៅកាន់អ្នកចូលរួមនៅក្នុងសកលវិទ្យាល័យ George Mason ខាងក្រៅរដ្ឋធានីវ៉ាស៊ីតោន លោក Tillerson បានថ្លែងក្នុងសម្តីដើមថា៖ «សន្តិសុខ និងភាពរីកចម្រើននៃសេដ្ឋកិច្ចរបស់ប្រទេសយើងនឹងភ្ជាប់ទៅតំបន់អាហ្វ្រិកដែលមិនដែលធ្លាប់ធ្វើពីមុនមក»៕
