នៅថ្ងៃអង្គារនេះ អ្នកចរចាមកពីប្រទេសកូរ៉េខាងជើង កូរ៉េខាងត្បូង និងទីបញ្ជាការកម្លាំងចម្រុះអង្គការសហប្រជាជាតិដឹកនាំដោយសហរដ្ឋអាមេរិកដែលគាំទ្រប្រទេសកូរ៉េខាងត្បូងនៅក្នុងអំឡុងពេល និងក្រោយសង្គ្រាមកូរ៉េ បានជួបពិភាក្សាគ្នាជាលើកដំបូងនៅតំបន់គ្មានយោធា DMZ នៃព្រំដែនរវាងប្រទេសកូរ៉េទាំងពីរ។
ក្រសួងការពារជាតិកូរ៉េខាងត្បូងបានបញ្ជាក់នៅក្នុងសេចក្ដីប្រកាសមួយថា៖ «ភាគីទាំង ៣ បានពិនិត្យលើដំណើរវិវឌ្ឍទៅមុខនៃការដោះមីនចេញពីតំបន់សន្តិសុខរួម ដែលហៅកាត់ថា JSA… និងបានពិភាក្សាអំពីបញ្ហាជាក់ស្ដែងផ្សេងទៀតពាក់ព័ន្ធនឹងជំហានក្នុងដោះមីន និងលុបបំបាត់សព្វាវុធ និងអ្វីៗពាក់ព័ន្ធនឹងយោធាចេញពីតំបន់នោះ»។
តំបន់សន្តិសុខរួម JSA នេះ ជាតំបន់ដែលភាគីទាំង ៣ បានគ្រប់គ្រងតាំងពីសង្គ្រាមកូរ៉េបានបញ្ចប់ទៅដោយកិច្ចឈប់វាយប្រយុទ្ធគ្នានៅក្នុងឆ្នាំ ១៩៥៣ គឺមិនមែនដោយសន្ធិសញ្ញាសន្តិភាពនោះទេ។
តំបន់នេះក៏ជាកន្លែងតែមួយគត់នៅក្នុងតំបន់គ្មានយោធា DMZ ដែលទាហាននៃប្រទេសកូរ៉េទាំងពីរឈរទល់មុខគ្នា។ តំបន់នេះត្រូវបានគេប្រើសម្រាប់កិច្ចការទំនាក់ទំនងការទូតនានាពាក់ព័ន្ធនឹងកូរ៉េទាំងពីរកន្លងមក។ តំបន់នេះផងដែរក៏ជាកន្លែងមួយដែលហេតុការណ៍បង្ហូរឈាមបានកើតឡើងនៅឆ្នាំ ១៩៧៦ នៅពេលដែលទាហានអាមេរិកាំងពីរនាក់ត្រូវបានសម្លាប់ដោយទាហានកូរ៉េខាងជើងដែលប្រដាប់ដោយពូថៅ។
នៅក្នុងកិច្ចប្រជុំលើកទី ៣ នៅទីក្រុងព្យុងយ៉ាងកាលពីខែមុន មេដឹកនាំកូរ៉េខាងជើងលោក Kim Jong Un និងមេដឹកនាំកូរ៉េខាងត្បូងលោក Moon Jae In បានឯកភាពគ្នាលើការដោះមីន ដកប៉ុស្តិ៍យាមល្បាត ដកការតាមដាន និងឧបករណ៍យោធាផ្សេងទៀតចេញពីតំបន់សន្តិសុខរួម JSA នេះ នៅត្រឹមចុងឆ្នាំនេះ៕
