ប្រទេសកូរ៉េខាងជើង កូរ៉េខាងត្បូង និងទីបញ្ជាការអង្គការសហប្រជាជាតិគាំទ្រប្រទេសកូរ៉េខាងត្បូងដែលហៅកាត់ថា UNC បានជួបប្រជុំគ្នានៅថ្ងៃចន្ទនេះ ដើម្បីពិភាក្សាបន្ថែមអំពីគម្រោងលុបបំបាត់អាវុធនៅតំបន់សន្តិសុខរួម JSA ក្នុងតំបន់គ្មានយោធា DMZ នៃព្រំដែនរវាងប្រទេសកូរ៉េទាំងពីរ។
កិច្ចប្រជុំនេះធ្វើឡើង បន្ទាប់ពីភាគីទាំង ៣ បានជួបប្រជុំគ្នាម្ដងរួចមកហើយកាលពីសប្ដាហ៍មុន ដោយបានពិភាក្សាអំពីវិធីអនុវត្តកិច្ចព្រមព្រៀងយោធាដ៏ទូលំទូលាយមួយដែលបានចុះហត្ថលេខានៅក្នុងអំឡុងពេលកិច្ចប្រជុំអន្តរកូរ៉េលើកទី ៣ ដើម្បីសម្រេចឲ្យបាននូវគោលបំណងនោះ។
លោកឧត្ដមសេនីយ៍ឯក Wayne Eyre មេបញ្ជាការរងនៃទីបញ្ជាការ UNC និយាយថា ទីបញ្ជាការ UNC នឹងអនុវត្តតាមបេសកកម្មរបស់ខ្លួនដើម្បីគាំទ្រដល់កិច្ចប្រឹងប្រែងការទូតនៅពេលបច្ចុប្បន្ននេះ។
អ្នកជំនាញនានាបានស្នើឲ្យទីបញ្ជាការ UNC នេះ ដើរតួនាទីសកម្មមួយ ស្របពេលដែលកូរ៉េទាំងពីរវិវឌ្ឍទៅរកការធ្វើឲ្យព្រំដែនយោធាក្លាយទៅជាតំបន់សន្តិភាពមួយ។
ក្រសួងការពារជាតិកូរ៉េខាងត្បូងបានបញ្ជាក់នៅក្នុងសេចក្ដីប្រកាសមួយថា កិច្ចប្រជុំនៅថ្ងៃចន្ទនេះ «ផ្ដោតលើការពិនិត្យ និងវាយតម្លៃលើស្ថានភាពបច្ចុប្បន្ននៃប្រតិបត្តិការដោះមីននៅតំបន់សន្តិសុខរួម JSA និងផ្ដោតលើការប្រឹក្សាយោបល់អំពីគម្រោងដកអាវុធ និងប៉ុស្តិ៍យាមកាមចេញពីតំបន់នោះ ក៏ដូចជារៀបចំចាត់ចែងមន្ត្រីសន្តិសុខយាមកាមឡើងវិញ និងគម្រោងអនាគតសម្រាប់ការផ្ទៀងផ្ទាត់ឡើងវិញទៅវិញទៅមកផងដែរ»។
ប្រទេសកូរ៉េទាំងពីរនឹងពិភាក្សាគ្នាបន្ថែមទៀតនៅថ្ងៃសុក្រខាងមុខនេះ។ ក្រសួងការពារជាតិកូរ៉េខាងត្បូងថា ការពិភាក្សាលើកក្រោយនេះនឹងផ្ដោតលើវិធីបង្កើត និងប្រតិបត្តិគណៈកម្មាធិការយោធារួមគ្នា ដែលមានតួនាទីពង្រឹងកិច្ចព្រមព្រៀងយោធារវាងប្រទេសទាំងពីរ និងអំពីវិធីបង្កើតក្រុមស្រាវជ្រាវរួមគ្នាមួយសម្រាប់តំបន់នៃទន្លេ Han ដែលត្រូវបានបិទមិនឲ្យប្រជាពលរដ្ឋឆ្លងកាត់ ដោយសារតែភាពតានតឹងដែលកើនឡើងកន្លងមក៕