ប្រទេសថៃបានធ្វើមាតុភូមិនិវត្តន៍ជនអន្តោប្រវេសន៍ ដែលជាជនជាតិភាគតិចអ៊ុយហ្គ័រ (Uighur) ប្រហែល១០០នាក់ទៅប្រទេសចិន ទីដែលក្រុមសិទ្ធិមនុស្សព្រមានថា ពួកគេអាចនឹងត្រូវប្រឈមមុខនឹងការធ្វើទុក្ខបុកម្នេញ។
ក្រុមជនជាតិភាគតិចនិយាយភាសា Turkic នេះបានត្អូញត្អែរយូរហើយអំពីការរើសអើងនៅប្រឆាំងខ្លួនក្នុងតំបន់ Xinjiang ក្នុងប្រទេសចិន។ ជនជាតិភាគតិចអ៊ុយហ្គ័រ ជាច្រើនបានភៀសខ្លួនពីតំបន់នេះ។ ពួកគេជាច្រើនបានធ្វើដំណើរឆ្លងកាត់ប្រទេសនៅតំបន់អាស៊ីអាគ្នេយ៍ រួមមានប្រទេសថៃ ដែលពួកគេត្រូវចាប់ឃុំឃាំងជាជនអន្តោប្រវេសន៍ខុសច្បាប់។
លោកឩត្តមសេនីយ៍ Verachon Sukhonthapatipak អ្នកនាំពាក្យរដ្ឋាភិបាលប្រទេសថៃ និយាយនៅថ្ងៃព្រហស្បតិ៍នេះថា ជនអន្តោប្រវេសន៍អ៊ុយហ្គ័រទាំងនេះត្រូវឃុំឃាំងជាងមួយឆ្នាំមកហើយ។ លោកនិយាយថាជនអន្តោប្រវេសន៍ទាំងនេះត្រូវបញ្ជូនទៅប្រទេសចិនវិញ ព្រោះពួកគេជាជនជាតិចិន។ មនុស្សប្រហែល១៧០នាក់ទៀតជាជនជាតិតួកគី ហើយត្រូវបញ្ជូនទៅប្រទេសតួកគីវិញ។ លោកនិយាយថា ប្រទេសថៃបានទទួលការធានាពីរដ្ឋាភិបាលក្រុងប៉េកាំងថា ពួកគេនឹងមិនមានគ្រោះថ្នាក់ទេ តែក្រុមសិទ្ធិមនុស្សជាច្រើនមិនយល់ស្របឡើយ៕
