ប្រទេសថៃ កំពុងពិចារណាការតម្រូវឲ្យមានការធ្វើចត្តាឡីស័កឡើងវិញសម្រាប់ភ្ញៀវទេសចរបរទេស ដោយសារការព្រួយកង្វល់អំពីការរាលដាលនៃវីរុសជំងឺកូវីដ១៩បំប្លែងថ្មីអូមីក្រុង (Omicron) ខណៈដែលក្រសួងសុខាភិបាលបានរាយការណ៍នៅថ្ងៃចន្ទនេះថា មានករណីនៃការឆ្លងក្នុងស្រុកដំបូងនៃវីរុសអូមីក្រុង។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ករណីឆ្លងក្នុងស្រុកលើកដំបូងនេះ បានត្រូវគេរកឃើញនៅក្នុងស្ត្រីថៃម្នាក់ដែលបានធ្វើតេស្តវិជ្ជមានមានវីរុសអូមីក្រុង ក្រោយពីបានឆ្លងវីរុសនោះពីស្វាមីរបស់អ្នកស្រីជាជនជាតិកូឡុំប៊ីដែលបានវិលត្រឡប់ពីប្រទេសនីហ្សេរីយ៉ាមកកាន់ប្រទេសថៃវិញ កាលពីចុងខែវិច្ឆិកា។ នេះ បើតាមមន្ត្រីសុខាភិបាលម្នាក់ដែលបានប្រាប់សន្និសីទកាសែតប្រចាំថ្ងៃ។
លោក Chakrarat Pittayawonganon ជាមន្ត្រីមកពីនាយកដ្ឋានជំងឺឆ្លងនិយាយថា ទាំងស្វាមីនិងភរិយា បានចាក់វ៉ាក់សាំង AstraZeneca ២ដូស។
លោករដ្ឋមន្ត្រី Anutin Chamvirakul បាននិយាយថា ក្រសួងសុខាភិបាលសាធារណៈថៃ នឹងស្នើឲ្យបោះបង់ការលើកលែងចត្តាឡីស័កសម្រាប់ភ្ញៀវទេសចរដែលបានចាក់វ៉ាក់សាំងរួច និងត្រឡប់ទៅតម្រូវឱ្យធ្វើចត្តាឡីស័កនៅសណ្ឋាគារឡើងវិញ និងសាកល្បងអនុញ្ញាតឲ្យធ្វើដំណើរតែនៅទីកន្លែងជាក់លាក់មួយចំនួន។
សំណើនេះ បណ្តាលមកពីការព្រួយបារម្ភអំពីការរាលដាលនៃវីរុសអូមីក្រុង។ លោក Anutin បានប្រាប់កម្មវិធីទូរទស្សន៍ Inside Thailand ថា រដ្ឋាភិបាលនឹងធ្វើសំណើនេះទៅកាន់ក្រុមការងារកូវីដ១៩របស់ថៃ«នៅពេលឆាប់ៗនេះ»។
លោក Anutin បាននិយាយទៀតថា រហូតមកទល់ពេលនេះ ថៃបានរកឃើញមនុស្ស៦៣នាក់ដែលបានឆ្លងវីរុសបំប្លែងខ្លួនអូមីក្រុង ដោយមានករណីឆ្លងនៅក្នុងស្រុកមួយករណី ហើយករណីផ្សេងទៀតជាអ្នកធ្វើដំណើរពីបរទេស។
ការលើកឡើងរបស់លោករដ្ឋមន្ត្រី កើតមានឡើងបន្ទាប់ពីប្រទេសថៃ បានបើកឲ្យភ្ញៀវទេសចរបរទេសចូលក្នុងប្រទេសឡើងវិញកាលពីខែវិច្ឆិកា ដោយបញ្ចប់គោលនយោបាយរឹតត្បិតការចូលប្រទេសជិត១៨ខែ ដែលនេះបានធ្វើឲ្យដួលរលំវិស័យទេសចរណ៍ថៃដែលជាវិស័យដ៏សំខាន់មួយ និងជាកម្លាំងរុញច្រានសេដ្ឋកិច្ចដោយទាក់ទាញភ្ញៀវទេសចរចំនួន៤០លាននាក់នៅក្នុងឆ្នាំ២០១៩៕
