ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ក្រុង​ប៉េកាំង​រិះគន់​របាយការណ៍​អាមេរិក​ស្តី​ពី​ការ​ដាក់​ពង្រាយ​យោធា​របស់​ចិន


នាវា​បូម​ខ្សាច់​ចិន​ត្រូវ​បាន​ប្រទះ​ឃើញ​នៅ​ដែនទឹក​តំបន់​ថ្ម​ប៉ប្រះទឹក Fiery Cross Reef ក្នុង​សមុទ្រ​ចិន​ភាគ​ខាងត្បូង​ នៅ​ក្នុង​រូបភាព​ផ្តល់​ឲ្យ​ដោយ​យន្តហោះ​ស៊ើបការណ៍​​របស់​សហរដ្ឋអាមេរិក កាល​ពី​ថ្ងៃ​ទី២១ ខែ​ឧសភា ឆ្នាំ២០១៥។

ក្រសួង​ការពារ​ជាតិ​ចិន​បាន​សម្តែង​ «ការ​មិន​ពេញចិត្ត​ជា​ខ្លាំង» នឹង​សហរដ្ឋ​អាមេរិក ដោយ​បាន​រិះគន់​របាយការណ៍​ប្រចាំ​ថ្ងៃ​របស់​ក្រសួងការពារជាតិ​អាមេរិក​ថា បាន​រាយការណ៍​មិន​ត្រឹមត្រូវ​អំពី​ការ​អភិវឌ្ឍ​ផ្នែក​យោធា​របស់​ចិន។

របាយការណ៍​របស់​ក្រសួង​ការពារ​ជាតិ​អាមេរិក ដែល​ដាក់​ជូន​សភា​ កាល​ពី​ថ្ងៃ​សុក្រ បាន​និយាយ​ថា ប្រទេស​ចិន បាន​ផ្តោត​ទៅលើ​ការ​អភិវឌ្ឍ​និង​ការ​ពង្រាយ​អាវុធ​នៅលើ​កោះ ដែល​ខ្លួន​បាន​កសាង​ឡើង ក្នុង​ដែន​ទឹក​ដែន​មាន​ជម្លោះ​នៅ​សមុទ្រ​ចិន​ខាង​ត្បូង ដើម្បី​ឲ្យ​ខ្លួន អាច​មាន​អំណាច​កាន់​តែ​ខ្លាំង​ជាង​មុន ក្នុង​ការ​គ្រប់គ្រង​តំបន់​សមុទ្រ​នោះ ដោយ​មិន​ចាំបាច់​មាន​ជម្លោះ​ប្រដាប់​អាវុធ​ឡើយ។

កាល​ពី​ថ្ងៃ​សៅរ៍ អ្នក​នាំ​ពាក្យ​ក្រសួង​ការពារ​ជាតិ​ចិន លោក Yang Yujun បាន​ថ្លែង​ប្រាប់​ទី​ភ្នាក់ងារ​សារព័ត៌មានXinhua ថា របាយការណ៍​របស់​អាមេរិក ស្តីពី​សកម្មភាព​យោធាចិន​នៅ​ឆ្នាំ២០១៥ «មាន​ចេតនា​បំភ្លៃ​គោលនយោបាយ​ការពារ​ជាតិ​របស់​ចិន»។

​លោក Yang Yujun ថ្លែង​ថា «ប្រទេស​ចិន​ធ្វើ​តាម​គោលនយោបាយ​ការពារ​ជាតិ ដែល​មាន​ចេតនា​គ្រាន់តែ​ការពារ​ខ្លួន​ប៉ុណ្ណោះ»។

អ្នក​នាំ​ពាក្យ​ក្រសួង​ការពារ​ជាតិ​ចិន​រូប​នេះ​បន្ត​ថា « ​ការ​កែទម្រង់​ស៊ីជម្រៅ​និង​ការ​បង្កើន​កម្លាំង​យោធា​នេះ មាន​គោលបំណង​រក្សា​អធិបតេយ្យភាព បូរណភាព​ទឹកដី និង​សន្តិសុខ ហើយ​នឹង​ធានា​ដល់​ការ​អភិវឌ្ឍ​ដោយ​សន្តិវិធី​របស់​ចិន​តែ​ប៉ុណ្ណោះ»។

របាយការណ៍​របស់​ក្រសួង​ការ​ពារ​ជាតិ​អាមេរិក បាន​ចោទ​ប្រកាន់​ចិន ថា​បាន​«បង្កើន​ការ​ខំ​ប្រឹងប្រែងយ៉ាង​ពិតប្រាកដ ដើម្បី​ជំរុញ​ការ​ទាមទារ​ដែន​ទឹក​ដី​និង​អធិបតេយ្យភាព​ជាតិ​របស់​ខ្លួន»។ របាយការណ៍​ថា ទង្វើ​ទាំងនេះ ខ្វះ​តម្លាភាព​អំពី​សមត្ថភាព​យោធា​ដែល​ចេះ​តែ​កើន​ឡើង​របស់​ចិន ដែល​កំពុង​តែ​បង្ក​ភាព​តានតឹង​ជាមួយ​ប្រទេស​ដទៃទៀត​ក្នុង​តំបន់។

ប្រទេស​ហ្វីលីពីន វៀតណាម ម៉ាឡេស៊ី ប្រ៊ុយណេ និង​តៃវ៉ាន់ ក៏​បាន​ទាមទារ​ផ្នែក​ខ្លះ​នៃ​ដែន​សមុទ្រ​ចិន​ខាង​ត្បូង​នេះ​ដែរ៕

XS
SM
MD
LG