ក្រុមមន្រ្តីថៃកំពុងស្វែងរកអ្នកទទួលខុសត្រូវចំពោះការវាយប្រហារដោយគ្រាប់បែកតូចៗចំនួន១១គ្រាប់ ដែលបានសម្លាប់មនុស្ស៤នាក់ និងធ្វើឲ្យមនុស្សរាប់សិបនាក់ទៀតរងរបួស នៅក្នុងទីក្រុងទេសចរណ៍សំខាន់ៗជាច្រើនកាលពីយប់ថ្ងៃព្រហស្បតិ៍និងព្រឹកថ្ងៃសុក្រ។
ប៉ូលិសថៃបាននិយាយថា ពួកគេមិនបានសង្ស័យក្រុមជនសកម្មប្រយុទ្ធឥស្លាមអន្តរជាតិណាមួយស្ថិតនៅពីក្រោយការវាយប្រហារទាំងនោះទេ តែផ្ទុយទៅវិញ បានហៅការវាយប្រហារទាំងនោះថាជាសកម្មភាពបំផ្លាញ ដែលទំនងជាធ្វើឡើងដោយក្រុមក្នុងមូលដ្ឋានដែលមានរបៀបវារៈនយោបាយ។ មន្រ្តីខ្លះបានស្តីបន្ទោសសមាសធាតុពួកបះបោរឥស្លាមនៅក្នុងតំបន់ភាគខាងត្បូងប្រទេសថៃ ក៏ប៉ុន្តែ គ្មានក្រុមណាមួយបានអះអាងទទួលខុសត្រូវទេ។
ការផ្ទុះគ្រាប់បែក បានកើតមានឡើងនៅខួបលើកទី៨៤ឆ្នាំរបស់មហាក្សត្រយានី Sirikit នៃប្រទេសថៃ ជាថ្ងៃបុណ្យសម្រាកជាតិ ហើយការផ្ទុះគ្រាប់បែកមួយនៃការផ្ទុះគ្រាប់បែកទាំងនោះ បានកើតមានឡើងនៅកន្លែងលំហែកាយឆ្នេរសមុទ្រក្រុង Hua Hin ដែលនៅទីនោះព្រះមហាក្សត្រ និងមហាក្សត្រយានី មានព្រះរាជវាំង។ ក្រុមប្រឹក្សាយោធាថៃដែលបានដឹកនាំប្រទេសចាប់តាំងពីរដ្ឋប្រហារឆ្នាំ២០១៤មក មើលឃើញខ្លួនថាជាអ្នកការពាររាជាធិបតេយ្យ។
ក្រុមប្រឹក្សាយោធា បានបង្ក្រាបសកម្មជននិស្សិត និងគណបក្សប្រឆាំងដែលបានរិះគន់ជាសាធារណៈដល់ពួកឧត្តមសេនីយ៍យោធាចំពោះការធ្វើអន្តរាគមន៍នៅក្នុងដំណើរការនយោបាយ។ ចាប់តាំងពីការឡើងកាន់អំណាច ក្រុមប្រឹក្សាយោធា បានស្ថិតនៅក្រោមការរិះគន់យ៉ាងខ្លាំងពីក្រុមសិទ្ធិមនុស្សអន្តរជាតិចំពោះការហាមឃាត់មិនឲ្យតវ៉ាប្រឆាំងសាធារណៈ ការចាប់ខ្លួនសកម្មជននយោបាយឲ្យចូលការអប់រំសាជាថ្មីនៅជំរំដែលរៀបចំចាត់ចែងដោយពួកយោធា ហើយបានរឹតបន្តឹងត្រួតត្រាបណ្តាញផ្សាយព័ត៌មាន។
កាលពីសប្តាហ៍មុន សេចក្តីព្រាងធម្មនុញ្ញថ្មីរបស់រដ្ឋាភិបាលយោធា បានទទួលការយល់ព្រមពីអ្នកបោះឆ្នោតនៅក្នុងការបោះឆ្នោតប្រជាមតិទូទាំងប្រទេស។ ពួកអ្នករិះគន់បានរិះគន់ការបោះឆ្នោតនោះថា គ្មានភាពត្រឹមត្រូវពីព្រោះតែពួកយោធា បានហាមឃាត់មិនឲ្យមានយុទ្ធនាការសាធារណៈអំពីបញ្ហានេះមុនពេលបោះឆ្នោត៕
