រដ្ឋមន្ត្រីការបរទេសសហរដ្ឋអាមេរិកលោក Rex Tillerson បានធ្វើទស្សនកិច្ចផ្លូវការលើកដំបូងទៅកាន់ទីក្រុងកៀវ ប្រទេសអ៊ុយក្រែន នៅថ្ងៃអាទិត្យនេះ ដើម្បីជួបពិភាក្សាជាមួយនឹងប្រធានាធិបតីអ៊ុយក្រែនលោក Petro Poroshenko អំពីវិធានការនានា ដើម្បីជួយបញ្ចប់ជម្លោះនៅក្នុងតំបន់ភាគខាងកើតប្រទេសអ៊ុយក្រែន និងគាំទ្រដល់កិច្ចខិតខំប្រឹងប្រែងធ្វើកំណែទម្រង់ ដែលកំពុងតែបន្តធ្វើនៅក្នុងប្រទេសអ៊ុយក្រែន។
ដោយយោងទៅលើកិច្ចព្រមព្រៀងឈប់វាយប្រយុទ្ធគ្នា ដែលរដ្ឋាភិបាលរុស្ស៊ី និងរដ្ឋាភិបាលអ៊ុយក្រែនឯកភាពគ្នាកាលពីឆ្នាំ ២០១៥ លោក Tillerson បានបញ្ជាក់នៅក្នុងសេចក្ដីប្រកាសមួយកាលពីថ្ងៃសុក្រម្សិលម្ង៉ៃថា៖ «សហរដ្ឋអាមេរិកនៅតែប្ដេជ្ញាពេញទំហឹងចំពោះគោលបំណងនៃកិច្ចព្រមព្រៀងសន្តិភាពទីក្រុង Minsk»។
កាលពីពេលថ្មីៗនេះ លោក Tillerson បានតែងតាំងលោក Kurt Volker អតីតអគ្គរដ្ឋទូតសហរដ្ឋអាមេរិកប្រចាំអង្គការអូតង់ ឲ្យធ្វើជាតំណាងពិសេសសម្រាប់ការចរចាបញ្ហាអ៊ុយក្រែន។
លោក Volker ដែលធ្វើដំណើរទៅកាន់ប្រទេសអ៊ុយក្រែនជាមួយនឹងលោក Tillerson ដែរនោះ នឹងចូលរួមជាប្រចាំជាមួយនឹងគ្រប់ភាគីទាំងអស់ពាក់ព័ន្ធនឹងការចរចាបញ្ហាអ៊ុយក្រែន ដែលហៅថាក្រុមទាក់ទង Normandy មានដូចជាប្រទេសអាល្លឺម៉ង់ បារាំង រុស្ស៊ី និងអ៊ុយក្រែន។
អ្នកស្រី Heather Nauert អ្នកនាំពាក្យក្រសួងការបរទេសសហរដ្ឋអាមេរិក បានបញ្ជាក់ថា សហរដ្ឋអាមេរិកនឹងមិនដើរថយក្រោយ ពាក់ព័ន្ធនឹងបញ្ហាដែលរុស្ស៊ីគាំទ្រពួកឧទ្ទាមនៅក្នុងតំបន់ភាគខាងកើតប្រទេសអ៊ុយក្រែននោះទេ៕
