កាលពីថ្ងៃពុធនេះ តុលាការថៃមួយបានសម្រេចថា លោក Pita Limjaroenrat អ្ននយោបាយដែលមានប្រជាប្រិយភាពជាងគេរបស់ប្រទេសថៃ មិនបានរំលោភលើបទបញ្ញត្តិនៃការបោះឆ្នោត ដោយសារការមានភាគហ៊ុនក្នុងបណ្តាញព័ត៌មាននៅពេលលោកកាន់តំណែងនោះទេ។ សេចក្តីសម្រេចរបស់តុលាការនេះបានធ្វើឱ្យលោក Pita រួចផុតពីការចោទប្រកាន់ ហើយអាចឱ្យលោកដឹកនាំគណបក្សឆ្ពោះទៅមុខ (Move Forward Party) ដែលជាបក្សកែទម្រង់និយមរបស់ប្រទេសថៃ។
លោក Pita អាយុ៤៣ឆ្នាំ បានប្រឈមនឹងការហាមប្រាមមិនឱ្យធ្វើនយោបាយនិងអាចជាប់ឃុំក្នុងពន្ធនាគារ ដោយសារលោកមានភាគហ៊ុននៅក្នុងក្រុមហ៊ុនបណ្តាញសារព័ត៌មាន ដែលលែងដំណើរការមួយមានឈ្មោះថា iTV។ តាមរយៈច្បាប់ថៃ វាជាការខុសច្បាប់នៅពេលដែលអ្នកនយោបាយមានជាប់ពាក់ព័ន្ធនឹងធុរកិច្ចបណ្តាញសារព័ត៌មាន នៅពេលឈរឈ្មោះសម្រាប់តំណែងក្នុងជួររដ្ឋាភិបាល។
គណបក្សរបស់លោកថា ករណីនេះពាក់ព័ន្ធនឹងរឿងនយោបាយដោយសារតែអ្នកនយោបាយរាជានិយមបានរារាំងលោក Pita មិនឲ្យបានកាន់តំណែងជានាយករដ្ឋមន្ត្រី ក្រោយគណបក្សឆ្ពោះទៅមុខបានទទួលអាសនៈច្រើនបំផុតនៅក្នុងការបោះឆ្នោតជាតិ កាលពីខែឧសភា ឆ្នាំ ២០២៣។
លោកចៅក្រម Punya Udchachon បាននិយាយថា iTV «មិនបានធ្វើប្រតិបត្តិការជាក្រុមហ៊ុនបណ្តាញសារព័ត៌មានទេ» នៅពេលលោក Pita ឈរឈ្មោះសម្រាប់ការបោះឆ្នោត ហើយ«មានភាគហ៊ុន មិនមែនជាការរំលោភច្បាប់ទេ ... ដូច្នេះឋានៈលោកជាសមាជិករដ្ឋសភាមិនត្រូវបានបញ្ឈប់ឡើយ»។
ឧបសគ្គទី ១
នេះជាបញ្ហាផ្លូវច្បាប់ធំទី ១ ក្នុងបណ្តាបញ្ហាផ្លូវច្បាប់ធំៗពីរក្នុងមួយសប្តាហ៍សម្រាប់គណបក្សឆ្ពោះទៅមុខ ដែលនិយមកំណែទម្រង់។ ក្រុមអ្នកកាន់អំណាចរាជានិយមស្រឡាំងកាំង ដោយសារគណបក្សនេះឈ្នះឆ្នោតដោយបានទទួលអាសនៈភាគច្រើននៅក្នុងការបោះឆ្នោតជាតិ កាលពីឆ្នាំ ២០២៣ ដោយបានសន្យាថា នឹងបំបែកធុរកិច្ចផ្តាច់មុខនិងបង្កើតសង្គមមួយដែលមានសមភាពជាងមុន។
គណបក្សឆ្ពោះទៅមុខអាចត្រូវបានរំលាយ ប្រសិនបើនៅថ្ងៃទី៣១ ខែមករា តុលាការមួយទៀតសម្រេចប្រឆាំងនឹងសំណើមួយក្នុងចំណោមសំណើរសំខាន់ៗរបស់គណបក្សនេះ ដោយស្នើឱ្យកែប្រែច្បាប់ស្តីពីការប្រមាថព្រះចេស្តាដែលដាក់ទោសជាប់ពន្ធនាគារដល់អ្នករិះគន់របបរាជាធិបតេយ្យនោះ។
មុនសេចក្តីសម្រេចនៅថ្ងៃពុធ ទី២៤ ខែមករា លោក Pita បានថ្លែងប្រាប់ក្រុមអ្នកកាសែតថា លទ្ធផលអវិជ្ជមានមួយជាការវាងផ្លូវនៃការធ្វើដំណើរវែងឆ្ងាយដើម្បីកែទម្រង់ប្រទេសថៃ។
លោកបានថ្លែងថា៖ «ទោះជាមានសាលក្រមនៅថ្ងៃនេះបែបណាក៏ដោយ ក៏យើងធ្វើការជូនលោកអ្នក ... យើងនឹងបន្តប្រយុទ្ធសម្រាប់លោកអ្នក»។
សម្រែកអបអរសាទរថា «លោក Pita សម្រាប់តំណែងនាយករដ្ឋមន្ត្រី» មានលាន់ឮឡើងពីក្រុមអ្នកគាំទ្រគណបក្សឆ្ពោះទៅមុខ ដែលបានប្រមូលផ្តុំគ្នានៅជិតតុលាការនោះ នៅពេលមានការប្រកាសអំពីសេចក្តីសម្រេចជាវិជ្ជមាននេះ។
លោក Sakon Kamtaerong អាយុ៥៩ឆ្នាំ ជាអ្នកគាំទ្រម្នាក់ដែលពាក់ក្បាំងមុខមានរូបលោក Pita បាននិយាយប្រាប់វីអូអេថា៖ «ខ្ញុំសប្បាយចិត្តដោយដឹងថា លោក Pita នឹងវិលទៅកាន់រដ្ឋសភាវិញជាបន្ទាន់។ ប្រសិនបើខ្ញុំអាចធ្វើបាន ខ្ញុំនឹងអមដំណើរលោកទៅកាន់រដ្ឋសភាដោយផ្ទាល់នៅថ្ងៃនេះ។ តែខ្ញុំក៏ចង់ឱ្យអ្នកដែលធ្វើឱ្យលោករង់ចាំយូរ ទទួលខុសត្រូវដល់ការណ៍នេះដែរ»។
ការរស់រានមានជីវិតនយោបាយរបស់លោក Pita មានន័យថា លោកអាចទទួលតំណែងជាមេដឹកនាំក្រុមប្រឆាំងមកវិញ បន្ទាប់ពីលោកបានដកខ្លួនចេញដោយរង់ចាំសេចក្តីសម្រេចរបស់តុលាការ។
លោក Chatree Choomchee ដែលជាអ្នករាជការម្នាក់ បាននិយាយថា លោកសប្បាយចិត្តណាស់ចំពោះការវិលត្រឡប់របស់លោក Pita មកធ្វើនយោបាយវិញ។
លោកបានថ្លែងថា៖ «នៅពេលនេះ ចូរសង្ឃឹមថា គណបក្សឆ្ពោះទៅមុខក៏រស់រានមានជីវិតដែរ»។
ឧបសគ្គខាងផ្លូវច្បាប់
ករណីប្រឆាំងនឹងលោក Pita ត្រូវបានលើកឡើងដោយគណៈកម្មការរៀបចំការបោះឆ្នោតក្នុងពេលខ្លីក្រោយការបោះឆ្នោតជាតិ ដែលបានបង្ហាញការគ្មានប្រជាប្រិយភាពខ្លាំងរបស់ក្រុមឧត្តមសេនីយ៍យោធាកាន់តំណែងនៅពេលនោះ។
ក្រុមឧត្តមសេនីយ៍ទាំងនេះបានធ្វើឱ្យមានការមិនជិតស្និទ្ធជាមួយក្រុមយុវជន ពលរដ្ឋរស់នៅតាមទីក្រុង តាមជនបទ និងក្រុមរាជានិយមខ្លះផងដែរ ដែលបណ្តាលឱ្យអ្នកបោះឆ្នោតរាប់លាននាក់គាំទ្រគោលនយោបាយថ្មីៗរបស់គណបក្សឆ្ពោះទៅមុខ។
លោក Pita ដែលបានសិក្សានៅសាកលវិទ្យាល័យ Harvard ហៀបបានកាន់តំណែងជានាយករដ្ឋមន្ត្រីទៅហើយ មុនបណ្តឹងរបស់គណៈកម្មការរៀបចំការបោះឆ្នោត ដែលបាននាំឱ្យមានការព្យួរតំណែងរបស់លោកក្នុងសភា កាលពីខែកក្កដា ឆ្នាំ ២០២៣។
ការណ៍នេះនាំឱ្យព្រឹទ្ធសភាដែលត្រូវបានតែងតាំងដោយក្រុមអភិរក្សនិយម មានលេសដើម្បីបោះឆ្នោតប្រឆាំងនឹងបេក្ខភាពជានាយករដ្ឋមន្ត្រីរបស់លោក Pita ហើយគាំទ្របេក្ខជនដែលពួកគេចូលចិត្តជំនួសវិញ។
លោក Srettha Thavisin មហាសេដ្ឋីអចលនទ្រព្យ អាយុ៦១ឆ្នាំ បានលេចឡើងជានាយករដ្ឋមន្ត្រី ហើយលោកបានបង្កើតរដ្ឋាភិបាលចម្រុះមួយជាមួយក្រុមឥស្សរជននៃអតីតរដ្ឋបាល តែគ្របដណ្តប់ភាគច្រើនដោយគណបក្ស Pheu Thai របស់លោក។
លោកបានប្រឹងប្រែងទាក់ទាញទឹកចិត្តសាធារណជន ជាពិសេសក្រុមអ្នកបោះឆ្នោតឱ្យគណបក្សឆ្ពោះទៅមុខ ដែលនិយាយថា លោកតំណាងសណ្តាប់ធ្នាប់ចាស់ ទោះបីជាលោកបានសន្យាថានឹងធ្វើឱ្យប្រទេសថៃទំនើបជាងមុន និងធ្វើឱ្យប្រជារាស្ត្រគ្រប់គ្នាមានធនធានច្រើនជាងមុនក៏ដោយ។
ក្រុមអ្នកកាន់អំណាចរាជានិយមផ្កាប់មុខរបស់ប្រទេសថៃបានចំណាយពេលវេលាជិត២០ឆ្នាំ ដើម្បីទម្លាក់រដ្ឋាភិបាលជាប់ឆ្នោតតាមប្រជាធិបតេយ្យ ដោយធ្វើរដ្ឋប្រហារឬប្រើអំណាចរបស់តុលាការ។
ក្រុមអ្នកជំនាញនិយាយថា គណបក្សឆ្ពោះទៅមុខ Move Forward ជាឧបសគ្គរយៈពេលយូរធំបំផុតរបស់ក្រុមរាជានិយម ដោយសារការអំពាវនាវដ៏មានប្រជាប្រិយភាពរបស់បក្សនេះដើម្បីធ្វើឱ្យមានការកែទម្រង់ស៊ីជម្រៅដល់ប្រព័ន្ធអំណាចនៃប្រទេសថៃ។
គណបក្សមួយមុនបក្សឆ្ពោះទៅមុខ គឺគណបក្សឆ្ពោះទៅអនាគត Future Forward និងស្ថាបនិកបក្សនេះត្រូវបានតុលាការហាមប្រាមកាលពីឆ្នាំ ២០២០ មិនឱ្យធ្វើនយោបាយ ហើយការណ៍នេះបានបើកផ្លូវឱ្យលោក Pita លេចឡើងជាតារានយោបាយថ្មីនៃប្រទេសថៃ។
ក្រុមសមាជិកសភានៃគណបក្សឆ្ពោះទៅមុខ Move Forward ថ្លែងថា ក្រុមអ្នកបោះឆ្នោតនៅប្រទេសថៃ ជាពិសេសក្រុមយុវជនដែលបានធំដឹងក្តីនៅពេលរដ្ឋាភិបាលយោធាឬរដ្ឋាភិបាលចាត់ចែងដោយពួកយោធាកាន់អំណាច ធុញទ្រាន់នឹងកលល្បិចរបស់ក្រុមអ្នកកាន់អំណាចដែលរារាំងដល់កំណែទម្រង់។
លោក Bhuntin Noumjerm សមាជិកសភាក្រុងបាងកក បាននិយាយប្រាប់វីអូអេថា៖ «ប្រសិនបើគណបក្សយើងត្រូវបានរំលាយនៅសប្តាហ៍ក្រោយ នោះនឹងមានគណបក្សមួយទៀត។ អ្នកអាចសម្លាប់មនុស្សម្នាក់បាន ប៉ុន្តែអ្នកមិនអាចសម្លាប់គំនិតមួយបានទេ។ ប្រជារាស្ត្រអស់ជំនឿលើប្រព័ន្ធច្បាប់ដដែលរបស់យើង។ ដូច្នេះបើពួកគេចង់ធ្វើឱ្យខ្លួនឯងបាត់បង់អំណាចកាន់តែខ្លាំង សូមអញ្ជើញចុះ»៕
ប្រែសម្រួលដោយលោកឈឹម សុមេធ
វេទិកាបញ្ចេញមតិ