នាយករដ្ឋមន្រ្តី Prayuth Chan-ochaនៃប្រទេសថៃកំពុងជំរុញឲ្យសាធារណជនកុំឲ្យមានភ័យស្លន់ស្លោ បន្ទាប់ពីប្រទេសនោះបានបញ្ជាក់ពីករណីលើកដំបូងនៃមេរោគ MERS។
លោកបានប្រាប់ក្រុមអ្នកយកព័ត៌មាននៅថ្ងៃសុក្រនេះថា «សូមកុំស្លន់ស្លោ»។ យើង កំពុងគិតគូអំពីបញ្ហានេះ។ ប្រសិនបើជនណាម្នាក់មានការមន្ទិលសង្ស័យអំពីរោគសញ្ញាសូមទាក់ទងជាមួយមន្ទីរពេទ្យ។ យើងត្រូវជួយគ្នាទៅវិញទៅមក ហើយសូមប្រុងប្រយ័ត្ន»។
អ្នកជំងឺបេះដូងម្នាក់មកពីប្រទេសអូម៉ង់ បានបញ្ជាក់កាលពីថ្ងៃព្រហស្បតិ៍ថា នេះជាករណីមេរោគ MERS លើកដំបូងនៅក្នុងប្រទេសថៃ។
នាយករដ្ឋមន្រ្តីថៃនិយាយថា ប្រទេសនេះបានប្រុងប្រៀបយ៉ាងល្អដើម្បីដោះស្រាយស្ថានភាពនេះ ដោយផ្អែកលើបទពិសោធន៍កាលពីអតីតកាលរបស់ខ្លួន។ លោក និយាយថា «មន្ទីរពេទ្យចំនួន៦៩ដែលមានបទពិសោធន៍នៅក្នុងការដោះស្រាយជំងឺSARS និងជំងឺគ្រុនផ្តាសាយបក្សី ឥឡូវនេះកំពុងថែទាំអ្នកជំងឺ MERS ផងដែរ។ គេនឹងពិនិត្យថាតើបុគ្គលិក ឧបករណ៍ពេទ្យ ហើយការប្រុងប្រៀបបន្ទប់សម្រាប់ដាក់អ្នកជំងឺឲ្យនៅដាច់ពីគេដែរមានគ្រប់គ្រាន់ដែរឬទេ។
លោកនិយាយបន្តទៀតថា «ដោយហេតុដូច្នេះហើយ បានជាយើងអាចកំណត់អត្តសញ្ញាណរបស់បុរសនោះនៅពេលនេះ ពីព្រោះតែយើងបានស្ថាបនាការប្រុងប្រយ័ត្នទាំងអស់នេះ»។
ក្រុមមន្រ្តីថៃបានប្រាប់VOAថា វេជ្ជបណ្ឌិត ថៃម្នាក់នៅឯមន្ទីរពេទ្យអន្តរជាតិ Bumrungrad បានសង្ស័យបុរសនោះថា ប្រហែលមានមេរោគ MERS ពីព្រោះនៅពេលគាត់មកពីបរទេស គាត់បានត្អូញត្អែពីការឈឺផ្លូវដកដង្ហើម និងមានជំងឺគ្រុនក្តៅ៕
