ថ្ងៃអង្គារម្សិលមិញជាកំណត់ខួបឆ្នាំទី៣០ នៃមហន្តរាយបរមាណូ Chernobyl ដែលនៅពេលនោះ ការផ្ទុះមួយនៅឯរោងចក្រថាមពលមួយនៅជិតក្រុងChernobyl បានធ្វើឱ្យមានផលប៉ះពាល់ធ្ងន់ធ្ងរដល់តំបន់ធំធេងមួយហើយបានបញ្ជូនពពកវិទ្យុសកម្មទៅទូទាំងពិភពលោក។
នៅក្នុងមហន្តរាយនោះ មនុស្សពីរនាក់បានស្លាប់ជាបន្ទាន់ ចំណែកឯមនុស្ស២៩នាក់ទៀតបានស្លាប់ក្នុងរយៈពេលប៉ុន្មានសប្តាហ៍បន្ទាប់មក។ គេបានស្ទង់ប្រមាណថា មានមនុស្សរាប់ពាន់នាក់ទៀតបានបាត់បង់ជីវិតដោយសារជំងឺមហារីកនិងជំងឺឯទៀតៗក្នុងរយៈពេលច្រើនឆ្នាំបន្ទាប់មក។
មានសារធាតុអ៊ុយរ៉ាញ៉ូម ជាង២០០តោននៅតែឋិតនៅឡើយនៅក្នុងកន្លែង ម៉ាស៊ីនរ៉េអាក់ទ័រនោះ ដែលនាំឱ្យមានការព្រួយបារម្ភថា ការលេចវិទ្យុសកម្មថ្មីទៀតអាចកើតមានឡើងនៅក្នុងកន្លែងនោះដែលបានត្រូវចាត់ទុកថាគ្មានសុវត្ថិភាពយ៉ាងហោចណាស់រហូតដល់សតវត្សរ៍ក្រោយ។
កាលពីថ្ងៃចន្ទ បណ្តាប្រទេសនិងអង្គការផ្តល់ជំនួយអន្តរជាតិបានសន្យាថានឹងផ្តល់ជំនួយបន្ថែម៩៩លានដុល្លារទៀតដើម្បីកសាងបញ្ចប់កន្លែងស្តុកប្រេងឥន្ធនៈមានសុវត្ថិភាពជាងមុនសម្រាប់ក្រុង Chernobyl។
នៅពេលនេះម៉ាស៊ីនរ៉េអាក់ទ័រ នេះជាកន្លែងសាងសងធំមួយដែលមានប្រដាប់ស្ទូចលេចត្រដែតនៅលើសំណង់សេសសល់នៃរោងចក្រអគ្គិសនីប្រើកម្លាំងបរមាណូនេះ។
កម្រិតវិទ្យុសកម្មនៅតែបណ្តាលឱ្យមានការបញ្ចេញសញ្ញាប្រកាសគ្រោះថ្នាក់ក្នុងពេលបីទសវត្សរ៍ក្រោយការផ្ទុះនៅទីនោះ។
គេបានបន្ទោសការភាន់ច្រឡំរបស់មនុស្សនិងការរចនារ៉េអាក់ទ័រមិនល្អ ថាជាបុព្វហេតុនាំឱ្យមានគ្រោះថ្នាក់នោះនៅក្នុងតំបន់ដែលធ្លាប់ជាសហភាពសូវៀត។នៅក្នុងការធ្វើតេស្តសាកល្បងបិទប្រតិបត្តិការមួយកាលពីព្រឹកថ្ងៃទី២៦ខែមេសាឆ្នាំ១៩៨៦ ការផ្ទុះចំហាយទឹកបានធ្វើឱ្យរបើកដំបូលរ៉េអាក់ទ័រ លេខ៤។ ផ្ទាំងធ្យូងថ្មផុយមានកម្តៅខ្លាំងបំផុតបានធ្លាក់លើកន្លែងនោះហើយសារធាតុវិទ្យុសកម្មតូចៗជាច្រើនបានត្រូវបញ្ចេញទៅក្នុងអាកាស៕