អង្គការ UNHCR រាយការណ៍ថា មានជនភៀសខ្លួនកុងហ្គោប្រហែល៣០០នាក់ កំពុងឆ្លងកាត់ព្រំដែនចូលក្នុងប្រទេសអ៊ូហ្គាន់ដាជារៀងរាល់ថ្ងៃ ដែលចំនួននេះកើនឡើងជាងពីរដង បើធៀបទៅនឹងចំនួនជនភៀសខ្លួនកាលពីខែឧសភា។ ជនភៀសខ្លួនភាគច្រើនកំពុងភៀសខ្លួនឆ្លងកាត់ទន្លេ Lake Albert ពីខេត្ត Ituri ជាទីកន្លែងដែលមានការប៉ះទង្គិចជាថ្មីរវាងក្រុម Hema និងក្រុម Lendu ដែលបានបណ្តាលឲ្យមនុស្ស៣សែននាក់បាត់បង់ទីជម្រកនៅក្នុងខែមិថុនា។
អ្នកនាំពាក្យអង្គការ UNHCR លោក Andrej Mahecic បានថ្លែងថា ក្រុមជនភៀសខ្លួន ដែលបានធ្វើដំណើរមកដល់ប្រទេសអ៊ូហ្គាន់ដាបាននិយាយថា ពួកគេភៀសខ្លួនគេចចេញពីអំពើសាហាវព្រៃផ្សៃនៅក្នុងភូមិកំណើតរបស់ពួកគេ។
លោក Andrej Mahecic បានថ្លែងថា៖ «ក្រុមប្រដាប់អាវុធត្រូវបានគេរាយការណ៍ថា គឺជាអ្នកដែលបានវាយប្រហារនៅក្នុងភូមិ លួចប្លន់ទ្រព្យសម្បត្តិ និងដុតបំផ្លាញផ្ទះរបស់អ្នកភូមិ និងបានសម្លាប់បុរស ស្រ្តី និងកុមារ។ ពួកជនភៀសខ្លួនខ្លះបានធ្វើដំណើរដោយយករបស់មានតម្លៃមកជាមួយ ដោយពួកគេខ្លាចថាមិនអាចវិលត្រឡប់ទៅផ្ទះរបស់ពួកគេវិញបាន។ ជនភៀសខ្លួនផ្សេងទៀតដែលបានរត់ភៀសខ្លួនដោយសារស្ថានភាពគ្រោះថ្នាក់មានសម្លៀកបំពាក់តិចតួចប៉ុណ្ណោះយកមកជាមួយ។ ជិត២ភាគ៣នៃជនភៀសខ្លួនគឺជាកុមារ។ ពួកគេទាំងនោះមានអាយុក្រោម១៨ឆ្នាំ»។
លោក Mahecic បាននិយាយថា នៅតាមជំរំជនភៀសខ្លួនក្នុងប្រទេសអ៊ូហ្គាន់ដាពោរពេញទៅដោយជនភៀសខ្លួនយ៉ាងច្រើនសន្ធឹកសន្ធាប់។ លោកបានថ្លែងបន្ថែមថាជនភៀសខ្លួនដែលបានឆ្លងចូលមកដល់ប្រទេសអ៊ូហ្គាន់ដា បានទទួលការពិនិត្យសុខភាព។ លោកបានថ្លែងបន្តថា ជនភៀសខ្លួនជាច្រើនត្រូវការការថែទាំផ្នែកវេជ្ជសាស្រ្តដើម្បីព្យាបាលរបួស ខណៈពេលដែលពួកគេកំពុងរត់គេចពីអំពើហិង្សា។
លោក Mahecic បានប្រាប់ VOA ថា ពួកគេក៏ត្រូវបានពិនិត្យមើលរកមេរោគអេបូឡាផងដែរ។ ខេត្ត Ituri និងខេត្ត North Kivu នៃសាធារណៈរដ្ឋប្រជាធិបតេយ្យកុងហ្គោ កំពុងប្រឈមនឹងការផ្ទុះរាលដាលនៃជំងឺអេបូឡា។
លោក Mahecic បានបញ្ជាក់ថា «កន្លែងពិនិត្យសុខភាពនេះត្រូវបានដាក់នៅកន្លែងដែលពួកជនភៀសខ្លួនធ្វើដំណើរឆ្លងកាត់ ដើម្បីពិនិត្យសុខភាពរបស់ពួកគេ និងរកមើលមេរោគអេបូឡា ដែលជនភៀសខ្លួនអាចឆ្លងមកជាមួយ។ មកទល់នឹងពេលនេះយើងមិនទាន់ពិនិត្យឃើញមានអ្នកឆ្លងមេរោគអេបូឡានៅឡើយទេ»។
លោក Mahecic បានថ្លែងទៀតថា ជម្រកនិងជំនួយសង្គ្រោះបន្ទាន់នានាកំពុងត្រូវការជាចាំបាច់។ លោកបានថ្លែងបន្តថា ជនភៀសខ្លួនភាគច្រើនក៏ត្រូវការជំនួយប្រឹក្សាផ្នែកចិត្តសាស្រ្តចាំបាច់ផងដែរ ដើម្បីជួយឲ្យពួកគេរួចផុតពីជំងឺបាក់ស្បាតដោយសារបទពិសោធន៍ដ៏ឈឺចាប់ទាំងនេះ។
លោក Mahecic បានបញ្ជាក់ប្រាប់ថា ជាអកុសលទីភ្នាក់ងារផ្តល់ជំនួយមនុស្សធម៌គ្មានលទ្ធភាពផ្តល់ជំនួយចាំបាច់នានាបានទេ ក្នុងពេលឥឡូវនេះ ដោយសារតែពួកគេខ្វះថវិកា។ លោកនិយាយបន្តថា សហគមន៍អន្តរជាតិបានផ្តល់ជំនួយបានតែ១៧ភាគរយនៃថវិកាដែលត្រូវការចំនួន១៥០លានដុល្លារតែប៉ុណ្ណោះ ដែលអង្គការសហប្រជាជាតិបានអំពាវនាវរក ដើម្បីជួយដល់ពួកជនភៀសខ្លួននៅក្នុងប្រទេសអ៊ូហ្គាន់ដា៕
ប្រែសម្រួលដោយ ស៊ូ ពេជ្រចិន្តា
