ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សមាគម​ធាង​ត្នោត​អំពាវនាវ​កុំ​ឲ្យ​មាន​ការ​លុប​បឹង​នៅ​ភ្នំពេញ​បន្ត​ទៀត


របាយការណ៍​ «បឹង​ចុង​ក្រោយ​ក្នុង​រាជធានី​ភ្នំពេញ» ចេញ​ផ្សាយដោយអង្គការ​សមាគម​ធាង​ត្នោត។​ (Screenshot)
របាយការណ៍​ «បឹង​ចុង​ក្រោយ​ក្នុង​រាជធានី​ភ្នំពេញ» ចេញ​ផ្សាយដោយអង្គការ​សមាគម​ធាង​ត្នោត។​ (Screenshot)

អង្គការ​សមាគម​ធាង​ត្នោត ​បាន​ចេញ​ផ្សាយ​របាយការណ៍​ចុង​ឆ្នាំ​របស់​ខ្លួន​មួយ ដោយ​អំពាវនាវ​កុំ​ឲ្យ​រដ្ឋាភិបាល​បន្ត​ការ​លុប​បឹង និង​តំបន់​ដី​សើម​ផ្សេង​ទៀត ដោយ​លើក​ឡើង​អំពី​ការ​បាត់បង់​កន្លែង​ស្តុក​ទឹក​ដ៏​សំខាន់​សម្រាប់​ទីក្រុង។

បើ​តាម​របាយការណ៍​ដែល​មាន​ចំណងជើង​ថា ​«បឹង​ចុង​ក្រោយ​ក្នុង​រាជធានី​ភ្នំពេញ»​ ជា​ភាសា​ខ្មែរ កម្រាស់​ជាង​៣០​ទំព័រ ដែល​ចេញ​ផ្សាយ​នៅ​សប្ដាហ៍​នេះ សមាគម​ធាង​ត្នោត​បាន​លើក​ឡើង​ថា៖ «បឹង​និង​តំបន់​ដី​សើម​ក្នុង​រាជធានី​ភ្នំពេញ ជិត​ត្រូវ​បាន​បាត់​បង់​ទាំង​ស្រុង ហើយ​ប្រសិន​បើ​ស្ថានភាព​នេះ នៅ​តែ​បន្ត​ដូច​ការ​ស្មាន​ទុក ទីក្រុង​និង​តំបន់​នៅ​ជុំវិញ​អាច​នឹង​ត្រូវ​រង​គ្រោះ​ពី​ទឹក​ជំនន់​ធ្ងន់ធ្ងរ ការ​បាត់​បង់​ពូជ​ត្រី ការ​បាត់​បង់​អាង​ប្រព្រឹត្តិកម្ម​ទឹក​កខ្វក់​បែប​ធម្មជាតិ និង​ការ​បាត់​បង់​ជីវភាព​រស់​នៅ​របស់​ប្រជាពលរដ្ឋ​នៅ​មូលដ្ឋាន»។

របាយការណ៍​បន្ត​ថា ចាប់​តាំង​ពី​ឆ្នាំ​១៩៩០​មក​ក្នុង​ចំណោម​បឹង​ចំនួន​២៦​ក្នុង​រាជធានី​ភ្នំពេញ មាន​បឹង​ចំនួន​១៦ គឺ​ស្មើ​នឹង​៦០ភាគរយ​នៃ​ផ្ទៃ​ដី​បឹង​ទាំង​អស់ ត្រូវ​បាន​ចាក់​ដី​លុប​បំពេញ និង​បឹង​ចំនួន​១០​ទៀត ត្រូវ​បាន​ចាក់​ដី​លុប​ខ្លះៗ​រួច​ហើយ។ មូលហេតុ​ចម្បង​នៃ​ការ​លុបបឹង​នោះ​គឺ​«បណ្ដាល​មក​ពី​ការ​សាងសង់​បុរី តំបន់​លំនៅដ្ឋាន និង​ទីក្រុង​រណប»។

សមាគម​ធាង​ត្នោត​បាន​រក​ឃើញ​ថា បឹង​ទំពុន១និង​២ និង​បឹង​ជើង​ឯក ត្រូវ​បាន​លុប​ដោយ​ផ្នែក និង​កំពុង​លុប​ផង​ដែរ។ ចំណែក​បឹង​តាមោក ឬ​បឹង​កប់​ស្រូវ​ ក៏​ត្រូវ​បាន​លុប​ខ្លះៗ និង​មិន​មាន​ផែន​ការ​ច្បាស់​លាស់​នោះ​ទេ។

តាម​របាយការណ៍​នោះ តំបន់​ដី​សើមនៅ​រាជធានី​ភ្នំពេញ ក៏​រង​ការ​បាត់​បង់​យ៉ាង​ធ្ងន់ធ្ងរ​ដែរ។ ចន្លោះ​ឆ្នាំ​២០០៣​ដល់​ឆ្នាំ​២០១៩ តំបន់​ដី​សើម​សំខាន់ៗ​ជាង​៤០​ភាគរយ ត្រូវ​បាន​បាត់​បង់ ដោយសារ​ការ​ចាក់​ដី​លុប​បំពេញ ឬ​តាមរយៈ​ការ​ធ្វើ​អនុប្រយោគ និង​ការ​ជួល។

សមាគម​ធាងត្នោត ​បាន​អំពាវនាវ​ដល់​រដ្ឋាភិបាល​កុំ​ឲ្យ​បន្ត​លុប​បឹង និង​តំបន់​ដី​សើម​សំខាន់ៗ ដូច​ជា​បឹង​តា​មោក និង​តំបន់​ដី​សើម​បឹង​ទំពុន ឬ​ជើង​ឯក ដែល​គួរ​ត្រូវ​បាន​អភិរក្ស ក្រោម​ច្បាប់​ពិសេស​ដែល​មាន​ការ​ការ​ពារ​យ៉ាង​តឹងរ៉ឹង។

លោក សឿង សារ៉ន នាយក​ប្រតិបត្តិ​នៃ​អង្គការ​សមាគម​ធាងត្នោត បាន​ថ្លែង​ប្រាប់​VOA​នៅ​ថ្ងៃ​សុក្រ​នេះ​ថា កន្លង​ទៅ ការ​លុប​បឹង​ស្ថិត​ក្នុង​រូបភាព​មួយ​ដែល​គួរ​ឲ្យ​ព្រួយ​បារម្ភ​ ហើយ​របាយការណ៍​នៃ​ការ​វាយ​តម្លៃ​ផល​ប៉ះពាល់​បរិស្ថាន មិន​ត្រូវ​បាន​ដាក់​បង្ហាញ​ជា​សាធារណៈ​នោះ​ទេ។ លោក​បន្ត​ថា​ប្រជា​ពលរដ្ឋ​ដែល​ទទួល​បាន​ផល​ប្រយោជន៍​ពី​បឹង គួរ​ត្រូវ​បាន​អញ្ជើញ​ជា​ដៃ​គូរ​ក្នុង​ការ​ប្រឹក្សា​យោបល់​ជាមួយ​រដ្ឋាភិបាល។

លោក សឿង សារ៉ន បាន​លើក​ឡើង​ថា រដ្ឋាភិបាល​គួរ​តែ​រក្សា​ទុក​បឹង​ដែល​នៅ​សេស​សល់ ដើម្បី​ទុក​ជា​កន្លែង​ស្តុក​ទឹក និង​រក្សា​ប្រព័ន្ធ​អេកូឡូស៊ី​ទីក្រុង​ផង​ដែរ។

លោក​បាន​ថ្លែង​ប្រាប់​VOA​ថា៖

«ផល​ប៉ះពាល់​បរិស្ថាន​វា​មាន​ច្រើន​ណាស់ ទាក់​ទង​នឹង​ការ​លុប​បឹង។ បើ​យើង​ក្រឡេក​មើលទៅ​ប្រទេស​ជិត​ខាង ត្រឹម​វៀតណាម ថៃ​អី គេ​អភិវឌ្ឍ គេ​ទុក​បឹង​នៅ​កណ្ដាល​ទីក្រុង ព្រោះ​វា​រួម​ចំណែក​ច្រើន​ក្នុង​ការ​ផ្ដល់​ប្រព័ន្ធ​អេកូឡូស៊ី​ជួយ​ធ្វើ​ឲ្យ​ទីក្រុង​យើង​ត្រជាក់»។

ប្រជាជន​នៅ​ទីក្រុង​ភ្នំពេញ​មាន​ការ​កើន​ឡើង​ជា​បន្ត​បន្ទាប់។ ​សព្វ​ថ្ងៃ​នេះ​ ​ប្រជាជន​ជាង​២​លាន​នាក់​កំពុង​រស់​នៅ​ភ្នំពេញ។ ​រដ្ឋាភិបាល​ ក៏​បាន​ពង្រីក​ទីក្រុង​នេះ​ដើម្បី​បំពេញ​តម្រូវ​ការ​ដ៏​លើស​លប់​នេះ​ផង​ដែរ។ ការ​លុប​បឹង​កក់​នៅ​កណ្ដាល​រាជធានី​ភ្នំពេញ​ បាន​ក្លាយ​ជា​បញ្ហា​ចម្រូងចម្រាស​មួយ កាល​ពី​ឆ្នាំ​២០០៨។ បឹង​នេះ​ត្រូវ​បាន​គេ​មើល​ឃើញ​ថា ​ជា​កន្លែង​ស្តុក​ទឹក​ជិត​បំផុត​សម្រាប់​ភ្នំពេញ។

អ្នក​នាំ​ពាក្យ​សាលា​រាជធានី​ភ្នំពេញ​គឺ​លោក​ម៉េត មាសភក្តី​ បាន​ថ្លែង​ការពារ​ថា​ការ​លុប​បឹង គឺ​ដើម្បី​ការ​អភិវឌ្ឍ​នៅ​រាជធានី​ភ្នំពេញ។ ប៉ុន្តែ​លោក​ថា​រដ្ឋាភិបាល​បាន​គិត​គូ​អំពី​ផល​ប៉ះពាល់​ទាំង​អស់​ដែល​កើត​មាន ដើម្បី​«ប្រយោជន៍​រួម​ ប្រយោជន៍​សាធារណៈ និង​ប្រយោជន៍​សង្គម​ជាតិ»។

លោក​មាន​ប្រសាសន៍​ថា៖ «ដល់​ពេល​ហ្នឹង តំបន់​ខ្លះ យើង​ត្រូវ​ការ​អភិវឌ្ឍ មិន​អាច​ទុក​វា​ចោល។ ទីតាំង​ខ្លះ មាន​ការ​តាំង​នូវ​លំនៅដ្ឋាន បែប​សំណង់​មិន​រៀបរយ អនាធិបតេយ្យ មិន​មាន​សន្តិសុខ បរិស្ថាន​ល្អ»។

ទាក់ទង​នឹង​បឹង​ដែល​នៅ​សេស​សល់​ក្នុង​រាជធានី​ភ្នំពេញ ដូច​ជា​បឹង​តា​មោក និង​បឹង​ទំពុន អ្នក​នាំ​ពាក្យ​សាលា​រាជធានី​ភ្នំពេញ មាន​ប្រសាសន៍​ថា៖ «អា​ពាក្យ​ថា​ការ​លើក​ឡើង​លុប​បឹង​តា​មោក ខ្ញុំ​មិន​ដឹង​ថា​ជូន[ឆ្លើយ]​ត្រឡប់​ទៅ​វិញ​យ៉ាង​ម៉េច​ទេ។ គាត់​ទៅ​មើល​ជាក់​ស្ដែង​ថា​បាត់​បឹង​ហ្នឹង​ទៅ​ណា​ទៅ បាន​ជា​មាន​ការ​លើក​ឡើង​បាត់​បឹង​តា​មោក លុប​បឹង​តា​មោក ខ្ញុំ​អត់​យល់»។ ប៉ុន្តែ​លោក​ទទួល​ស្គាល់​ថា​ផ្នែក​មួយ​នៃ​បឹងត្រូវ​លុប ដើម្បី​ដោះ​ស្រាយ​បញ្ហា​នៅ​ក្នុង​ទីក្រុង។

លោក​ក៏​បាន​ច្រាន​ចោល​ការ​លើក​ឡើង​ថា​ការ​លុប​បឹង​នៅ​ភ្នំពេញ បាន​ធ្វើ​ឲ្យ​ទីក្រុង​ភ្នំពេញ ងាយ​នឹង​រង​គ្រោះ​នឹង​ការ​លិចលង់ ដោយ​សារ​ទឹក​ភ្លៀង ដែល​តែង​តែ​រង​ការ​រិះគន់​ពី​សាធារណជន។

លោក​មាន​ប្រសាសន៍​ថា៖ «និយាយ​ជាក់​ស្ដែង​ទីក្រុង​ភ្នំពេញ​របស់​យើង ពី​ដើម​ឡើយ ភ្លៀង​លិច​តំបន់​ខ្លះ លេង​សុទ្ធ​តែ​ពីរ​ថ្ងៃ ​បី​ថ្ងៃ។ ឥឡូវ​នេះ បើ​ភ្លៀង​ល្មមៗ កន្លះ​ម៉ោង ទៅ​មួយ​ម៉ោង អស់​ហើយ»។

គួរ​បញ្ជាក់​ថា ជា​បន្ត​បន្ទាប់ ​លោក​នាយក​រដ្ឋមន្ត្រី​ ហ៊ុន សែន បាន​ចាត់​ទុក​ថា ការ​លិច​ផ្លូវ និង​លិច​ផ្ទះ​ពេល​ភ្លៀង​ម្តងៗ​នៅ​រាជធានី​ភ្នំពេញ គឺ​ដោយសារ​ភ្លៀង​ខ្លាំង៕

XS
SM
MD
LG