មនុស្សរាប់ពាន់នាក់បានតវ៉ានៅខាងក្រៅស្ថានទូតសហរដ្ឋអាមេរិកប្រចាំទីក្រុងហ្សាការតា ប្រទេសឥណ្ឌូណេស៊ីនៅថ្ងៃអាទិត្យនេះ ដើម្បីប្រឆាំងនឹងការសម្រេចចិត្តរបស់ប្រធានាធិបតីអាមេរិកលោក Donald Trump ក្នុងការទទួលស្គាល់ទីក្រុង Jerusalem ជារដ្ឋធានីរបស់អ៊ីស្រាអែល។ អ្នកតវ៉ាភាគច្រើនបានគ្រវីបដាដែលមានសរសេរអក្សរថា «ប៉ាឡេស្ទីនគឺស្ថិតនៅក្នុងបេះដូងរបស់យើង»។
មេដឹកនាំនានានៅក្នុងប្រទេសឥណ្ឌូណេស៊ី ដែលជាប្រទេសមានប្រជាជនជាអ្នកកាន់សាសនាឥស្លាមច្រើនជាងគេបំផុតនៅលើពិភពលោក ក៏បានថ្កោលទោសការទទួលស្គាល់របស់លោក Trump ដូចនេះផងដែរ ដូចដែលមេដឹកនាំនានានៅលើពិភពលោក ដែលក្នុងនោះមានទាំងសម្ព័ន្ធមិត្តបស្ចិមប្រទេសរបស់សហរដ្ឋអាមេរិកជាដើម បានរិះគន់ថា វិធានការនេះបានធ្វើឲ្យប៉ះពាល់យ៉ាងធ្ងន់ធ្ងរដល់កិច្ចប្រឹងប្រែងសន្តិភាពរវាងអ៊ីស្រាអែល និងប៉ាឡេស្ទីន និងអាចបង្កឲ្យមានអំពើហិង្សាបន្ថែមទៀត។
មនុស្សរាប់ពាន់នាក់នៅក្នុងបណ្ដាប្រទេសនានាដែលមានប្រជាជនភាគច្រើនកាន់សាសនាឥស្លាម នៅទ្វីបអាស៊ី បានប្រមូលផ្ដុំគ្នាតវ៉ាប្រឆាំងនឹងវិធានការរបស់សហរដ្ឋអាមេរិក នៅក្នុងរយៈពេលប៉ុន្មានថ្ងៃចុងក្រោយនេះ។
អ៊ីស្រាអែលនៅតែអះអាងថា ផ្នែកទាំងមូលនៃទីក្រុង Jerusalem ជារដ្ឋធានីរបស់ខ្លួន។ ចំណែកឯប៉ាឡេស្ទីនវិញចង់បានតំបន់ភាគខាងកើតនៃទីក្រុង Jerusalem ធ្វើជារដ្ឋធានីរបស់ខ្លួននៅថ្ងៃអនាគតនៅពេលដែលខ្លួនក្លាយជារដ្ឋឯករាជ្យមួយ។
រដ្ឋមន្ត្រីការបរទេសឥណ្ឌូណេស៊ីបានចាកចេញទៅកាន់ប្រទេសហ្ស៊កដានីនៅថ្ងៃអាទិត្យនេះ ដើម្បីជួបជាមួយនឹងរដ្ឋមន្ត្រីការបរទេសប៉ាឡេស្ទីន និងរដ្ឋមន្ត្រីការបរទេសហ៊្សកដានី ក្នុងគោលបំណងដើម្បីបញ្ជាក់អំពីការគាំទ្រពេលទំហឹងរបស់ឥណ្ឌូណេស៊ីចំពោះប៉ាឡេស្ទីន៕
