ប៉ូលិសថៃបានផ្សារភ្ជាប់ជាលើកទីមួយនៃការផ្ទុះគ្រាប់បែកដ៏ប្រល័យកាលពីខែមុននៅទីសក្ការៈបូជាក្នុងទីក្រុងបាងកកទៅនឹងក្រុមជនជាតិភាគតិចអ៊ុយហ្គរ (Uighurs) នៅក្នុងប្រទេសចិន។
ក្រុមអ្នកស៊ើបអង្កេតបាននិយាយនៅថ្ងៃអង្គារនេះថា ពួកគេជឿជាក់ថា ការបំផ្ទុះគ្រាប់បែកនេះជា ការវាយប្រហារសងសឹកដែលត្រូវបានធ្វើឡើងដោយក្រុមអ្នកជួញដូរមនុស្សដែលបានរត់ពន្ធជនជាតិភាគតិចអ៊ុយហ្គរតាមរយៈប្រទេសថៃ។
លោកSomyot Poompanmoung ប្រធានប៉ូលិសជាតិថៃបាននិយាយថា មូលហេតុគឺបណ្តាញជួញដូរមនុស្ស ដែលបានផ្ទេរជនជាតិភាគតិចអ៊ុយហ្គរពីប្រទេសមួយទៅប្រទេសមួយទៀត។ ក្រុមអាជ្ញាធរថៃបានបំផ្លាញ ឬរារាំងប្រតិបត្តិការជួញដូរមនុស្សរបស់ពួកគេ។
មួយខែមុនពេលវាយប្រហារ ថៃបាននិរទេសដោយការបង្ខំឲ្យជនអ៊ុយហ្គរ ដែលនិយាយភាសាតួកគី ដែលមានសមាជិកជាង១០០នាក់ទៅកាន់ប្រទេសចិនវិញ ដែលបានត្អូញត្អែរពីការធ្វើទុក្ខបុកម្នេញដោយរដ្ឋាភិបាលទីក្រុងប៉េកាំង។ ការសម្រេចនេះ បានត្រូវថ្កោលទោសដោយក្រុមអង្គការសិទ្ធិមនុស្ស និងអង្គការជនអ៊ុយហ្គរនៅឯបរទេស។
ក្រុមមន្រ្តី បាននិយាយបង្ហើបជាបន្តបន្ទាប់អស់រាប់សប្តាហ៍មកហើយ ក៏ប៉ុន្តែបានបដិសេធពុំព្រមនិយាយថា ក្រុមជនជាតិភាគតិចអ៊ុយហ្គរកាន់សាសនាអ៊ីស្លាមមានជាប់ទាក់ទិនទៅនឹងការបំផ្ទុះគ្រាប់បែកកាលពីថ្ងៃទី១៧ ខែសីហា ដែលបានសម្លាប់មនុស្សយ៉ាងហោចណស់ក៏២០នាក់ ហើយបានធ្វើឲ្យមនុស្សរាប់សិបនាក់ទៀតរងរបួស ដែលភាគច្រើជាអ្នកទេសចរចិន៕
